Kubala
8 Yehoba waambijile Mosesa amba: 2 “Buula Alona amba, ‘Byo ukambulanga malampi, malampi atanu na abiji akasamishenga kyeya pa mpunzha iji kulutwe ya kya kutulapo malampi.’”+ 3 Kabiji Alona waubile byonkabyo: Waambwile malampi kuba’mba atokeshe mpunzha iji kulutwe ya kya kutulapo malampi,+ byonkatu Yehoba byo akambizhe Mosesa. 4 Abino byo byo balengele kya kutulapo malampi: Bekibunjile kya ngolode kufumatu ku mukupa kufikatu ne ku maluba.+ Kya kutulapo malampi bekilengele kwesakana na kimwesho kyonka kyo bamumwesheshe+ Mosesa kwi Yehoba.
5 Yehoba waambijile Mosesa jibiji amba: 6 “Sala bena Levi mu bena Isalela ne kwibatokesha.+ 7 Abino byo byo wafwainwa kuba pa kwibatokesha: Ukebasanse mema a kwibatokesha ku bubi, kabiji bafwainwa kutenda mibiji yabo yonse na mpemuna ne kuchapa bivwalo byabo ne kwitokesha abo bene.+ 8 Kepo bakashikule mwana ñombe mulume+ ne mulambo wanji wa kajo+ wa bunga bwalamba bwavwangakana na manyi, kabiji obewa ukashikule ne mwana ñombe mulume mukwabo wa mulambo wa bubi.+ 9 Kabiji ukebalete bena Levi kulutwe ya tente wa lusambakeno ne kukonkanya jibumba jonse ja bena Isalela.+ 10 Byo ukaleta bena Levi kwi Yehoba, bena Isalela bakatenteke maboko abo pa bena Levi.+ 11 Kabiji Alona akebapane* bena Levi kwi Yehoba kwikala mulambo wa kupepezha+ wafuma ku bena Isalela, ne abo bakengilenga mwingilo wa Yehoba.+
12 “Kepo bena Levi bakatenteke maboko abo pa mitwe ya bañombe balume+ ne kulambula umo kwikala mulambo wa bubi ne mukwabo kwikala mulambo wa kusoka kwi Yehoba ne kufuchilako mambo+ bena Levi. 13 Kabiji ukemike bena Levi kwi Alona ne baana banji ba balume ne kwibapana* kwi abo kwikala mulambo wa kupepezha kwi Yehoba. 14 Wafwainwa kusala bena Levi mu bena Isalela ne abo bakekala ke bami.+ 15 Inge wapwisha kuba bino, bena Levi bakeye ku tente wa lusambakeno na kuñingijila. Abino byo byo ukebatokesha ne kwibapana* kwikala mulambo wa kupepezha. 16 Mambo bebapana kwi amiwa kwikala bupe bwafuma mu bena Isalela. Abo bakapingakena pa babeji* bonse ba bena Isalela,+ ne amiwa nkebatambula kwikala ke bami. 17 Mambo mubeji yense wa mu bena Isalela ye wami, muntu ne nyama.+ Nebazhijikile kwikala ke bami pa juba jo naipayile babeji bonse ba mu kyalo kya Ijipita.+ 18 Nkatambula bena Levi kuba’mba bakapingakene pa mubeji yense wa mu bena Isalela. 19 Kabiji nkapana bena Levi kwi Alona ne ku baana banji ba balume kwikala bupe bwafuma mu bena Isalela kuba’mba bakengijilengako bena Isalela mwingilo wa ku tente wa lusambakeno+ ne kufuchilako bena Isalela mambo, pa kuba’mba kintu kyatama kikabule kumwekela bena Isalela+ na mambo a kwiya kwipi na mpunzha yazhila.”
20 Mosesa ne Alona ne jibumba jonse ja bena Isalela baubile bino bintu byonse ku bena Levi. Bena Isalela baubile ku bena Levi kwesakanatu na bintu byonse Yehoba byo akambizhe Mosesa kuba ku bena Levi. 21 Onkao mambo, bena Levi betokeshe abo bene ne kuchapa bivwalo byabo.+ Pa kupwisha kuba bino, Alona wibapaine* kwikala mulambo wa kupepezha kwi Yehoba.+ Kabiji Alona wibafuchijileko mambo abo ne kwibatokesha.+ 22 Kepo bena Levi batendekele kwingila mwingilo wabo wa ku tente wa lusambakeno kwi Alona ne ku baana banji ba balume. Bantu baubile ku bena Levi byonkatu Yehoba byo akambizhe Mosesa kuba ku bena Levi.
23 Kabiji Yehoba waambijile Mosesa amba: 24 “Abino byo byo kikekala ku bena Levi: Kutendekela pa baji na myaka 25 kuya peulu, mwanamulume akatwele mu jibumba jingila mwingilo wa ku tente wa lusambakeno. 25 Bino inge wafikizha myaka 50, akafumemo mu jibumba ja mwingilo ne kuleka kwingila. 26 Wakonsha kwingijila balongo banji bengila mingilo ya ku tente wa lusambakeno, bino kechi wafwainwa kwingila mwingilo wa ku tente wa lusambakeno ne. Abino byo byo ukooba ku bena Levi ne ku mingilo yabo.”+