Pa Kimo, September 15
Balongo bami, mwayila bya lumanamo ne butekanye, mwenainga ku bangauzhi baambilenga mu jizhina ja Yehoba.—Yako. 5:10.
Mu Baibolo muji mashimikila aamba pa bantu bavula bamwesheshe butekanye. Kyakonsha kuwama bingi kutendeka kufunda pa bano bantu. Nangwa kya kuba Davida bamutongwele kwikala mfumu wa bena Isalela saka akiji mwanyike, wapembelejile myaka yavula pa kuba’mba atendeke kulama. Shimeona ne Ana bapopwelanga Yehoba bapembelejile kufika kwa kwa Mesiasa. (Luka 2:25, 36-38) Inge mubena kutanga pa ano mashimikila, kumbulai ano mepuzho: Ñanyi kintu kyakwashishe uno muntu kutekanya? Ñanyi bintu byo amwenejilemo mu butekanye? Twafwainwa kwikala byepi batekanya byonka byo ajinga? Kabiji mwakonsha kufunjilako ne ku bantu babujile kumwesha butekanye. (1 Sam. 13:8-14) Ishikishai’mba: ‘Ñanyi kintu kyalengejile uno muntu kubula kutekanya? Ñanyi kintu kyafuminemo?’ w23.08 25 ¶15
Pa Kibiji, September 16
Twaitabila ne kuyuka’mba anweba mwi Wazhila wa Lesa.—Yoa. 6:69.
Mutumwa Petelo wajinga wa kishinka kabiji kechi waswishishepo kintu nangwatu kimo kumukanya kwikala mwana wa bwanga wa kwa Yesu ne. Petelo wamwesheshe bukishinka bwanji kimye Yesu kyo aambile kintu kimo kyabujile baana banji ba bwanga kuyuka mo kyatajile. (Yoa. 6:68) Kwa kubula kupembelela mukumbu mo atazhizhe, bavula balekele kulondela Yesu. Pakuba Petelo aye wakaine kuya mambo wayukile’mba Yesu ye yenkatu uji na “byambo bipana bumi bwa myaka ne myaka.” Yesu wayukile’mba Petelo ne bakwabo batumwa basakumusha. Nangwa byonkabyo, Yesu wabuujile Petelo amba nangwa kya kuba Petelo ukamukana, ukabwela ne kutwajijila kwikala wa kishinka kwi aye. (Luka 22:31, 32) Yesu wayukile’mba “kine muchima [wa kwa Petelo] wakebesha, pakuba mubiji wakooka.” (Mako 14:38) Nangwa kya kuba Petelo wamukaine’mba kechi wamuyuka ne, Yesu kechi wamulubileko uno mutumwa wanji ne. Byo bamusangwile, Yesu wamwekele kwi Petelo, kyamweka pa kikye kimye Petelo saka ajitu bunke. (Mako 16:7; Luka 24:34; 1 Ko. 15:5) Akino kintu kyatundaikile Petelo mambo waakaminwe bingi pa kintu kyo aubile! w23.09 22 ¶9-10
Pa Kisatu, September 17
Bo ba lusekelo aba bo balekelako mizhilulwila kabiji bo bavwetela pa mambo abo.—Loma 4:7.
Lesa ulekelako nangwa kuvweta pa mambo a boba baji na lwitabilo mwi aye. Wibalekelako mambo kabiji kechi uvuluka mambo abo o balengele ne. (Sala. 32:1, 2) Wibamona babula kaneneno kabiji baoloka na mambo a lwitabilo lwabo. Nangwa kya kuba ba Abalahama, Davida ne bapopweshi bakwabo ba kishinka ba Lesa bebatelele’mba baoloka, bakijinga bandengamambo. Pano bino na mambo a lwitabilo lwabo, Lesa wibamwene kwikala babula kaneneno kikatakata byo ebesakenye na boba babujile lwitabilo mwi aye. (Efi. 2:12) Byonkatu mutumwa Paulo byo aambile mu nkalata yanji, lwitabilo lo lulengela muntu kwikala mulunda ne Lesa. Lwitabilo lo lwalengejile ba Abalahama ne Davida kwikala balunda ba Lesa. Ne atweba byo byo twafwainwa kuba pa kuba’mba twikale balunda ne Lesa. w23.12 3 ¶6-7