Ipelulainga Inge Kuji Bintu byo Mwabula Kuyuka

1. Yehoba witupa bulume bwa kuba ñanyi bintu, kabiji mambo ka?

YEHOBA witulengele na bulume bwa kulanguluka, kuyuka bintu, kumvwisha bintu ne kuba bintu na maana. Mambo ka Yehoba o etulengejile mu jino jishinda? Ukeba’mba ‘tumuyuke Lesa’ ne kumwingijila papelela bulume bwetu bwa kulanguluka.​—Maana 2:1-5; Loma 12:1.

2. (a) Ñanyi bintu byo twafwainwa kuyuka pe atweba bene? (Yoba 37:23, 24) (Monai ne kipikichala.) (b) Tumwenamo byepi inge twipelula ne kuyuka’mba kechi twayuka bintu byonse ne?

² Nangwa kya kuba tuji na bulume bwa kufunda bintu byavula, pano bino kechi twayuka bintu byonse ne. (Tangai Yoba 37:23, 24.) Akilangulukai pe Yoba. Yoba bamwipwizhe mepuzho avula bingi amwesheshe’mba kechi wayukile bintu byavula ne. Kino kyamulengejile kwipelula ne kupimpula ndangulukilo yanji. (Yoba 42:3-6) Ne atweba tumwenamo bingi inge twipelula ne kuyuka’mba kechi twayuka bintu byonse ne. Kuno kwipelula kwitulengela kuketekela mwi Yehoba kuba’mba uketusolwela bintu byo twafwainwa kuyuka pa kuba’mba tufuukulenga bintu bulongo.​—Maana 2:6.

3. Ñanyi bintu byo tusakwisambapo mu uno mutwe?

³ Mu uno mutwe, tusakwisamba pa bintu bimo byo twabula kuyuka ne ene mambo kino o kyakonsha kwitukatezha. Kabiji tusakwisamba ne pa ene mambo o kyawamina kuba’mba kechi twayuka bintu bimo ne. Kwisamba pa bino bishinka byonse kusakwitukwasha kuketekela’mba Yehoba “walumbuluka mu kuyuka bintu byonse,” witubuula bintu byo twafwainwa kuyuka.​—Yoba 37:16.

KECHI TWAYUKA KIMYE KIKEYA MPELO NE

4. Kwesakana na Mateo 24:36, ñanyi kintu kimo kyo twabula kuyuka?

⁴ Tangai Mateo 24:36. Kechi twayuka kimye kikeya mpelo ya buno bwikalo ne. Nangwatu Yesu byo ajinga pano pa ntanda, kechi wayukile “juba ne kimye” ne.a Palutwe kacheche, wabuujile batumwa amba Yehoba Mwine ulama kimye uyuka kimye kimwekelapo bintu bimo mambo ye uji na “luusa lwa kutongola kimye” kyafwainwa kumwekelamo bintu. (Byu. 1:6, 7) Yehoba watongwela jimo kimye kya mpelo ya buno bwikalo, pano bino kechi tuji na luusa lwa kukeba kuyuka kine kimye kikeshilamo mpelo ne.

5. Kubula kuyuka kimye kikeya mpelo kwakonsha kwitulengela kumvwa byepi?

⁵ Kwesakana na byaambile Yesu, kechi twayuka kimye kikapitapo na kupembelela mpelo ya buno bwikalo ne. Na mambo a bino, twakonsha kulefulwa nangwa kukankalwa kutekanya kikatakata inge twatendekele kala kupembelela juba ja Yehoba. Nangwa kampe twakonsha kukankalwa kuchinchika na mambo a kwitwendeleka ku ba mu kisemi kyetu nangwa bantutu bakwabo. (2 Pe. 3:3, 4) Twakonsha kutendeka kulanguluka’mba inge twayukile juba jine jikeya mpelo, kampe kino kyakonsha kwitukwasha kutekanya ne kuchinchika inge kebetwendeleke ku bakwetu.

6. Mambo ka o kyawamina kuba’mba kechi twayuka juba jikeya mpelo ne?

⁶ Yehoba byo abula kwitusolwela juba ne kimye kikeshilamo mpelo, kino kimwesha patoka’mba tumwingijila na mambo a kuba’mba twamutemwa ne kumuketekela. Kechi tubena kwingijila Yehoba na juba ja mpelo mu milanguluko yetu, uba nobe lwitabilo lwetu mwi Yehoba luji na po lwafwainwa kupelelela ne. Mu kifulo kya kutatu muchima pa kimye kikeya “juba ja Yehoba,” twafwainwa kulangulukanga pa bintu byawama bikamweka inge jino juba jafika. Kuba bino kuketukwasha kukosesha bulunda bwetu ne Lesa ne kuba bintu bimutookesha ku muchima.​—2 Pe. 3:11, 12.

7. Ñanyi bintu byo twayuka?

⁷ Twafwainwa kuta muchima pa bintu byo twayuka kuba’mba moba a kupelako atendekele mu 1914. Yehoba witupa bungauzhi mu Baibolo bumwesha kuba’mba moba a kupelako atendekele mu 1914. Kabiji witubuula ne bintu bibena kumweka mu ano moba kupelako. Na mambo a bino, twashiinwa kuba’mba “juba jikatampe ja Yehoba jijitu pepi.” (Zefwa. 1:14) Kabiji twayuka kuba’mba Yehoba ubena kukeba’mba tusapwile ku bantu bavula “mambo awama a Bufumu.” (Mat. 24:14) Ano mambo awama abena kusapwilwa mu byalo 240 ne mu milaka kukila 1,000. Kechi twafwainwa kuyuka “juba ne kimye” pa kuba’mba twingilenga na mukoyo mu uno mwingilo wanema ne.

KECHI TWAYUKA JISHINDA YEHOBA JO AKONSHA KUBILAMO BINTU NE

8. Byambo bya kuba’mba “bintu byonse byauba Lesa wa kine” bilumbulula ka? (Musapwishi 11:5)

⁸ Kechi tuyuka bintu byonse byuba “Lesa wa kine” ne. (Tangai Musapwishi 11:5.) Abino byambo byamba pa bintu Yehoba byo oba nangwa byo aswisha kubiwa pa kuba’mba afikizhe kyaswa muchima wanji. Kechi twakonsha kuyuka ene mambo Yehoba o akonsha kuswishisha bintu bimo kumweka nangwa byo akonsha kuba pa kuba’mba etukwashe ne. (Sala. 37:5) Baibolo waesakanya kubula kuyuka bintu byauba Lesa wa kine ku kubula kuyuka bikoma mwana uji munda mwainanji. Nangwatu basayansi kechi bayuka bulongo bikoma mwana uji munda ne. Kyo kimotu, ne atweba kechi twakonsha kuyuka bulongo jishinda Yehoba jo obilamo bintu ne.

9. Kubula kuyuka bulongo Yehoba byo aketukwasha, kwakonsha kwitulengela kuba ka?

⁹ Kubula kuyuka bulongo Yehoba byo aketukwasha kwakonsha kwitulengela kubula kufuukula bintu bulongo. Twakonsha kukankazhama kupeezhako bwikalo bwetu pa kuba’mba twingilengako pakatampe mu mwingilo nabiji kuya na kwingijila kwakepa basapwishi ba Bufumu. Twakonsha kutendeka kulanguluka’mba Lesa kechi witutemwa ne, na mambo a kuba’mba twakankalwa kufikizha bikonkwanyi byetu mu mwingilo wa Lesa, kafwako bintu byawama bibena kufuma mu mwingilo wa kusapwila nangwa tubena kupita mu makatazho amo pa kwingila mingilo imo mu jibumba ja Yehoba.

10. Ñanyi byubilo byo twikala nabyo na mambo a kubula kuyuka Yehoba byo aketukwasha?

¹⁰ Kubula kuyuka Yehoba byo aketukwasha kwitulengela kwikala na byubilo byawama bingi nabiji kwipelula ne kukooka muchima. Tuyuka kuba’mba milanguluko ya Yehoba ne mashinda anji kechi byaesakana na etu ne. (Isa. 55:8, 9) Kabiji tufunda kuketekela mwi Yehoba na muchima wetu yense ne kushiinwa’mba ukooba bintu mu jishinda jawama. Inge mu mwingilo wa kusapwila mwafuma bintu byawama nangwa mwingilo ye twaingila mu jibumba ja Lesa, kino kitulengela kutumbijika bingi Yehoba. (Sala. 127:1; 1 Ko. 3:7) Inge bintu byamweka mu jishinda mo twabujilenga kuketekela, twafwainwa kuvulukanga kuba’mba Yehoba uyuka byonse. (Isa. 26:12) Twafwainwa kwingila papelela bulume bwetu kabiji twafwainwa kushiinwa’mba Yehoba ukatwajijila na kwitukwasha. Twashiinwa kuba’mba uketutangijilanga, pano bino kechi mu jishinda ja kukumya byonka byo aubanga kala pa bimye bimo ne.​—Byu. 16:6-10.

11. Ñanyi bintu byo twayuka byakonsha kwitukwasha?

¹¹ Twayuka’mba Yehoba kimye kyonse umwesha butemwe, bunchibamambo bwaoloka ne maana. Twayuka’mba unemeka bingi bintu byo tumubila ne byo tubila bapopweshi bakwetu. Kabiji twayuka’mba Yehoba kimye kyonse ufweta bantu banji bakishinka.—Hebe. 11:6.

KECHI TWAYUKA BINTU BIKAMWEKA KESHA NE

12. Kwesakana na Yakoba 4:13, 14, ñanyi bintu byo twabula kuyuka?

¹² Tangai Yakoba 4:13, 14. Kishinka ke kya kuba’mba kechi twayuka bintu biketumwekela kesha ne. Mu ino ntanda yo tujimo, “bimye ne bintu bya kubula kuketekela” byakonsha kwitumwekela atweba bonse. (Sapwi. 9:11) Onkao mambo, kechi twakonsha kuyuka inge bintu byo tukeba kuba bikengila nangwa inge tukekala bomi pa kuba’mba tukobe byobyo bintu ne.

13. Kubula kuyuka bintu bikamweka kulutwe kwakonsha kwitulengela kumvwa byepi ku muchima?

¹³ Na mambo a kuba’mba kechi tuyuka bintu byakonsha kwitumwekela mu bwikalo bwetu ne, kino kitulengela kwikala bingi na bijikila. Mu ñanyi jishinda? Twakonsha kwakamwa na mambo a bintu byakonsha kwitumwekela mu bwikalo kabiji kino kyakonsha kwitulengela kubula kwikala na lusekelo. Bya malwa ne bintutu bikwabo bitumwekela kwakubula kuketekela byakonsha kwitulengela kwikala na bulanda ne kulefulwa. Kabiji inge bintu byo twabujilenga kuketekela byabula kufika, twakonsha kulefulwa bingi.​—Maana 13:12.

14. Lusekelo lwetu lwa kine lwaimena pa ka? (Monai ne bipikichala.)

¹⁴ Inge twachinchika makatazho, tumwesha patoka kuba’mba twingijila Shetu wa mwiulu na mambo a kuba’mba twamutemwa kechi na mambo a bintu byakonsha kwitumwekela mu bwikalo bwetu ne. Mashimikila avula a mu Baibolo amwesha’mba kechi twakonsha kuketekela Yehoba kwituzhikijila ku makatazho etu onse ne. Kabiji twafwainwa kuyuka’mba Yehoba kechi watanchikila jimo bintu biketumwekela mu bwikalo bwetu ne. Yehoba wayuka’mba lusekelo lwetu kechi lwaimena pa bintu biketumwekela kulutwe ne. Pakuba lusekelo lwetu lwaimena pa kulondela lutangijilo lwanji ne kumukookela. (Yele. 10:23) Inge ke tulombe kwi Yehoba kuba’mba etukwashe kufuukula bintu bulongo, kijitu nobe tubena kwamba’mba: “Inge Yehoba waswa tukekale bomi, tukoba kikye nangwa kyokya.”​—Yako. 4:15.

15. Ñanyi bintu byo twayuka pa bintu biji kulutwe?

¹⁵ Nangwa kya kuba kechi twayuka bintu byakonsha kwitumwekela mu bwikalo bwetu ne, pano bino twayuka’mba Yehoba witulaya bumi bwa myaka ne myaka, mwiulu nangwa pano pa ntanda. Twayuka kuba’mba Yehoba kechi ubepa ne, kabiji kafwako kintu kyakonsha kumulengela kukankalwa kufikizha milaye yanji yonse ne. (Titu. 1:2) Yehoba ye yenkatu wakonsha ‘kwambila jimo bintu bikamweka kulutwe, kabiji kufumatu ne kala kene, wamba bintu bikyangye kumweka.’ Bintu byo aambijile jimo kuba’mba bikamweka mu moba a kala, byamwekele. Kabiji bintu byo aambila jimo kuba’mba bikobiwa kulutwe, kine bikafika. (Isa. 46:10) Kabiji twayukishatu bulongo kuba’mba kafwako kintu nangwa kimo kyakonsha kulengela Yehoba kuleka kwitutemwa ne. (Loma 8:35-39) Kabiji inge ketupite mu makatazho, Yehoba uketutekeneshanga, kwitupa maana ne bulume bwa kuchinchika makatazho onse o twakonsha kupitamo. Twashiinwa’mba Yehoba uketukwashanga ne kwitupesha.​—Yele. 17:7, 8.

KECHI TWAKONSHA KUMVWISHA YEHOBA BYO ETUYUKA NE

16. Kwesakana na Salamo 139:1-6, ñanyi bintu byayuka Yehoba byo twakonsha kukankalwa kumvwisha?

¹⁶ Tangai Salamo 139:1-6. Mulenga wetu wayuka byo twalengwa, byo tuji, byo tumvwa ne byo tulanguluka. Wituta muchima kimye kyonse. Wayuka bintu byo twamba ne biji mu michima yetu. Kabiji wayuka bintu byonse byo tuba ne ene mambo o tubila byobyo bintu. Byonka byaambile Mfumu Davida, Yehoba wituyuka bulongo kabiji winengezha kwitukwasha kimye kyonse. Kitutundaika bingi kuyuka’mba Nkambo Mfumu kabiji Mulenga walengele jiulu ne ntanda, wituta muchima kimye kyonse. Davida waambile’mba: “Bintu byo mwayuka pe amiwa byankumisha bingi. Kechi nakonsha kwibyumvwisha ne.”—Sala. 139:6, tubyambo twa munshi.

17. Mambo ka o kyakonsha kwitukatezha kuswa kuba’mba Yehoba wituyuka bulongo?

¹⁷ Kampe na mambo a nkomeno yetu, bisho nangwa bintu byo twaitabilamo, kyakonsha kwitukatazha kuyuka’mba Yehoba ke Shetu wa butemwe wituta bingi muchima. Nangwa kampe na mambo a bintu byatama byo twaubile kala, twakonsha kutendeka kulanguluka’mba Yehoba uji kwalepa ne atweba kabiji kechi witutemwa ne. Abino byo byaumvwanga ne Davida pa bimye bimo. (Sala. 38:18, 21) Nangwa kampe muntu ubena kwibikako kupimpula bwikalo bwanji ne kwikela mwayila mizhilo ya Lesa yaoloka wakonsha kutendeka kulanguluka’mba, ‘Inge Lesa wangyuka bulongo, mambo ka o akebela’mba mpimpule bwikalo bwami saka ayuka’mba kyakatazha kuba bino?’

18. Tumwenamo byepi inge twayuka’mba Yehoba wituyuka bulongo kukila byo twiyuka atwe bene? (Monai ne bipikichala.)

¹⁸ Twakonsha kuswa kuba’mba Yehoba wituyuka bingi bulongo kukila byo twiyuka atweba bene, kabiji wakonsha kumona byawama mwi atweba byo twakonsha kukankalwa kumona atwe bene. Nangwa kya kuba tulubankanya, Yehoba witutemwa kabiji umona byo twibikako kuba byawama pa kuba’mba tumutokeshenga ku muchima. (Loma 7:15) Inge twayuka kuba’mba Yehoba umonamo bintu byawama mwi atweba, kino kyakonsha kwitulengela kumwingijila mu bukishinka ne na lusekelo.

19. Ñanyi bintu byo twayuka pe Yehoba?

¹⁹ Twayuka kuba’mba Yehoba ye butemwe. Abino byo byo aji kabiji kechi tuzhinauka ne. (Yoa. 4:8) Twayuka’mba mizhilo yanji imwesha’mba witutemwa bingi kabiji wituta muchima kimye kyonse. Twayuka’mba Yehoba ukeba’mba tukekale na bumi bwa myaka ne myaka. Wanengezhezhe bukuzhi pa kuba’mba tukekale na bumi bwa myaka ne myaka. Bukuzhi bwitulengela kushiinwa’mba twakonsha kwingijila Yehoba nangwa kya kuba twi bambulwakulumbuluka. (Loma 7:24, 25) Kabiji twayuka’mba “Lesa wakila michima yetu kabiji wayuka bintu byonse.” (1 Yoa. 3:19, 20) Yehoba wayuka bintu byonse pe atweba kabiji wayuka’mba twakonsha kuba kyaswa muchima wanji.

20. Ñanyi kintu kiketukwasha kubula kukizhamo kwikala na bijikila?

²⁰ Yehoba witubuula bintu byonse byo twafwainwa kuyuka. Inge twaswa kino kishinka, kechi tukakizhangamo kwikala na bijikila pa bintu byo twakonsha kukankalwa kuba ne, pakuba tukatangatu muchima pa bintu byanema. Kuba bino kukamwesha’mba twaketekela na muchima wetu yense mwi Yehoba, “walumbuluka mu kuyuka bintu byonse.” (Yoba 36:4) Nangwa kya kuba kechi twakonsha kuyuka bintu byonse pa kino kimye ne, bino tubena kutengela kimye Lesa wetu kyo aketufunjishanga bintu bya katataka pe aye.​—Sapwi. 3:11.