Ezikyo
30 Kabiji Yehoba wañambijile jikwabo amba: 2 “Obewa mwana muntu aula ne kwamba’mba, ‘Nkambo Mfumu Yehoba waamba’mba:
“Jila mabingo, juba jibena kwiya!’
3 Mambo juba jafwenya pepi, kine juba ja Yehoba jafwenya pepi.+
Jikekala juba ja makumbi,+ jo bakachibilamo bisaka bya bantu+ mambo.
4 Mpoko ikeya pa bena Ijipita, kabiji bena Etiopya bakomvwa moyo umvwe bantu ba mu Ijipita bebepaya;
Bebasendela bunonshi bwabo ne kukundula bitendekesho bya muzhi wabo.+
5 Bena Etiopya,+ bena Puta,+ bena Luda ne bantu bonse ba mu byalo bingi,*
Ne bena Kube kuvwangakotu ne bantu ba mu kyalo kya Isalela bajinga mu lulayañano,*
Bonse bakafwa ku mpoko.”’
6 Yehoba waamba’mba:
‘Bonse bamukwashanga Ijipita bakafwa,
Kabiji bulume bwanji bo etotelangamo bukapwa.’+
“Nkambo Mfumu Yehoba waamba’mba, ‘Bantu bekala mu muzhi wa Migidolo+ ne Sayene+ mu kyalo kya Ijipita bakafwa ku mpoko.’ 7 ‘Kyalo kyabo bakekyonaunatu shata kukila byalo bikwabo, ne mizhi yakyo ikashalatu masala kukila mizhi ikwabo.+ 8 Kabiji bakayuka’mba amiwa yami Yehoba byo nkambula mujilo mu Ijipita ne kuvizha bonse bo aumvwañananga nabo. 9 Pa joja juba, nkatuma baluwe benda mu maato kuya na kuzakamisha Etiopya wiketekejile mwine; ne moyo ukebakwata pa juba jo bakachibila mambo bena Ijipita, kine jino juba jikafika.’
10 “Nkambo Mfumu Yehoba waamba’mba: ‘Nkengijisha Nebukaneza Mfumu wa Babilona konauna mabumba a bena Ijipita.+ 11 Aye ne bashilikale banji, ko kuba’mba bisaka byakilamo kushinta+ bakebileta kuba’mba byonaune kyalo. Bakasomona mapoko abo ne kwipaya bena Ijipita, kabiji bakayuzha kyalo na mibiji ya bantu bafwa.+ 12 Nkomisha tunkololongwa twa mu Mukola wa Nile+ kabiji nkapotesha kyalo ku bantu batama. Nkengijisha bantu bafuma mu kyalo kingi konauna kyalo ne bintu byonse bijimo.+ Amiwa Yehoba yami naamba.’
13 “Nkambo Mfumu Yehoba waamba’mba: ‘Nkonauna bankishi* ba bunya ne kufumyamo balesa batutu ba mu kyalo kya Nofu.*+ Kechi mukekalapo jibiji kinemanga* mu kyalo kya Ijipita ne, kabiji nkalengela bantu bonse kwikala na moyo mu kyalo kya Ijipita.+ 14 Nkalengela muzhi wa Patalosa+ kwikala ke masala kabiji nkambula mujilo mu muzhi wa Zowana ne kukambula bantu ba mu muzhi wa No.*+ 15 Nkazhingijila muzhi wa Shina, nsakwa yakosa ya Ijipita kabiji nkonauna bantu ba mu muzhi wa No. 16 Nkambula mujilo mu Ijipita; ne ba mu muzhi wa Shina bakomvwa moyo kabiji muzhi wa No bakamutula bulemo, ne muzhi wa Nofu* bakamulukuka mute wansanana! 17 Bansongwalume ba mu muzhi wa Ona* ne ba mu Peibesete bakafwa ku mpoko, kabiji bantu ba mu mizhi bakebatwala mu buzha. 18 Mu muzhi wa Tapanesa, juba jikaluka ke mfishi byo nkachimauna bikonkoji bya bena Ijipita.+ Bulume bwanji bo etotelangamo bukapwa,+ makumbi akamuvweta ne bantu ba mu mizhi yanji bakebatwala mu buzha.+ 19 Nkakambula bena Ijipita, kabiji po po bakayuka’mba amiwa yami Yehoba.’”
20 Kabiji mu mwaka wa bu 11, mu ñondo mutanshi, pa juba ja butanu na bubiji ja ñondo, Yehoba wañambijile’mba: 21 “Obewa mwana muntu, amiwa nachimuna kuboko kwa kwa Felo mfumu wa Ijipita; kechi bakakasako nangwa kupombakanyako kisapi kuba’mba kukose ne kukwachilako mpoko jikwabo ne.”
22 “Onkao mambo, Nkambo Mfumu Yehoba waamba’mba: ‘Amiwa namuzhingijila Felo mfumu wa Ijipita+ kabiji nkachimuna maboko anji, kutuntulu ne kokwa kwachimukile,+ ne mpoko ikapona mu kuboko kwanji.+ 23 Kabiji bena Ijipita nkebapalañenya mu bisaka bya bantu ne mu byalo bingi.+ 24 Nkakosesha mukoko* wa mfumu wa Babilona+ ne kubika mpoko yami mu kuboko kwanji,+ kabiji nkachimuna maboko a kwa Felo, ne aye ukabinza bingi byonkatu bibinza muntu ubena kufwa saka atalako.* 25 Nkakosesha maboko a mfumu wa Babilona, pakuba maboko a kwa Felo akalebelangatu; kabiji po po bakayuka’mba amiwa yami Yehoba byo nkabika mpoko yami mu kuboko kwa mfumu wa Babilona, ne aye ukeingijisha kukambwilako kyalo kya Ijipita.+ 26 Kabiji bena Ijipita nkebapalañenya mu bisaka bya bantu ne mu byalo bingi,+ kabiji po po bakayuka’mba amiwa yami Yehoba.’”