Bena Kilishitu ne Nkondo—Baibolo Waambapo’mba Ka?

Nkondo iji mu kyalo kya Ukraine yamwesha’mba bantangi bavula ba bupopweshi bwa bwina Kilishitu batundaika nkondo. Akimonai bantangi ba bupopweshi byo babena kutundaika nkondo:

• Pa March 16, 2022 pepala wa byambo wa The Jerusalem Post waambile’mba Metropolitan Epiphanius I wa mu Kyiv waambile’mba: “Munema mukatampe ne lusanchilo biye ku bashilikale babena kuzhikijila kyalo kyetu kya Ukraine ku babena kwitumanyika . . . Twimuta bingi muchima ne kwimulombelako kufuma panshi ya michima yetu kabiji tubena kwimutundaika.”

• Pa April 3, 2022 kipamo kya Reuters kyaambile’mba: “Mukulumpe wa chechi ya Orthodox mu kyalo kya Russia wasambakene pamo na bashilikale pa juba ja pa Mulungu ne kwibatundaika kuzhikijila kyalo kyabo byo bakitwajijila kulwa nkondo mu kyalo kya Ukraine.”

Nanchi bena Kilishitu bafwainwa kulwako nkondo nyi? Baibolo waambapo’mba ka?

Byaamba Baibolo

Baibolo umwesha’mba bantu balondela Yesu Kilishitu kya kine kechi bafwainwa kwivwanga mu nkondo ne.

• “Bwezha mpoko yobe mu kikwa, mambo bonse basenda mpoko bakafwa ku mpoko.”—Mateo 26:52.

  Nanchi muntu utundaika nangwa kulwa nkondo ukookela byaambile Yesu nyi?

• “Mbena kwimupa mukambizho mupya, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.”—Yoano 13:34, 35.

  Nanchi muntu utundaika nkondo umwesha butemwe bwaambilepo Yesu buyukanyikisha baana banji ba bwanga nyi?

Pa kuba’mba mufunjilepo byavula, tangai kibaaba kya mu Kizungu kya kuba’mba “Is War Compatible With Christianity?”

Bena Kilishitu ne nkondo lelo jino

Nanchi kyailamo bena Kilishitu kubula kwivwanga mu nkondo lelo jino nyi? Ee. Baibolo waawijile jimo’mba mu kino kimye kitelwa’mba “mu moba a kupelako” mukekala bantu bakafuma mu byalo byonse bakabulanga ‘kufunda kulwa nkondo’ kwesakana na byafunjishanga Yesu—Isaya 2:2, 4, tubyambo twa munshi.

• Pa kuba’mba mufunjilepo bikwabo, tangai bibaaba byalondankana biji mu Kyamba kya Usopa bya kuba’mba “Lesa Umona Byepi Nkondo?”

Katatakatu Yehoba,a “Lesa wa mutende” akengijishe kafulumende wanji wa mwiulu kupokolola bantu “ku lumanamo ne ku bukapondo.”—Filipai 4:9; Salamo 72:14.

• Pa kuba’mba muyuke byo akoba bino, tambai vidyo wa kuba’mba Bufumu bwa Lesa bo bu ka?