MUTWE WA PA NKUPIKO—BYA KUCHINCHIKA INGE MWAPONENWA NA BYA MALWA

Inge Mwaponenwa Na bya Malwa

BANTU bonse pa kimye kimo baponenwa na bya malwa, kubikapotu ne bantu bamweka nobe bintu byonse mu bwikalo bwabo bijitu bulongo.

BAIBOLO WAAMBA’MBA:

‘Kechi aba bapelawizha kunyema lubilo bo bashinda mu kapela ne, nangwa boba bakosa bo bashinda mu nkondo ne, nangwa boba bamilangwe bo baja kajo ne, nangwa basendwe bo banonka ne, nangwa ba maana bo batala bulongo ne; pakuba bimye byabo ne bintu bibasolomokelatu bibafikila bonse.’—Musapwishi 9:11.

Na mambo a kuba’mba bonse tupita mu bya malwa, bwipuzho ke bwa kuba’mba mukoba byepi kimye kyo mukapitamo? Akilangulukai pa bino:

• Mwakonsha kuba byepi umvwe bipe byenu byonse byaonaika mu bya malwa biyakotu abyo bine?

• Mwakonsha kuba byepi inge bemukwata na kikola kibula kubukwa?

• Mwakonsha kuba byepi inge mutemwe wenu wafwa?

Bakamonyi ba kwa Yehoba, banembi ba uno magazini, baketekela kuba’mba Baibolo wakonsha kwimukwasha kuchinchika inge mwatalañana na bya malwa ne kwikala na luketekelo lwa bwikalo bwawama kulutwe. (Loma 15:4) Monai bintu bisatu byamwekele bimwesha kino kishinka.

MUTWE WA PA NKUPIKO—BYA KUCHINCHIKA INGE MWAPONENWA NA BYA MALWA

Inge Bipe Byonse Byaonaika

Pa Kitanu, pa 11 March, 2011, mu Japan mwapichile kitentanshi kikatampe kyaipaile bantu kukila pa 15,000 ne konauna bipe, bishimikwa, ne bintutu bikwabo byavula byakonsha kupotwa na mali kukila pa 200 bilyonyi mali a kina America. Byo babijikile amba kusakwikala muyulo wa mema kufuma pa kalunga kakatampe na mambo a kitentanshi, ba Kei, baji na myaka 32 banyemejile ku mpuzha yatuntama kuchina’mba bakafwa. Ba Kei baambile’mba: “Juba jalondejilepo, nabwelele ku nzubo namba apo kampe nakonsha kutolapo tubipe twami tumo, bino nataine kuba’mba bipe byonse bebikwemuna ku muyulo, kubikapotu ne nzubo yami. Pajinga nzubo pashajiletu kitendekesho.

“Papichileko kimye pa kubatu’mba nswe kuba’mba bintu byami byonse byaonaika. Motoka wami, makompyuta o naingijishanga pa kwingila nkito yami, matebulu, bipona, ne mupando paikalanga benyi; kijimba kyami, kidali kikatampe ne kicheche, ne mumpempe; bintu byo naingijishanga pa kulenga bipikichala na misombelo yapusana pusana, mapezulu, ne bipikichala byonse byo nalengele, byonsetu byaonaikile.”

BYA KUCHINCHIKA BYA MALWA

• Tai muchima pa byo mwashala nabyo, kechi pa byaonaika ne. Baibolo waamba’mba: “Muntu nangwatu ekale na bintu byavula, bintu byo aji nabyo kechi byo bimulengela kwikala na bumi ne.” (Luka 12:15) Ba Kei bavuluka’mba: “Patanshi, nanembele mutanchi wa bintu byo nakebelenga, bino kuba bino kwamvululangamotu bipe byami byaonaikile. Nafuukwilepo kuba’mba pa mutanchi nnembepo bintu byanema byo nakajilwe kabiji uno mutanchi namupimpulanga inge naikala nabyo. Uno mutanchi wankwashishe kuwamishako bwikalo bwami.”

• Ingijishainga bintu byo mwapitamo pa kutekenesha bakwenu, kechi kwinyengaika ne. Ba Kei baambile’mba: “Bakwetu ne bipamo bikwasha bantu baponenwa na bya malwa bankwashishe bingi. Pano bino, na mambo a kupijilwa kutambwila bukwasho kimye kyonse, natendekele kwilengulula amiwa mwine. Kepo navulukile byambo bya mu Baibolo bitanwa pa Byubilo 20:35 bya kuba’mba ‘mu kupana mufuma lusekelo lukatampe kukila mu kutambula.’ Na mambo a kuba kechi najinga na bintu byavula bya kupapo bantu batanwa mu bya malwa ne, nafuukwilepo kwibakwasha na byambo bya lutundaiko. Kupana mu jino jishinda kwankwashishe bingi.”

• Lombai kwi Lesa kuba’mba emupe maana a kuyuka bya kuba na makatazho. Ba Kei baketekejile mu mulaye uji mu Baibolo wa kuba’mba Lesa uta “muchima ku lulombelo lwa bapelelwa.” (Salamo 102:17) Ne anweba byo byo mwafwainwa kuketekela.

Nanchi mwayuka nyi? Baibolo waamba’mba kimye kibena kwiya bantu kyo bakekalanga kwa kubula kwakamwa amba bipe byabo bikonaika na bya malwa biyakotu bine.a—Isaya 65:21-23.

[Tubyambo twa mushi]

MUTWE WA PA NKUPIKO—BYA KUCHINCHIKA INGE MWAPONENWA NA BYA MALWA

Kukolwakolwa

Ba Mabel, bekala mu kyalo kya Argentina babambakene bingi kabiji bajinga ba shayuka bakwashanga bantu kwikala na butuntulu bwa mubiji bwawama kupichila mu makayo akosesha mubiji. Mu 2007, batendekele kumvwa mubiji kukooka ne mutwe kukola. Baambile’mba: “Nayile ku badokotala bavula bingi kabiji naesekele michi yavula pano kafwako kyafuminemo ne.” Kyapeleleko, ba Mabel bayile ku kipatela ko bakebapimine ne kwibakopa kipikichala kya biji mukachi ka mubiji wabo ne kutana’mba baji na kikola kya kabe ka ku bongo. Baambile’mba: “Naakaminwe bingi. Kechi nayukile’mba najinga na kino kikola ne.

“Nangwa byonkabyo, kechi nayukile’mba kikola kyami kyabaya ne, kufikatu ne kimye kyo bantumbwile. Byo nalabilemo saka nji mu mwanya mo babika bantu bakolwa bingi, kechi najinga na ngovu ne. Natajilengatu mwiulu. Saka bakyangye kuntumbula, nabambakene bingi ne kwiendela. Pano bino nobe mu kukopatu kwa jiso nakookeletu zubulu. Navulañene kabiji moba onse naumvwangatu kyongo kya byela bya mu kipatela, mangengele ne mibinzo ya bantu bakolwa. Naumvwanga nobe misongo ne buyanji byanzhokolokatu konse konse.

“Ano moba mbena kumvwako bulongo. Neendela, kabiji kimye kimo ngya ne kwalepa. Pano bino, meso ami kechi amona bulongo ne, mubiji naye kechi wakasulukishatu ne.”

BYA KUCHINCHIKA BYA MALWA

• Twajijilai kwikala na lusekelo. Pa Byambo bya Mana 17:22, Baibolo waamba’mba: “Muchima wa lusekelo ye muchi wawama, pakuba muchima wa kinyenge umulengela muntu kunyana.” Ba Mabel bavuluka’mba: “Kimye kyo nabukilwenga, napichilenga mu makatazho onka apitangamo bantu bakolwanga bo nakwashanga. Makayo a kukosesha mubiji alengelanga mubiji wami kukola kya kuba bimye bimo nalangulukanga’mba nekileketu. Bino nebikileko bingi pa kuba’mba mfumyemo ino milanguluko, mambo nayukile’mba inge natwajijila mukafuma byawama.”

• Tai muchima pa bintu byakonsha kwimukwasha kuchinchika. Ba Mabel baambile’mba: “Nafunjile mu Baibolo kilengela makatazho, kabiji nayuka’mba pa juba pa juba tubena kufwenya kwipi na kimye makatazho onse kyo akapwa.”a

• Yukai amba Lesa wimuta bingi muchima. (1 Petelo 5:7) Kuyuka kino kishinka kwibakwashishe bingi ba Mabel. Baambile’mba: “Kimye kyo bantwajile ku kipatela na kuntumbula, nemwenejile buneme bwa byambo biji pa Isaya 41:10 Lesa po aamba’mba: ‘Kuba moyo ne, mambo amiwa nji nobe.’ Kyantekeneshe bingi pa kuyuka’mba Yehoba wanta bingi muchima.”

Nanchi mwayuka nyi? Baibolo ufunjisha’mba kimye kibena kwiya bantu kyo bakabulanga kukolwa.—Isaya 33:24; 35:5, 6.

[Tubyambo twa mushi]

MUTWE WA PA NKUPIKO—BYA KUCHINCHIKA INGE MWAPONENWA NA BYA MALWA

Inge Mutemwe Wenu Wafwa

Ba Ronaldo, bekala mu kyalo kya Brazil batainwe mu mapuso a pa mukwakwa. Mu onka ano mapuso, bashabo ne bainabo kubikapotu ne balongo babo basatu bafwile. Ba Ronaldo baambile’mba: “Naikele mu kipatela bañondo babiji kwa kubula kuyuka’mba bansemi ne balongo bami bafwile mu oa mapuso.”

Kabiji baambile’mba: “Byo bambujile, patanshi kechi naswile’mba bafwa ne. Natendekele kwiipuzha’mba, bafwa byepi bonse pa kimye kimo? Kimye kyo nayukile’mba kya kine bafwa, navulañene. Kyangye kwikalapo na bulanda bo najinga nabo pa kyokya kimye ne. Pa moba alondejilepo, naumvwanga nobe kechi nakonsha kwikala bunke ne. Najilanga pa juba pa juba pa bañondo bavula. Nelangulushanga’mba nanchi inge yami naendeshenga motoka, kampe inge kechi bafwile ne.

“Papita ne myaka 16 kufuma kimye kyo bafwile kabiji kechi njila byonka byo najilanga kala ne. Nangwa byonkabyo, lufu lwabo lwandengela kumvwa’mba nashalatu bunke.”

BYA KUCHINCHIKA BYA MALWA

• Kwikanya kujila ne. Baibolo waamba’mba kuji ‘kimye kya kujila.’ (Musapwishi 3:1, 4) Ba Ronaldo baambile’mba: “Kimye kyonse inge naumvwa bulanda, kechi nekanyanga kujila ne. Kwikanya kujila kechi kwakonsheshe kunkwasha ne, mambo inge najila naumvwanga nobe bulanda bwakepako.” Pano bino, bantu bonse kechi bamwesha bulanda mu jishinda jimo ne. Onkao mambo, umvwe mwabula kujila kimye kyo mwaumvwa bulanda, kechi kilumbulula’mba mubena kwikanya kujila ne, kabiji kechi mwafwainwa kwikanjikizha kujila ne.

• Chinuzhukai kwipatula ku bakwenu. (Byambo bya Mana 18:1) Ba Ronaldo baambile’mba: “Kechi nakebanga kwipatula ku bantu ne. Bantu baiyanga na kummona kabiji nebatambwilanga bingi bulongo. Kikwabo kyo naubanga ke kubuulako mukazhami ne bakwetu byo naumvwanga.”

• Kechi mwafwainwa kuzhingila ne umvwe muntu wimwambila byambo bikozha ku muchima nabiji bya kuba’mba, “Kwakamwa ne, bintu bya uno mutundu bimweka.” Ba Ronaldo bavuluka’mba: “Byambo bimo byaambanga bantu amba bantekeneshe byandefulangatu.” Mu kifulo kya kuta maana ku byambo bilefulañana, londelainga lujimuno lwawama lwa mu Baibolo lwa kuba’mba: “Kechi muteshe muchima ku byonsetu byo bamba bantu ne.”—Musapwishi 7:21.

• Fundai bukine pa byo kikala inge muntu wafwa. Ba Ronaldo baambile’mba: “Pa Musapwishi 9:5 Baibolo walumbulula’mba bafwa kechi babena kuyanda ne, kabiji kino kishinka kitutekenesha bingi. Kabiji Baibolo witufunjisha kuba’mba kukekala lusanguko kabiji bafwa bakekala na bumi jibiji. Onkao mambo mmona nobe batemwe bami bafwa bayatu ku mpuzha kwalepa kabiji bakabwela.”—Byubilo 24:15.

Nanchi mwayuka nyi? Baibolo walaya kimye Lesa kyo ‘akamina lufu kya kuba’mba kechi lukekalapo jibiji ne.’a—Isaya 25:8.

Bino bibaba byalondankana byaamba pa byo mwakonsha kuba pa kuchinchika bya malwa. Pa kuba’mba muyuke byamba Baibolo pa ene mambo bantu o bamanamina, monai bibaba byalondankana bya kuba’mba “Mambo ka Bintu Byatama o Bimwekela Bantu Boba Byawama?” mu Kyamba kya Usopa kya July 1, 2014.

[Tubyambo twa mushi]