Nanchi Yesu Wasongwele Nyi? Nanchi Yesu Wajinga na Bankasanji Nyi?

Mukumbu wa mu Baibolo

Baibolo waamba’mba, Yesu kechi wasongwele ne, nangwa kya kuba Baibolo kechi waambapo mu kushinkamika pa uno mutwe ne.a Akimonai bishinka biji panshipo.

1. Baibolo waambapo bingi javula pa kisemi kya kwa Yesu ne pa banabakazhi bamulondelanga mu mwingilo wanji ne bantu bamweneko kimye kyo bamwipayile, pano bino Baibolo kechi waambapo’mba wajinga na mukazhi ne. (Mateo 12:46, 47; Mako 3:31, 32; 15:40; Luka 8:2, 3, 19, 20; Yoano 19:25) Ene mambo Baibolo o abujila kwambapo pa uno mutwe ke a kuba’mba kechi wasongwele ne.

2. Pa mambo a bantu babujile kusongola nangwa kusongolwa bakebelenga kwingilako pakatampe mwingilo wa Lesa, Yesu waambijile baana banji ba bwanga amba: “Awa wakonsha kwikala byonka bino [katanda nangwa muzhike], obe byonkabyo.” (Mateo 19:10-12) Waubile bino kuba’mba akwashe boba babula kukeba kusongola nangwa kusongolwa pa kuba’mba bengileko pakatampe mwingilo wa Lesa.—Yoano 13:15; 1 Kolinda 7:32-38.

3. Saka akyangye kufwa, Yesu waambilepo pa byo bafwainwe kulama bainanji. (Yoano 19:25-27) Umvwe Yesu wasongwele nangwa kwikala na baana, inge waambilepo byo bafwainwe kulama ba mu kisemi kyanji byonka byo aambile pa bainanji.

4. Baibolo waambapo pa banabalume byo bafwainwa kufunjilako kwi Yesu, pano bino kechi waambapo pa byo alaminenga mukazhanji ne. Pakuba Baibolo waamba’mba: “Anweba banabalume, temwainga bakazhi benu, byonkatu ne Kilishitu byo atemenwe kipwilo ne kwipana mwine na mambo a akyo.” (Efisesa 5:25) Umvwe Yesu wasongwele byo ajinga pano pa ntanda, nanchi inge kechi bamwambapo mu kino kyepelo amba wajinga mutwe wa kisemi nenyi?

Nanchi Yesu wajinga na bankasanji nyi?

Ee, Yesu wajinga na bankasanji batanu na umo. Bano bankasanji bajinga Yakoba, Yosefwa, Shimona, Yudasa ne banyenga yanji babiji. (Mateo 13:54-56; Mako 6:3) Bano bankasanji bebasemene kwi Maliya inanji Yesu ye basongwele kwi Yosefwa. (Mateo 1:25) Baibolo waamba pe Yesu amba ye wajinga “mubeji” wa kwa Maliya, kulumbulula’mba Maliya wajinga ne na baana bakwabo.—Luka 2:7.

Bintu bya bubela byamba bantu pa bankasanji Yesu

Bantu byo bakeba kukosesha mulanguluko wa kuba’mba Maliya kechi wasongwelwepo ne, bamo balumbulwila mungi kyambo kya kuba’mba “bankasanji.” Bamo bamba’mba bankasanji Yesu bajinga baana ba kwa Yosefwa bo asemejile ku mwanamukazhi mutanshi ye asongwele. Pano bino, Baibolo wamwesha’mba Yesu waikele nswanyi wa bufumu bo balayile Davida. (2 Samwela 7:12, 13; Luka 1:32) Umvwe Yosefwa wajinga na baana bakoma kukila Yesu, ko kuba’mba mubeji pa bano inge ye waikele nswanyi wa kwa Yosefwa.

Nanchi kino kyambo kya kuba’mba bankasanji kibena kulumbulula baana ba bwanga ba kwa Yesu nangwa’mba balongo banji ba mu lwitabilo nyi? Kino kishinka kyapusana na byaamba Binembelo, mambo Baibolo waamba’mba, kimye kimo “bankasanji kechi bamwitabijile ne.” (Yoano 7:5) Baibolo wamwesha’mba bankasanji Yesu ne baana banji ba bwanga bapusene.—Yoano 2:12.

Buku umo waamba’mba, bankasanji Yesu bajinga bavyala banji. Pano bino, Binembelo bya Kingiliki byaingijisha byambo byapusana bya kuba’mba ‘bankasanji,’ “balongo” ne ‘muvyala.’ (Luka 21:16; Kolose 4:10) Bashayuka bavula ba Baibolo baswa kuba’mba Yesu wajinga na bankasanji ba balume ne ba bakazhi. Buku umo wa The Expositor’s Bible Commentary waamba’mba: “Jishinda ja kuyukilamo kyambo kya kuba’mba ‘bankasanji’. . . ke ja kuba’mba kino kyambo kilumbulula baana ba kwa Maliya ne Yosefwa ne bankasanji Yesu Maliya bo asemene.”b