Mambo ka kyo Mubujila Kutelela Mpunzha ko Muya na Kupwila Amba Chechi?

Kyambo kya Kingiliki kiji mu Baibolo kimo kimye kituntululwa amba “chechi.” Kino kyambo kilumbulula jibumba ja bapopweshi, kechi kishimikwa ne.

Akimonai kino: Kimye mutumwa Paulo anembejile nkalata bena Kilishitu mu Loma ne kwimuna bamulume ne mukazhi abo ba Akwila ne Pilisila waambile’mba: “Imunai ne [chechi] ipwila mu nzubo yabo.” (Loma 16:​5, Contemporary English Version) Paulo kechi waimwinenga kishimikwa ne. Bino waimwinenga bantu bapwilanga mu yoya nzubo.a

Atweba kechi tutela mpunzha ya kupopwelamo amba chechi ne. Twiitela amba “Nzubo ya Bufumu.”

Mambo ka kyo itelelwa’mba “Nzubo ya Bufumu ya Bakamonyi ba kwa Yehoba”?

Kino kyambo kyailamo bingi, mambo:

• Kishimikwa ke nzubo nangwa mpunzha mo tukonkena na kupopwela.

• Tupwila pamo na kupopwela Yehoba Lesa ye baambapo mu Baibolo, ne kumushimuna, ko kuba’mba kumuyukanyikisha byo aji.​—Salamo 83:18; Isaya 43:12.

• Kabiji tupwila pamo na kufunda pa mambo a Bufumu bwa Lesa bwaambilepo Yesu.​—Mateo 6:​9, 10; 24:14; Luka 4:43.

Mwakasuluka kuya ku Nzubo ya Bufumu iji kwipi na ko mwikela ne kwimwena anweba bene Bakamonyi ba kwa Yehoba byo bapwila.