Mitonyi

1 Yoshua+ byo afwile, bena Isalela* baipwizhe Yehoba amba:+ “Ñanyi mwi atweba usakutendekelapo kuya na kulwa na bena Kenana?” 2 Yehoba wakumbwile’mba: “Mukoka wa bena Yuda ye usakuya.+ Umvwai! Nsakupana kyalo mu kuboko kwanji.” 3 Kepo ba mu mukoka wa bena Yuda baambijile balongo babo ba mu mukoka wa bena Shimeona amba: “Twayai mu nyaunda yetu*+ tukalwe na bena Kenana. Ne atweba tukaya nenu mu nyaunda yenu.” Onkao mambo, ba mu mukoka wa bena Shimeona bayile nabo.

4 Mukoka wa bena Yuda byo ayile, Yehoba wapaine bena Kenana ne bena Pelizi mu maboko abo,+ ne abo bashinjile banabalume 10,000 mu Bezeke. 5 Bataaine Adonyi-bezeke mu Bezeke, kabiji konkakwa balwile nanji ne kushinda bena Kenana+ ne bena Pelizi.+ 6 Adonyi-bezeke byo anyemene, bamupupijile ne kumukwata, kabiji bamutetele byala ne mana anji akatampe. 7 Kepo Adonyi-bezeke aambile’mba: “Kuji bamfumu 70 bo natetele byala ne mana akatampe batolaula kajo munshi ya tebulu wami. Onkao mambo, Lesa wamfweta kwesakanatu na byonka byo naubile.” Kepo bamutwajile ku Yelusalema,+ kabiji wakafwijile konkakwa.

8 Kabiji banabalume bena Yuda balwile na Yelusalema+ ne kumushinda; baipayile bantu na mpoko ne kusoka muzhi na mujilo. 9 Byo bapwishishe kuba bino, banabalume bena Yuda bayile na kulwa na bena Kenana baikalanga mu kibunji kya mitumba ne mu Negeba ne mu Shefela.+ 10 Byonkabyo, bena Yuda bayile na kulwa na bena Kenana baikalanga mu Hebulona (jizhina ja Hebulona kala jajinga Kiliata-alaba), kabiji baipayile Sheshai, Ahimanyi ne Talamai.+

11 Byo bafumine kokwa, bayile na kulwa na bangikazhi ba mu Debila.+ (Jizhina ja Debila kala jajinga Kiliata-sefela.)+ 12 Kepo Kaleba+ aambile’mba: “Yense usakulukuka muzhi wa Kiliata-sefela ne kumushinda, nsakumupa mwanami aye Akisa kwikala mukazhanji.”+ 13 Kabiji Otoniela+ mwana Kenaza,+ nkasanji Kaleba, wamushinjile muzhi. Onkao mambo, wamupele mwananji aye Akisa kwikala mukazhanji. 14 Akisa byo ayilenga ku nzubo, waambijile mwatawanji amba ambile Kaleba muko wanji amupe bujimi. Kepo Akisa aikijilepo pa mbongolo wanji.* Kaleba wamushikishe’mba: “Ñanyi kintu kyo ubena kukeba?” 15 Aye wamukumbwile’mba: “Mwane mpeshai, mambo anweba mwampela mpunzha ku kabeta ka ku bulenge;* mpai ne Gulota-maimu.”* Onkao mambo, Kaleba wamupele Gulota uji Kwatuntama ne Gulota uji Kwakunama.

16 Kabiji ba mu kisemi kya mwina Keni,+ muko wa kwa Mosesa,+ baishile kufuma ku muzhi wa bisonga+ pamo na bena Yuda ku kiselebwa kya Yuda, ku kabeta ka ku bulenge bwa Alada.+ Bayile konkakwa ne kwikala mukachi ka bantu.+ 17 Bino ba mu mukoka wa bena Yuda bayile na balongo babo ba mu mukoka wa bena Shimeona, bakalukukile bena Kenana baikalanga mu Zefwata ne kumonauna muzhi.+ Onkao mambo, muzhi bamutumbile’mba Holama.*+ 18 Kepo ba mu mukoka wa bena Yuda bashinjile Gaza+ ne nyaunda yanji, Ashekelona+ ne nyaunda yanji ne Ekelona+ ne nyaunda yanji. 19 Yehoba wajinga na ba mu mukoka wa bena Yuda, ne abo batambwile kibunji kya mitumba kwikala ke kyabo, bino kechi bakonsheshe kupangamo bangikazhi baikalanga mu musanza ne, mambo bajinga na makalaki a nkondo ajinga na bikwakwa bya kyela* kya kapotwe.+ 20 Kaleba bamupele Hebulona, byonkatu Mosesa byo alayile,+ ne aye wibapangilemo baana basatu ba kwa Anaki.+

21 Bino bena Benjamina kechi bapangilemo bena Yebusi baikalanga mu Yelusalema ne, o ene mambo, bena Yebusi o bekela na bena Benjamina mu Yelusalema kufika ne lelo jino.+

22 Ba mu kisemi kya kwa Yosefwa+ bayile na kulwa na bena Betele, kabiji Yehoba wajinga nabo.+ 23 Ba mu kisemi kya kwa Yosefwa batumine ba kwendela Betele (jizhina ja muzhi kala jajinga Luza),+ 24 kabiji aba bayile na kwendela muzhi, bamwene mwanamulume saka afuma mu muzhi. Ponkapo bamwambijile’mba: “Mwane, tubuulai jishinda jaya mu muzhi, ne atweba tukemubila lusa.”* 25 Onkao mambo, uno mwanamulume wibabuujile jishinda jaya mu muzhi, ne abo baipayile bantu na mpoko bajinga mu muzhi, bino uno mwanamulume ne ba mu kisemi kyanji bonse bebalekele amba baye.+ 26 Uno mwanamulume wayile ku kyalo kya bena Hiti ne kukashimika muzhi mukatampe, kabiji wamutumbile’mba Luza, jino jo jizhina ja uno muzhi kufika ne lelo jino.

27 Ba mu mukoka wa bena Manase kechi batambwile Bete-sheana ne mande anji* ne, Taanaka+ ne mande anji ne, bangikazhi ba mu Dola ne mande anji ne, bangikazhi ba mu Ibeleama ne mande anji ne, ne bangikazhi ba mu Megido ne mande anji ne.+ Bena Kenana bakakachijile kwikala mu kino kyalo. 28 Bena Isalela byo bakosele, bapele bena Kenana mingilo ya buzha,+ bino kechi bebapangilemo bonsetu ne.+

29 Kabiji bena Efelaimu nabo kechi bapangilemo bena Kenana baikalanga mu Gezela ne. Bena Kenana batwajijile kwikala na bena Efelaimu mu Gezela.+

30 Ba mu mukoka wa bena Zebuluna kechi bapangilemo bangikazhi ba mu Kitilona ne ba mu Nahaloli+ ne. Bena Kenana batwajijile kwikala mukachi ka bena Zebuluna, kabiji bebapele mingilo ya buzha.+

31 Ba mu mukoka wa bena Ashela kechi bapangilemo bangikazhi ba mu Ako ne ba mu Shidona,+ ba mu Ahilaba, ba mu Akeziba,+ ba mu Heliba, ba mu Afiki+ ne ba mu Lehoba+ ne. 32 Onkao mambo, bena Ashela batwajijile kwikala mukachi ka bena Kenana baikalanga mu kyokya kyalo, mambo kechi bebapangilemo ne.

33 Ba mu mukoka wa bena Nafitali kechi bapangilemo bangikazhi ba mu Bete-shemeshi ne ba mu Bete-anata+ ne, bino batwajijile kwikala na bena Kenana baikalanga mu kyokya kyalo.+ Bangikazhi ba mu Bete-shemeshi ne ba mu Bete-anata baikele ke bakwibengijila mingilo ya buzha.

34 Bena Amoli balengejile bena Danyi kwikala mu kibunji kya mitumba, mambo kechi bebaswishishe kukunkulukila ku musanza ne.+ 35 Onkao mambo, bena Amoli batwajijile kwikala ku Mutumba wa Heleshi, mu Ayalona+ ne mu Shalabimu.+ Bino ba mu kisemi kya kwa Yosefwa byo bakosele, bakanjikizhe bena Amoli kwingila mingilo ya buzha. 36 Nyaunda ya bena Amoli yafumine ku jishinda jatuntukila ku Akalabimu,+ kufuma ku Sela kwatuntuka.