BANYIKE BEPUZHA’MBA
Baibolo Wafwainwa Kunkwasha Byepi?—Kipungu 2: Tangainga Baibolo Kimye Kyonse
Mwanyike wa jizhina ja Will waambile’mba: “Kinetu inge kechi wayuka bulongo bya kutanga Baibolo ne, wakonsha kumvwanga mukose pa kumutanga.”
Nanchi mukeba kuyuka kyafwainwa kwimukwasha pa kuba’mba mutangenga Baibolo kimye kyonse nyi? Uno mutwe usakwimukwasha bingi.
Umvwishainga byaamba Binembelo
Temwai bintu byo mubena kutanga. Mwakonsha kwingijisha jino jishinda:
Salai jishimikila ja mu Baibolo jo mukeba kutangapo. Mwakonsha kusala kintu kyamwekele kyo baambapo mu Baibolo nangwa kutanga jishimikila jiji mu Mambo awama. Nangwa mwakonsha kusala jishimikila jiji mu kifwanyikizho kya mawi onkatu kyo babika pa jw.org.
Tangai jishimikila. Mwakonsha kwitangila anweba bene nangwa mwakonsha kutangila pamo na balunda nenu nangwa ba mu kisemi kyenu saka mutangila peulu. Muntu umo wakonsha kutanga jishimikila, bakwabo bakonsha kutanga byambo byaambile muntu mukwabo uji mu jo jo jishimikila.
Pa ano mashinda onse, esekaipo jimo nangwa kukilapo:
Lengainga bipikichala kufwanyikizha jo jo jishimikila jo mubena kutanga. Nangwa ikalai na po mwalengela tubipikichala tucheche kulumbulwilamo bintu byamwekelenga. Ingijishainga tubyambo twalumbulula kila kipikichala.
Inge mubena kutanga pa muntu umo wakishinka, nembai byubilo byanji byawama byajinga na uno muntu ne bintu byawama byo amwenejilemo.
Pimpulai jishimikila kwikala sawakya. Ambai pa bintu byamwekele pa bankaizhi bapusana pusana ne kuvwangamo mwisambo wa mepuzho na bankaizhi bene ne bamwenengako.
Inge nkaizhi umo mu jishimikila kechi wafuukwilepo bulongo bintu ne, fwanyikizhai bintu byafwainwe kumumwekela inge kya kuba wafuukwilepo bulongo. Langulukai pe Petelo wakaine Yesu. (Mako 14:66-72) Nanchi Petelo wafwainwe kukumbula byepi bulongo pa kikye kimye?
Inge mwamona’mba kimupeelela, nembai kyokyo kifwanyikizho kya jishimikila ja mu Baibolo. Vwangaimo ne bintu byo mwafwainwa kufunjilako biji mu jishimikila jo mubena kutanga.—Loma 15:4.
Yukai bya kutanganga bulongo Baibolo!
Kebakebai bishinka!
Inge mwakebakeba bintu bimo mu jishimikila jo mubena kutanga, mukataanamo bishinka bikwabo byanema bingi. Mambo kyambo kimo nangwa bibiji biji mu jishimikila ja mu Baibolo jo mubena kutanga mukafunjilako bintu byanema bingi.
Esakanyaiko biji pa Mateo 28:7 na biji pa Mako 16:7.
Mambo ka Mako o avwangijilemo byambo bya kuba’mba Yesu usakumweka ku baana banji ba bwanga “ne Petelo” pamo?
Kishinka kya kulangulukapo: Mako kechi wajingako ku byamwekelenga ne. Onkao mambo, kyamweka abino bishinka bamubuujilebyo kwi Petelo.
Bishinka bikwabo: Mambo ka Petelo o atemejilwe bingi Yesu byo aambile’mba ukeba kumumona jikwabo? (Mako 14:66-72) Yesu wamwesheshe byepi amba kine wajinga mulunda wa pa muchima wa kwa Petelo? Mwakonsha kuba byepi pa kuba’mba mwikale byajinga Yesu ne kwikala mulunda wa kine ku bakwenu?
Inge kemutange binembelo mu jino jishinda ne kukebakeba bishinka, mukatemwa bingi kutanganga Baibolo kimye kyonse.