Bintu Biwamisha Tusengo twa Lupombololwa

Butooto bwanema bingi ku kilongolo pa kuba’mba kitumbuke, kikanjile ku kichi ne kuyuka bintu. Ku tusengo twa lupombololwa inge kwaikala biko, kyakonsha kukatazha kwenda bulongo, kumvwañana na mpombololwa ikwabo, ne kumvwa bwema. Shayuka wafunda pa bilongolo aye Alexander Hackmann waambile’mba: “Kechi mukataanapo kilongolo kiji na biko ne. Byayuka bya kwikala mu mapunzha muji biko.”

Langulukai pa kino: Ba Hackmann ne bakwabo mo bafunjilanga pa sukulu mukatampe bafunjile pa jishinda jingijisha lupombololwa kuwamisha tusengo twanji. Bataaine kuba’mba pa kuwamisha tusengo twanji, lupombololwa uvunga tumaulu ne kupisha tusengo mu maulu evunga pa kuba’mba tutoke. Tuboya tuji ku maulu tufumya biko bikatampe bikala ku tusengo. Tubiko twakepesha tufumako inge wapisha tusengo twanji paji tuboya twaesakanatu na tusengo twa kino kilongolo. Kabiji tubiko twakepesha bingi tufumako inge kino kilongolo kyapisha tuno tusengo paji tuboya twakepa bingi kabiji twanekena bingi.

Tambai mumone lupombololwa byo awamisha tusengo twanji

Ba Hackmann ne bakwabo baambile kuba’mba mashinda engijisha kino kilongolo kulama tusengo twa butooto akonsha kwingila mu minkinyi. Ano mashinda bakonsha kwiengijisha pa kulama butooto minkinyi ilenga tubiñambañamba tucheche twa malaichi twakonsha konaika inge kwaikala biko.

Mwalangulukapo’mba Ka? Nanchi tubintu twingijisha lupompololwa pa kuwamisha tusengo twanji twaishilekotu twine nyi, inyi twalengelwe?