Bintu Byafwainwa Kwimukwasha Kwikala na Lusekelo Inge Bintu Bimukatazha—Baibolo Waambapo’mba ka?

Mu bino bimye byakatazha, kechi tuji na bulume bwa kuchinuzhuka bintu byonse bitumwekela ne. Pano bino, lusekelo lwetu lwaimena pa mo tumwena bintu kechi pa makatazho o tupitamo ne. Kabiji Baibolo waamba’mba “awa uji na muchima wa lusekelo utwajijilatu na kusangalala” nangwa kya kuba ubena kupita mu makatazho akatampe. (Byambo bya Maana 15:15) Nanchi twafwainwa kuba byepi pa kuba’mba twikale na lusekelo mu bwikalo bwetu? Monai byaamba Baibolo pa byafwainwa kwimukwasha kwikala na lusekelo.

Bya kuba na bijikila

Baibolo witubuula’mba: “Bijikila biji mu muchima wa muntu byo bilengela muchima kupopomenwa, pakuba byambo byawama bimusangajika.”—Byambo bya Maana 12:25.

• Baibolo wafwainwa kwimukwasha kuyuka mwa kubila na bijikila ne kubula kukizhamo kwikala na bijikila. Pa kuba’mba muyuke byo mwafwainwa kuba, tangai kibaaba kya kuba’mba “Byambapo Baibolo pa Bijikila.”

Bya kupwisha mukose

Baibolo waamba’mba: “Mulunda wa kine umwesha butemwe kimye kyonse, kabiji ye mulongo ye wakonsha kuketekela mu kimye kya bya malwa.”—Byambo bya Maana 17:17.

• Mu Baibolo muji mafunde afwainwa kwimukwasha kutaana balunda ba pa muchima bafwainwa kwimukwasha kukepeshako mukose. Tangai kibaaba kya kuba’mba “Lengai Balunda ne Kushinda Mukose—Baibolo byo Akonsha Kwimukwasha.”

Temwai Lesa ne bantu

Baibolo witubuula’mba: “Wafwainwa kutemwa Yehoba Lesa wobe na muchima wobe yense, ne na mweo wobe yense ne na maana obe onse. . . . Wafwainwa kutemwa mukwenu byonka byo witemwa obe mwine.”a—Mateo 22:37-39.

• Kulomba kwitukwasha kutemwa bingi Lesa. Pa kuba’mba muyukilepo byavula, tangai kibaaba kya kuba’mba “Nanchi Lesa Umvwa Milombelo Yetu Nyi?”

• Tumwesha’mba twatemwa bakwetu inge ke tulondele jishinda Yesu jo aubilangamo na bantu. Monai kibaaba kya kizungu kya kuba’mba “What Is the Golden Rule?”

Inge mubena kukeba kufunjilapo byavula pa Baibolo byo afwainwa kwimukwasha kwikala na lusekelo inge bintu bimukatazha mu bwikalo bwenu. Pa kuba’mba muyuke ene mambo o mwafwainwa kubila bino, tubena kwimutundaika kufundanga Baibolo.