Mambo Ka Mu Ntanda Kyo Mwavujila Lupato?—Baibolo Waambapo’mba Ka?

Masawakya avula abena kwambatu pa lupato, bumbanzhi, makondo ne kumanyika nangwa kwipaya bantu bamutundu ungi.

• Pa 15 November 2023 pepala wa byambo wa The New York Times waambile’mba: “Nkondo ibena kulwa kyalo kya Israel na kyalo kya Gaza yalengela bantu bavula kuba misalululo pa intaneti.”

• Pa 3 November 2023 bakulumpe ba United Nations General Assembly abo ba Dennis Francis baambile’mba: “Kutendeka pa 7 October, misalululo ne bukapondo byavujilako.”

Misalululo, bukapondo ne nkondo byatendekele kala. Baibolo waamba’mba bantu bajingako kala “[Bashikilenga] byambo byabo byatama nobe miketo” kabiji batemenwe bukapondo ne kulwa nkondo. (Salamo 64:3; 120:7; 140:1) Baibolo waamba’mba kwishikwa kujiko lelo jino kulumbulula bintu byanema.

Lupato—Kiyukilo kya bimye byo tujimo

Baibolo watongola bintu bibiji byalengela lupato kuvula lelo jino.

1. 1. Baibolo waambijile jimo kimye “butemwe bwa bavula [kyo] bukakepa.” (Mateo 24:12) Bantu kechi baketemwa ne, pakuba bakeshikwa abo bene na bene.—2 Timoti 3:1-5.

2. 2. Lupato lumwesha byubilo byatama biji na Satana Diabola. Baibolo waamba’mba “pano pa ntanda ponse paji mu bulume bwa kwa aye mubi.”—1 Yoano 5:19; Lumwekesho 12:9, 12.

Kabiji Baibolo waamba’mba katatakatu Lesa akafumyepo bintu bilengela kwishikwa. Kabiji ukabuka bantu babena kumanama na mambo lupato. Baibolo walaya kuba’mba:

• Lesa “ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”—Lumwekesho 21:4.