Baibolo Wakosa Bingi

BAKAMONYI BA KWA YEHOBA batemwa bingi Baibolo kukila mabuku onse. Tumwingijisha kimye kyonse pa kufunda ne pa kufunjisha bantu mambo awama a Bufumu bwa Lesa. (Mat. 24:14) Onkao mambo, balongo bamwene kuba’mba mu 2013 bafwainwa kulenga Baibolo wa Binembelo bya Ntanda Ipya wa Kizungu wakosa bingi kabiji wawama.

Balongo bengijila kobapulinchila mabuku ku Wallkill, mu New York, ku U.S.A., besambile pa bikekala Baibolo wakatataka na mukulumpe wa kampanyi kalenga mabuku. Uno mukulumpe wa kampanyi waambile’mba: “Baibolo ye mubena kukeba ufwako.” Kabiji wanungilepo’mba: “Kyatamakotu ke kya kuba’mba ma Baibolo avula amwekatu bulongo inge aji pa tebulu nangwa mu shelufu, pano bino kechi akosa ne.”

Ma Baibolo atanshi a Binembelo bya Ntanda Ipya kechi akosele ne. Onkao mambo, balongo bengijila kobapulinchila mabuku ku Wallkill bapesele pesele bulongo bya kwingijisha pa kuba’mba balenga Baibolo wakosa ye bakengijishanga pa kimye kyabaya mu mapunzha apusana pusana. Kwesakana na byo bataine, balengele ma Baibolo apusana pusana o bapaine ku Bakamonyi ba mu byalo byavula muji nkiilo yapusana pusana.

Byo papichile bañondo batanu na umo ano ma Baibolo beabwezhezhe, kabiji balengele akwabo akosa kukila atanshi ne kwiatuma na kwieseka. Ma Baibolo onse o batumine kuba’mba beeseke ajinga 1,690. Ma Baibolo amo beesekele mu byo akonsha kwikala inge kwamweka mapuso. Baibolo umo bamupichilepo ku motoka, mukwabo bamushile bufuku bonse pa mvula, mukwabo bamwabikile mu mema a mvula wa kinkunkwila.

Mu 2011 byo baesekele ano ma Baibolo, bapotele minkinyi ilenga mabuku avula mu kimye kicheche ya kwingijisha ku Wallkill ne ku Ebina ku Japan. Pa kulupula kutanshi kwa uno Baibolo, kechi twakebelengatu kulenga avula ne, bino kyo twakebelenga ke kulenga ma Baibolo amwekatu kimotu nangwa kya kuba beapulinta ku mapunzha apusana pusana.

Nkupiko Yakokobelenga

Na kuntendekelo ya mwaka wa 2012, ku ano mapunzha abiji ko bapulinchila mabuku batendekele kulenga Baibolo wa Binembelo bya Ntanda Ipya walupwilwe mu 1984 kwingijisha nkupiko yakatataka. Bino pa kwialenga, ino minkinyi yakatataka yaingijishe gulu ne kakisapi ko balamika mu nkupiko, kino kyalengejile nkupiko kukokobala mambo kechi beyesekele ne. Onkao mambo balekele kwialenga.

Umo ulenga nkupiko waambile kuba’mba twayuka kilengela nkupiko ya yanekena kukokobala, pano bino kechi twayuka bya kupwisha luno lukatazho ne. Bino kechi basajilepo kulenga nkupiko yakosakana ne. Balongo bakebeshe bingi kulenga Baibolo wa nkupiko yanekena, yakosa kabiji imweka bulongo. Nobe pepi na bañondo bana, baesekele nkupiko yapusana pusana yo balengele na gulu ne tubisapi twakubika mu nkupiko twapusana pusana. Basajilepo ndengelo imo yalengejile batendeka kulenga jikwabo ma Baibolo aji na nkupiko yanekena ibula kukokobala.

Banengezhe kuba’mba Baibolo wa Binembelo bya Ntanda Ipya bakamulupule pa 5 October mu 2013 pa kupwila kwa mwaka kwa Watch Tower Bible and Tract Society of Pennsylvania. Bengijila ko bapulinchila mabuku bebatumijile Baibolo pakompyuta pa Kitanu pa 9 Aungust 2013, batendekele kupulinta juba jalondejilepo. Baibolo mutanshi bamulengele pa 15 August. Kukila pa milungu itanu na ibiji, minkinyi ipulinta mabuku ku Wallkill ne ku Ebina yaingijilenga mute ne bufuku pa kuba’mba balenge ma Baibolo 1,600,000 pa kuba’mba bonse bakatanwa ku kupwila kwa mwaka bakatambule.

Nangwa kya kuba uno Baibolo wawama kabiji wakosa bingi, bino byambo bijimo bikalengela bantu kupuluka byo byakilamo buya. Nyenga umo mu United States juba jo atambwile Baibolo wakatataka waambile’mba: “Uno Baibolo wakatataka wandengela kumvwisha biji mu Baibolo.”