Luta
3 Naomi, muko wanji wa mukazhi, wamwambijile’mba: “Mwanami, nanchi kechi nafwainwa kukukebela nzubo*+ pa kuba’mba ukekalenga bulongo nenyi? 2 Nanchi Boaza kechi ye mulongo wetu nenyi?+ Ye mwina boba bansongwakazhi bo wajinga nabo. Mabanga ano, aye usakulululanga mbaale pa kipujilo. 3 Onkao mambo, owe ne kwishinga manyi anunka bulongo; uvwale* bulongo ne kuya ku kipujilo. Kange umuleke akumone ne, posotu ne byo asakupwisha kuja ne kutoma. 4 Byo asakulaala, ulabijile pa mpunzha po asakulaala; apa bino uye na kumuvwetula ku maulu anji kabiji ulaale konka. Aye usakukubuula kintu kyo wafwainwa kuba.”
5 Aye wakumbwile’mba: “Bintu byonse byo mwambuula nsakwibyuba.” 6 Byonkabyo, wayile ku kipujilo ne kuba bintu byonse byamukambizhe bako banji. 7 Kabiji Boaza wajiile ne kutoma, kabiji wasangalele. Kepo ayile na kulaala kwapela mulumba wa kajo. Luta waishiletu kishinshi ne kumuvwetula ku maulu ne kulaala konka. 8 Pakachi ka bufuku, uno mwanamulume watatwile kuzakama, kabiji byo abuukile ne kwikala, wamwene mwanamukazhi saka alaala konka ku maulu anji. 9 Aye wamushikishe’mba: “Yobe ñanyi?” Aye wamukumbwile’mba: “Yami Luta, wa mwingilo wenu. Mvwetai kisapi* kyenu amiwa wa mwingilo wenu, mambo yenu muji na luusa lwa kukuula.”+ 10 Ponkapo waambile’mba: “Mwanami, Yehoba akupeshe. Kino kimye wamwesha pakatampe butemwe bubula kwaluka kukila kimye kitanshi,+ byo wabula kuya na kukeba bansongwalume, bayanji nangwa banonshi. 11 Pano mwanami, kange wakamwe ne. Nsakukubila bintu byonse byo waamba,+ mambo bantu bonse mu muzhi* bayuka’mba wi mwanamukazhi wawama bingi. 12 Kya kine nji na luusa lwa kwimukuula,+ pano bino, kuji mukwabo uji na luusa lukatampe lwa kwimukuula wankila.+ 13 Wikale konka kuno buno bufuku, kabiji inge ukakukuula lukelo, kijitu bulongo! Obe byonkabyo.+ Bino inge akakaane kukukuula, byonkatu Yehoba byo aji na bumi, amiwa nkakukuula. Laala konka kuno kufikatu ne byo busakukya.”
14 Ne aye walaajile konka ku maulu anji kufikatu ne byo bwakile, kabiji wabuukile saka pakyangye kutoka kya kuba kafwako wakonsha kuyuka muntu nangwa umo ne. Kepo Boaza aambile’mba: “Muntu nangwa umo kange ayuke’mba ku kipujilo kwaji kwiya mwanamukazhi ne.” 15 Kabiji wamwambijile’mba: “Leta kisapi kyo wavwala peulu, wikivungulule.” Kepo ekivungulwile ne aye wamubikijilepo bipimo* bitanu na kimo bya mbaale ne kumutwikakyo, byo apwishishe kuba bino, Boaza wayile mu muzhi.
16 Luta wayile ku bako banji, ne abo bamushikishe’mba: “Mwanami, bintu byaji kwenda byepi?”* Ne aye wibabuujile bintu byonse byamubijile awa mwanamulume. 17 Wanungilepo’mba: “Waji kumpa bino bipimo bitanu na kimo bya mbaale ne kuñambila’mba, ‘Kange uye mabokotu ku bako bobe ne.’” 18 Kepo bako banji bamwambijile’mba: “Mwanami, pembelela, kufikatu ne byo usakuyuka bino bintu byo bisakwikala, mambo aye kechi usakukokoloka ne, posotu ano mambo eapwishe lelo jonka.”