Kubala

28 Kabiji Yehoba waambijile Mosesa jibiji amba: 2 “Kambizha bena Isalela amba, ‘Mukatesheko bingi muchima kupana kwi amiwa milambo yami, ko kuba’mba kajo kami. Milambo yami ya kusoka pa mujilo ya bwema bwawama* mwafwainwa kwiilambula pa kimye kyayo kyatongolwa.’+

3 “Kabiji wibabuule’mba, ‘Mulambo wa kusoka pa mujilo ye mukalambulanga kwi Yehoba ke uno: pa juba pa juba mukalambulenga kimye kyonse baana ba mikooko balume babiji babula bulema ba mwaka umo ba mulambo wa kusoka.+ 4 Mu kimye kya lukelo mukalambulenga mwana mukooko mulume umo, ne mwana mukooko mulume mukwabo mukamulambulenga kimye kya muntuwa muntuwa,*+ 5 mukamulambwilenga pamo na kipimo kimo kya bunga bwalamba kya mu bipimo jikumi bitwela mu efa* bwavwangakana na kipimo kimo kya mu bipimo bina bitwela mu hini* kya manyi o baengula kwikala mulambo wa kajo.+ 6 Uno ye mulambo wa kusoka+ ulambulwa kimye kyonse, ye bemukambizhe ku Mutumba wa Sinai kwikala ke mulambo wa kusoka pa mujilo wa bwema bwawama* kwi Yehoba. 7 Mukooko mulume+ umo umo mukamulambwilenga pamo na mulambo wa binyu wa kipimo kimo kya mu bipimo bina bitwela mu hini. Muketulwile binyu mu nzubo yazhila kwikala mulambo wa binyu kwi Yehoba. 8 Kabiji mukalambulenga mwana mukooko mulume mukwabo kimye kya muntuwa muntuwa.* Mukamulambule na kajo kantutu kamo ko mukalambula lukelo ne binyu bintutu bimo, mukebilambule kwikala ke mulambo wa kusoka pa mujilo wa bwema bwawama* kwi Yehoba.+

9 “‘Nangwa byonkabyo, pa juba ja Sabado,+ mukalambule baana ba mikooko balume babiji babula bulema ba mwaka umo, ne bipimo bibiji bya bunga bwalamba bwavwangakana na manyi bya mu bipimo jikumi bitwela mu efa kwikala mulambo wa kajo, pamo na mulambo wanji wa binyu. 10 Uno ye mulambo wa kusoka ye mukalambula pa juba ja Sabado, pamo na mulambo wa kusoka wa kimye kyonse ne mulambo wanji wa binyu.+

11 “‘Ku ntatwilo ya ñondo* yense, mukalambulenga baana ba bañombe babiji, mukooko mulume umo ne baana ba mikooko balume batanu na babiji ba mwaka umo babula bulema, kwikala ke mulambo wa kusoka kwi Yehoba.+ 12 Kabiji ñombe umo umo mukamulambwilenga pamo na bipimo bisatu bya bunga bwalamba bwavwangakana na manyi bya mu bipimo jikumi kwikala mulambo wa kajo,+ ne mukooko mulume umo mukamulambwilenga pamo na bipimo bibiji bya bunga bwalamba bwavwangakana na manyi bya mu bipimo jikumi kwikala mulambo wa kajo.+ 13 Kabiji mwana mukooko mulume umo umo mukamulambwilenga pamo na kipimo kimo kya bunga bwalamba kya mu bipimo jikumi bwavwangakana na manyi kwikala mulambo wa kajo, ye mulambo wa kusoka wa bwema bwawama*+ bwa mulambo wa kusoka pa mujilo kwi Yehoba. 14 Kabiji ñombe+ mukamulambwilenga pamo na mulambo wa binyu wa kichika kya hini, ne pa mukooko mulume+ kipimo kimo kya mu bipimo bisatu bitwela mu hini, ne pa mwana mukooko mulume + kipimo kimo kya mu bipimo bina bitwela mu hini. Uno ye mulambo wa pa ñondo pa ñondo mu mwaka yense. 15 Kabiji mwafwainwa kulambula mwana mbuzhi kwikala mulambo wa bubi kwi Yehoba kununga pa mulambo wa kusoka kimye kyonse pamo na mulambo wa binyu.

16 “‘Juba ja bu 14 ja ñondo mutanshi, jikekala ja Kijiilo kya Lupitailo kya Yehoba.+ 17 Kabiji pa juba ja bu 15 ja uno ñondo pakekala kijiilo. Mukajenga shinkwa wabula mbizho pa moba atanu na abiji.+ 18 Pa juba jitanshi kukekala kushonkena kwazhila. Kechi mwafwainwa kwingila mwingilo wakosa nangwa umotu ne. 19 Mukalambulenga baana ba bañombe babiji, mukooko mulume umo, baana ba mikooko balume batanu na babiji ba mwaka umo kwikala ke mulambo wa kusoka pa mujilo kwi Yehoba. Mukalambulenga banyama babula bulema.+ 20 Mwafwainwa kwibalambwila pamo na milambo ya kajo ya bunga bwalamba bwavwangakana na manyi,+ bipimo bisatu bya mu bipimo jikumi pa ñombe umo, ne bipimo bibiji bya mu bipimo jikumi pa mukooko mulume umo. 21 Kabiji pa mwana mukooko umo umo wa mu mikooko itanu na ibiji, mukalambwilepo kipimo kimo kya mu bipimo jikumi, 22 ne mbuzhi umo wa mulambo wa bubi wa kwimufuchilako mambo. 23 Mukalambulenga bino kununga pa mulambo wa kusoka wa moba onse ye mukalambulanga lukelo. 24 Mukalambulenga bino bintu mu jishinda jimotu pa juba pa juba pa moba onse atanu na abiji kwikala ke kajo,* mulambo wa kusoka pa mujilo wa bwema bwawama* kwi Yehoba. Mukamulambwilenga pamo na mulambo wa kusoka wa moba onse ne na mulambo wanji wa binyu. 25 Pa juba ja butanu na bubiji mukekale na kushonkena kwazhila.+ Kechi mwafwainwa kwingila mwingilo wakosa nangwa umotu ne.+

26 “‘Pa juba ja bya nsomo,+ byo mukalambulanga kajo kakatataka kwi Yehoba,+ mukekalenga na kushonkena kwazhila kimye kya bijiilo byenu bya kunowa.+ Kechi mwafwainwa kwingila mwingilo wakosa nangwa umotu ne.+ 27 Mukalambulenga baana ba bañombe babiji, mukooko mulume umo ne baana ba mikooko balume batanu na babiji ba mwaka umo kwikala mulambo wa kusoka wa bwema bwawama* kwi Yehoba,+ 28 kabiji ñombe umo umo mukamulambwile pamo na mulambo wa kajo wa bipimo bisatu bya bunga bwalamba bwavwangakana na manyi bya mu bipimo jikumi, ne bipimo bibiji bya mu bipimo jikumi pa mukooko mulume umo. 29 Kabiji pa mwana mukooko umo umo wa mu mikooko itanu na ibiji, mukalambwilepo kipimo kimo kya mu bipimo jikumi, 30 ne pa mwana mbuzhi umo wa kwimufuchilako mambo.+ 31 Mukebalambulenga kununga pa mulambo wa kusoka wa moba onse ne mulambo wa kajo. Bano banyama bakekale babula bulema+ pamo na milambo ya binyu.