Mitonyi

12 Kepo banabalume bena Efelaimu bebechile, ne abo baabukijile ku Zafona* ne kushikisha Yefita amba: “Mambo ka o wabujile kwitwita kuba’mba tuye ne obewa byo waabukile ne kuya na kulwa na bena Amonyi?+ Tusakusoka nzubo yobe ne obewa monka.” 2 Bino Yefita wibakumbwile’mba: “Amiwa ne bantu bo najinga nabo, twikatezhe bingi na bena Amonyi. Nemwichile namba munkwashe, bino kechi mwaishile na kumpokolola mu maboko abo ne. 3 Byo namwene namba, kechi musakumpokolola ne, nabikile bumi bwami mu kizumba,* kabiji nayile na kulwa na bena Amonyi,+ ne Yehoba wibapaine kwi amiwa. Pano mambo ka o mwaishila lelo jino na kulwa ne amiwa?”

4 Kepo Yefita akonkenye pamo banabalume bonse ba mu Gileada+ ne abo balwile na bena Efelaimu; banabalume bena Gileada bashinjile bena Efelaimu, bonka baambile’mba: “Nangwa kya kuba anweba bena Gileada mwikala mu manyaunda a Efelaimu ne Manase, mwi bakapitemo babombokele mu Efelaimu.” 5 Bena Gileada baangachile myaba ya mu Yodano+ bena Efelaimu saka bakyangye kufikako; kabiji banabalume bena Efelaimu byo bakebelenga kunyema, baambilenga’mba, “Nswishai ngabuke”; kepo banabalume bena Gileada bebashikishenga pa muntu pa muntu amba, “Wi mwina Efelaimu nyi?” Inge wakumbula’mba, “Ine!” 6 bebambijilenga’mba, “Amba’mba Shiboleti.” Bino aye inge waamba’mba, “Siboleti,” mambo bakankelwenga kutela kyambo bulongo. Kepo bebakwachile ne kwibepayila ku myaba ya ku Yodano. Onkao mambo, bena Efelaimu 42,000 bafwile pa kyokya kimye.

7 Yefita wachibijilenga bena Isalela mambo pa myaka itanu na umo, kabiji Yefita mwina Gileada wafwile, ne kumuzhiika bamuzhikile mu muzhi wanji mu Gileada.

8 Pe aye palondejile Ibizana wa ku Betelema wachibijilenga bena Isalela mambo.+ 9 Wajinga na baana ba balume 30 ne baana ba bakazhi 30. Watumine baana banji ba bakazhi kuya na kusongolwa ku banabalume ba mu mukoka ungi, kabiji waletele banabakazhi 30 bakusongolwa ku baana banji ba balume. Wachibijilenga bena Isalela mambo pa myaka itanu na ibiji. 10 Kepo Ibizana afwile, kabiji bamuzhiikile mu Betelema.

11 Pe aye palondejile Elona mwina Zebuluna wachibijilenga bena Isalela mambo; wachibijilenga bena Isalela mambo pa myaka jikumi. 12 Kepo Elona mwina Zebuluna afwile, kabiji bamuzhiikile mu Ayalona mu kyalo kya Zebuluna.

13 Pe aye palondejile Abidona mwana wa kwa Hilela mwina Pilatona wachibijilenga bena Isalela mambo. 14 Wajinga na baana ba balume 40 ne bankana ba balume 30 baendanga pa bambongolo 70. Wachibijilenga bena Isalela mambo pa myaka itanu na isatu. 15 Kepo Abidona mwana Hilela mwina Pilatona afwile, kabiji bamuzhiikile mu Pilatona mu kyalo kya Efelaimu mu mutumba wa bena Amaleki.+