Nayukile kyo Nafwainwa Kubanga mu Bwikalo

BA JOSÉ byo bajinga na myaka ya kusemwa 11 bayile ku Santo Domingo, bapolishanga masapato a bantu ne kupotesha aishi kilimu ne maolenji pa kuba’mba bamone mwa kwikela. Byo bakomeneko bayukanyikilwe kuba’mba bengila bingi na ngovu. Byo papichile myaka, bakolojabo babalume, Bakamonyi ba kwa Yehoba bebambijile kuba’mba baye na kwibamwenako nzubo. Mu kibamba mwakujila, ba José bamwenemo buku wa kuba’mba, Kuti Waikala Kuli Pe na Pe muli Paradise Pe Sonde, ne kumutanga yense bufuku. Ponkapotu bayukile kuba’mba batana byo bafwainwa kubanga mu bwikalo bwabo.

Pa mulungu ba José bayile na kupwila pa Nzubo ya Bufumu yajinga pepi ne kwibabula’mba ne amiwa ne Kamonyi wa kwa Yehoba. Babujile balongo amba nafunda kuba’mba nafwainwa kutanwanga ku kupwila ne kuyanga na kusapwila. Kabiji bebabujile ne kuba’mba batanga buku yense wa Kuti Waikala Kuli pe na Pe, kabiji bafunda bintu bena Kilishitu byo bafwainwa kubula kuba, ne kuba’mba abo kechi boba bino bintu ne. Byo papichile moba 15 ba José bebaswishishe kwikala basapwishi babula kubatizhiwa. Babatizhiwe byo papichile bañondo batanu na umo saka baji na myaka ya kusemwa 21.

Ba José nkito yo baingilanga ibalengelanga kushala ku kupwila, onkao mambo bafukwilepo kwiileka ne kutwela nkito yo bafolanga mali atwelangamo jina mu mali o bafolanga ku nkito yo balekele. Ino nkito ibalengejile kwikala na kimye kya kutanwa ku kupwila ne kwingila bupainiya bwa kimye kyonse. Mu kuya kwa moba basongwele ne kusema baana babalume babiji. Popo balekele kwingila mwingilo wa bupainiya.

Ba José bafunjisha baana babo bukine kufumatu ku bulukeke. Onkao mambo bakazhi babo ba Josefina byo bajinga na jivumo ja bañondo basatu ja bubeji, ba José batanganga buku wa Buku Wami wa Mashimikila a mu Baibolo na jiwi ja peulu, balangulukanga’mba mwana munda ubena kumvwa. Kimye mwanabo Noé kyo asemenwe, ba José bapwishishe kumutangila buku yense. Byobyo baubile ne na mwanabo wa bubiji aye Neftali.

Mu kuya kwa moba ba José baikele bakulumpe bamingilo ku kampanyi ko bafolanga mali avujile bingi, mwatwelanga bimye jikumi mali o bafolanga ku nkito yo balekele. Nangwa byonkabyo, mu 2008 baana babo byo bafikizhe myaka ya kusemwa 10 ne 13, bafukwilepo kufuma pa bukulumpe bwa nkito kuba’mba batendeke kwingila bupainiya jikwabo. Pano luno batendekele kwingijila pamo na bakazhi babo ne baana babo. Na mambo a kuba’mba mali abweleleko panshi, bonse mu kisemi bakepesheko bya kupotapota. Bonse baana batendekele kufunjisha bantu 30 Baibolo pa ñondo pa ñondo. Yesu witulaya kuba’mba inge twatwajijila kutangizhako Bufumu, Yehoba uketupesha bingi. (Mat. 6:​33) Ba José ne kisemi kyabo baketekela mu uno mulaye kabiji bemwena kuba’mba Yehoba ufikizha milaye yanji.