BYAMWEKELE MWAKA WAPWA
Kupwila kwa Katataka kwa Bwikalo ne Mwingilo Wetu wa Bwina Kilishitu
PA KUPWILA kwa pa mwaka kwa ba Watch Tower Bible and Tract Society of Pennsylvania kwajingako pa 3 October, 2015, Mulongo Anthony Morris wa mu Jibumba Jitangijila wabijikile kuba’mba kupwila kwa Sukulu wa Mwingilo wa Lesa, Kupwila kwa Mwingilo, ne Lufunjisho lwa Baibolo lwa Kipwilo kusakuleka kwikalako, kabiji pasakupingakena Kupwila kwa Bwikalo ne Mwingilo Wetu wa Bwina Kilishitu. Mulongo Morris walumbulwile ne kuba’mba Mwingilo Wetu wa Bufumu kechi ukekalangako ne, bino tukekalanga na kabuku ko tukatambulanga pa ñondo pa ñondo katelwa’mba Kabuku ka Kupwila kwa Bwikalo ne Mwingilo Wetu wa Bwina Kilishitu, kaji na mapa 8 mukekalanga ne bipikichala. Mu kano kabuku mo mukekalanga mutanchi wa kupwila konse ne bipikichala bya kwitukwasha kumwenangamo kimye kyo tubena kutanga Baibolo pa bunke.
Kuno kupwila kwa katataka bekwabanya mu bipungu bisatu:
Bya Buneme Biji mu Mambo a Lesa. Lubaji lutanshi mu kino kipungu ke jashi ja maminiti 10 jaimena pa kutanga Baibolo kwa yewo mulungu ne pa bipikichala biji mu kabuku ka kupwila. Lubaji lwa bubiji ke “Kukeba Bishinka Bikwabo Byanema.” Luno lubaji lwa maminiti 8 kabiji ke lwa mepuzho ne mikumbu kufuma mu kutanga Baibolo kwa mu yewo mulungu, apa bino palondela kutanga Baibolo kwa maminiti ana.
Taiko Muchima ku Mwingilo wa Kusapwila. Mu kino kipungu, baana ba sukulu basatu bamwesha bya kufunjisha bantu pa kimye kitanshi kyo twibataana mu busapwishi, pa kubwelako, ne kimye kyo tubena kwibafunjisha Baibolo.
Byafwainwa Kwikala Bena Kilishitu. Mu kino kipungu muji majashi a kwitukwasha kwingijisha mafunde a mu Baibolo mu bwikalo bwetu. Lubaji lukwabo mu kuno kupwila ke Lufunjisho lwa Baibolo lwa Kipwilo lwa mepuzho ne mikumbu.
Basapwishi mwaya ntanda basanta bingi pa byo babena kufunda mu kuno kupwila kwa katataka. Mulongo wa ku Australia wanembele’mba: “Kupwila kwa Bwikalo ne Mwingilo kwawama bingi. Kuno kupwila kwamba kikatakata pa bintu byo tupitamo mu bwikalo, kabiji byambo bijimo kechi byakatazha kumvwa ne. Kupwila kwenda bingi bukiji, mambo mbaji yaipipa, ishinkamanatu pa kishinka, kabiji itundaika bingi, kikatakata mavidyo ne mbaji ivwangamo baana.”
Jibumba ja bakulumpe mu kipwilo ku Italy janembele’mba: “Twamona kuba’mba kupwila kwa katataka kubena kwitutundaika atweba bonse kunengezha bulongo, kabiji kyafumamo, twawamishako mfunjishisho yetu. Kupwila kwa katataka kwa mukachi ka mulungu ke jishinda jawama bingi Yehoba mo abena kufunjishisha bantu banji. Musapwishi uji na myaka ya kusemwa 15 waambile’mba: ‘Kala kyankatazhanga bingi kutako muchima ku kupwila konse. Pano kupwila kwa katataka kwankwasha kutako bingi muchima ne kunengezha bulongo saka nkyangye kuya na kupwila.’”
Kisemi kimo ku Austria kyanembele’mba: “Kutanga Baibolo kwa mu mulungu kwitukatazhanga bingi kutangila pamo na mwanetu wamukazhi wa myaka 10. Bino kipungu kya ‘Bya Buneme Biji mu Mambo a Lesa’ kitutundaika kukumbulapo kwa kubula kukankazhama. Atweba bonse basatu twiyowa bingi kunengezhezha pamo kutanga Baibolo kwa mulungu. Kyakilamo kuwama, tubena kwimwena mwanetu byo abena kuyilako palutwe mu mwingilo wa Lesa.”
Ba Ines ba ku Germany balumbulwile’mba: “Ntundaikwa bingi inge mbena kunengezha kupwila ne kulanguluka langulukapo pa byo tukafunda. Kala kechi nakebakebanga bishinka byavula ne. Luno bulunda bwami ne Yehoba bwakoselako. Ntanda ya kwa Satana inkookesha bingi. Bino, kupwila kunkosesha ne kunkwasha kutwajijila kwingijila Lesa.”
Bipwilo biji pa makuji a Solomon Islands bibena kwiyowa bingi kupwila kwa katataka kwa mukachi ka mulungu kabiji babena kwibikako bingi pa kuba’mba bamwenengamo. Bipwilo byavula biji mu mapunzha a kwalepa kwabula malaichi nangwa Intaneti, kabiji balongo banjimi. Boba byepi pa kuba’mba bekale na biñambañamba bya kutambishapo mavidyo ne kukopolola mavidyo a kwingijisha pa kupwila pa ñondo pa ñondo? Basapwishi mu kipwilo kimo pa jikuji ja Malaita bafuukwilepo kwingijila pamo ne kupotesha bipangwa bya koko (coconut) byauma. Bapaine mali ku kipwilo pa kuba’mba bapote kiñambañamba kya kutambishapo mavidyo kwingijishatu malaichi a sola. Kabiji pa kuba’mba bakopolole mavidyo a kutambisha pa ñondo pa ñondo, balongo baya ku mpunzha kuji Intaneti, apa bino bapako ne balongo mu kipwilo.
Mulongo umo ku United States wanembele’mba: “Kimpelela bingi kufunda inge mbena kutamba mavidyo ne bipikichala. Pa myaka 40 yapitapo kyankatazhanga kukwatakanya bintu. Napitulukangamo bimye byavula bingi pa kuba’mba nkwatakanye kishinka kyo nakonsha kulumbulwila muntu mukwabo. Onkao mambo, mbena kusanchila bingi Jibumba Jitangijila pa mavidyo ne bipikichala byo banengezha. Mavidyo alumbulula mabuku a mu Baibolo awama bingi, kabiji bipikichala bikala mu kabuku ka kupwila binkwasha bingi kumvwisha. Kyamwekeshatu patoka kuba’mba Yehoba ubena kupesha mingilo ya bantu banji. Nasanta bingi.”
Malawi