Nakonsha Kwikala Byepi Kamonyi wa kwa Yehoba?

Pa kuba’mba mwikale Kamonyi wa kwa Yehoba, mwafwainwa kulondela bintu byaambilepo Yesu byanembwa mu Mateo 28:19, 20. Kino kinembelo kyaamba pa byafwainwa kuba muntu pa kuba’mba ekale mwana wa bwanga wa kwa Kilishitu, kabiji mwavwangwa kwamba, nangwa’mba kusapwila pe Yehoba.

Kintu kitanshi: Fundai Bifunjisha Baibolo. Yesu wakambizhe baana banji ba bwanga “kufunjisha bantu. (Mateo 28:19, 20) Kyambo kyo batuntulula kya “mwana wa bwanga” kilumbulula “ubena kufunda.” Mu Baibolo muji bintu byafunjishe Yesu byakonsha kwimulengela kwikala na lusekelo mu bwikalo. (2 Timoti 3:16, 17) Twakonsha kutemwa kwimukwasha kuyuka bifunjisha Baibolo kupichila mu kwimufunjisha Baibolo kyatutu.​—Mateo 10:7, 8; 1 Tesalonika 2:13.

Kya bubiji: Londelainga byo mufunda. Yesu waambile’mba aba babena kufunda bafwainwa ne ‘kulama bintu byonse byo akambizhe.’ (Mateo 28:20) Kino kyalumbulula’mba kechi mwafwainwa kufundangatu Baibolo ne, bino mwafwainwa kupimpula byubilo byenu ne milanguluko. (Byubilo 10:42; Efisesa 4:22-29; Bahebelu 10:24, 25) Pa kupitapo kimye, aba balondela byakambizhe Yesu befuukwilapo abo bene kumulondelanga pa kupana bumi bwabo kwi Yehoba Lesa.​—Mateo 16:24.

Kya busatu: Mwafwainwa kubatizhiwa. (Mateo 28:19) Mu Baibolo, lubatizhilo belwesakanya ku kuzhiika. (Monai Loma 6:2-4.) Ke kiyukilo kimwesha kufwa ku bwikalo bwapita bo twajingamo ne kutendeka bwa katataka. Onkao mambo, lubatizhilo ke kwiyukisha patoka amba mwauba bintu bibiji byaambilepo Yesu kabiji mubena kulomba Lesa kutokesha jiwi jenu ja mu muchima.​—Bahebelu 9:14; 1 Petelo 3:21.

Nakonsha kuyuka byepi inge nafikilamo kubatizhiwa?

Buulai bakulumpe mu kipwilo. Mukesamba nabo pa kuba’mba bakamone inge mwaumvwisha bilumbulula lubatizhilo, inge mubena kulondela byo mwafunda kabiji mwifuukwilapo anweba bene kwipana kwi Lesa.​—Byubilo 20:28; 1 Petelo 5:1-3.

Nanchi baana ba Bakamonyi nabo bafwainwa kulondela bino pa kubatizhiwa nyi?

Ee. Tukomesha baana betu “mu kwibajimuna ne kwibafunjisha maana a Yehoba,” byonkatu byakambizha Baibolo. (Efisesa 6:4) Nangwa byonkabyo, inge bakoma, bafwainwa kwifuukwilapo abo bene kufunda ne kulondela byo babena kufunda mu Baibolo saka bakyangye kufikilamo kubatizhiwa. (Loma 12:2) Kabiji muntu yense wafwainwa kwifuukwilapo mwine kupopwela Lesa.​—Loma 14:12; Ngalatiya 6:5.