Bundengamambo bo bu ka?
Mukumbu wa mu Baibolo
Bundengamambo ke mambo alenga muntu nangwa’mba kuba bintu bifichisha Lesa ku muchima. Bundengamambo mwavwangwa kulala mizhilo ya Lesa na mambo a kuba bintu byatama bifichisha Lesa ku muchima. (1 Yoano 3:4; 5:17) Kabiji Baibolo walumbulula’mba bundengamambo ke kulala mizhilo ko kuba’mba kukankalwa kuba bintu byawama.—Yakoba 4:17.
Mu milaka ine itanshi mo banembejile Baibolo, kyambo kya bundengamambo kilumbulula “kutupila.” Jibumba ja bashilikale bamo mu bena Isalela kala, bayukile bingi kwasa mabwe na kinzhipunzhipu kya kuba’mba “kechi bakonsheshe kutupila ne.” Akino kyambo inge bekituntulula byonkatu byo kiji, twakonsha kwikitanga’mba “kechi bakalenga mambo ne.” (Mitonyi 20:16) Onkao mambo, bundengamambo bulumbulula kukankalwa kulondela mafunde a Lesa aoloka.
Byo aji Mulenga wetu, Lesa uji na luusa lwa kupana mafunde afwainwa kulondela bantu bonse. (Lumwekesho 4:11) Kabiji tuyuke’mba tuketotolwela kwi Lesa pa bintu byonsetu byatama byo tuba.—Loma 14:12.
Nanchi kyakonsheka kuleka kulenga mambo nyi?
Ine mwane kyakatazha. Kyakatazha mambo Baibolo waamba’mba “bonse baleenga mambo kabiji kechi bafika ku lukumo lwa Lesa ne.” (Loma 3;23; 1 Bamfumu 8:46; Musapwishi 7:20; 1 Yoano 1:8) Mambo ka o kitukatezha kuleka kulenga mambo?
Bantu batanshi ba Adama ne Evwa, patanshi kechi bajinga bandengamambo ne. Mambo bebalengele baoloka kabiji mu kipasha kya Lesa. (Ntendekelo 1:27) Nangwa byonkabyo, balekele kwikala baoloka mambo basatukijile Lesa. (Ntendekelo 3:5, 6, 17-19) Byo basemene baana, baana babo basambwileko bundengamambo ne kubula koloka kwi abo. (Loma 5:12) Mfumu Davida wa bena Isalela waambile’mba: “Amiwa nasemenwe mu bubi.”—Salamo 51:5.
Nanchi kuji mambo amo abaya kukila akwabo nyi?
Ee koaji. Baibolo waamba’mba banabalume bajinga mu Sodoma bajinga “bandengamambo bakijilemo kutama” mambo bubi bwabo ‘bwabayile bingi.’ (Ntendekelo 13:13; 18:20) Monai bino bintu bisatu bikwasha kuyuka’mba ao mambo abaya bingi.
Kubaya kwa mambo. Baibolo witukanya kulenga mambo akatampe nabiji bulalelale, kupopwela bankishi, kwiba, kupendwapendwa, kuja bya lunkanankana, kwipayañana ne kupopwela mipashi. (1 Kolinda 6:9-11; Lumwekesho 21:8) Baibolo wapusanya ano mambo na bantu bamba mu kupulumukatu, kulenga mambo kwa kubula kuyuka nabiji kwamba byambo byatama nangwa kuba bintu bikozha bakwetu ku muchima. (Byambo bya Maana 12:18; Efisesa 4:31, 32) Nangwa byonkabyo, Baibolo witutundaika kubula kukepesha mambo, mambo tumambo tucheche tulengela muntu kulala mizhilo ya Lesa.—Mateo 5:27, 28.
Kilengela kulenga mambo. Bantu bamo balenga mambo mu bulubi na mambo a kubula kuyuka bikeba Lesa. (Byubilo 17:30; 1 Timoti 1:13) Baibolo kechi waamba’mba kijitu bulongo aba balenga mambo kwa kubula kuyuka ne, bino wamwesha lupusano luji pa kulala mizhilo ya Lesa kya nshijitu. (Kubala 15:30, 31) Kulenga mambo kya nshiji kufuma mu ‘muchima watama.’—Yelemiya 16:12.
Kulengalenga mambo. Baibolo wapusanya mambo alenga muntu jimotu ne na mambo alengalenga muntu pa kimye kyabaya. (1 Yoano 3:4-8) Aba “balenga mambo kya nshiji” saka bayuka kuba kyawama, Lesa kechi ukebalekelako mambo ne.—Bahebelu 10:26, 27.
Aba balenga mambo akatampe bezhachisha bingi na mambo akatampe o balenga. Mfumu Davida wanembele’mba: “Bubi bwami buji pa mutwe wami; bwannemenatu nobe kipe kyanema.” (Salamo 38:4) Nangwa byonkabyo, Baibolo watundaika bantu balenga mambo kuba’mba: “Muntu mubi aleke byubilo byanji byatama kabiji muntu watama naye aleke kulanguluka bintu byatama; abwele kwi Yehoba, yenka ukamubila lusa, abwele kwi Lesa wetu mambo aye ukamulekelako mambo anji onsetu.”—Isaya 55:7.