Nanchi Bakamonyi ba kwa Yehoba Bena Kilishitu Nyi?

Ee. Twi bena Kilishitu na mambo a bino bishinka byalondelapo:

• Twibikako kulondela byubilo bya kwa Yesu Kilishitu ne byo afunjishanga.—1 Petelo 2:21.

• Twaitabila kuba’mba mwi Yesu mo monkatu mukeshila lupulukilo,“kechi lukeshilapo mu muntu mukwabo ne, kabiji kafwako jizhina jikwabo pano pa ntanda Lesa jo asalulula mu bantu ja kwitupulushishamo ne.”—Byubilo 4:12.

• Inge bantu baikala ke Bakamonyi ba kwa Yehoba, babatizhiwa mu jizhina ja kwa Yesu.—Mateo 28:18, 19.

• Tulomba kupichila mu jizhina ja Yesu.—Yoano 15:16.

• Twaitabila kuba’mba Yesu ye Mutwe, nangwa’mba yeye bapa lūsa pa mwanamulume yense.—1 Kolinda 11:3.

Nangwa byonkabyo, twapusanako na bupopweshi bukwabo butelwa mba bwa bena Kilishitu. Kya kumwenako, twaitabila kuba’mba Baibolo ifunjisha’mba Yesu Mwana Lesa, kechi ambauji mu Balesa basatu ne. (Mako 12:29) Twaitabila’mba mweo ufwa, kabiji kafwako Binembelo byamba’mba Lesa uyanjisha bantu mu mujilo wa helo myaka ne myaka ne, nangwa’mba aba batangijila bupopweshi bafwainwa kwibapa mazhina a mushingi a kwibalengela kumweka nobe banema kukila bakwabo ne.—Musapwishi 9:5; Ezikyo 18:4; Mateo 23:8-10.