Bantu Bavula Baketekela’mba Bintu Bisakuwama Bingi mu Mwaka wa 2023—Baibolo Waambapo’mba ka?

Byo twatwela mu mwaka wa 2023, atweba bonse tubena kukebesha kuba’mba twiyowe bintu byawama na bisemi byetu. Pano mambo ka o twafwainwa kuketekela’mba bintu bikawama bingi kulutwe?

Baibolo witukwasha kwikala na luketekelo

Baibolo waamba’mba makatazho onse o tubena kupitamo luno a pa kakimyetu kacheche kabiji katatakatu apwe. O ene mambo Baibolo ‘bamunembele’mba tufunjileko kuba’mba mu. . . lutekenesho lwa mu Binembelo twikale na luketekelo.’—Loma 15:4.

• Pa kuba’mba mufunjilepo byavula pa milaye iji mu Baibolo, tangai kibaaba kya mu kizungu kya kuba’mba “A Real Hope for a Better Tomorrow.”

Luketekelo lwafwainwa kwimukwasha luno

Luketekelo lo baambapo mu Baibolo belwesakanya ku “kimiko kya bwikalo bwetu.” (Bahebelu 6:19, tubyambo twa munshi) Aluno luketekelo lwafwainwa kwitukwasha kushikimana. Lwitukwasha kuchinchika makatazho o tubena kupitamo luno ne kwitukwasha kubula kuta muchima pa makatazho ne kwitukwasha kwikala na lusekelo. Bintu byafwainwa kwimukwasha:

• Monai kuketekela mu byaamba Baibolo byo kwakwashishe mwanamulume umo wajinga kitomi. Tambai vidyo wa kuba’mba Bwikalo Bwami Bwatamine Bingi.

• Imwenai Baibolo byo afwainwa kwitukwasha mwa kubila inge twafwisha mulongo wetu nangwa mulunda netu. Tambai vidyo wa kuba’mba Tekeneshainga Boba Bafwisha Mutemwe Wabo.

Koseshai luketekelo lwenu

Bantu bavula batengela kumona bintu byawama bingi, bino bazhinauka umvwe byakonsha kufika nangwa ne. Pakuba bitulaya Baibolo byapusana bingi. Mambo ka? Mambo milaye iji mu Baibolo yafuma kwi Yehoba Lesaa mwine, yenka “ubula kubepa.” (Titusa 1:2) Yehoba ye yenkatu uji na bulume bwa kufikizha bintu byonse byo alaya mambo “uba bintu byonsetu byo akeba kuba.”—Salamo 135:5, 6.

Tubena kwimutundaika’mba fundai pa milaye iji mu Baibolo mambo yo yonkatu yafwainwa kwimukwasha kwikala na luketekelo lwa kine. Mwakonsha kukosesha luketekelo lwenu mu milaye iji mu Baibolo kupichila mu “kubalaula bulongo Binembelo.” (Byubilo 17:11) Inge mukeba kufunda Baibolo kyatutu, nembai pa keyala wetu kuba’mba mukeba kufunda Baibolo. Mu uno mwaka wa 2023, tai muchima pa bintu byawama!