Nanchi byo twaambapo peulu byo bimulengela kukankazhama kutendeka kutanga Baibolo nyi? Bavula kutanga Baibolo kwibaletela bingi mukose. Mwakonsha kuba byepi inge mwayuka’mba Baibolo yakonsha kwimuletela lusekelo mu bwikalo bwenu? Kabiji mwakonsha kuba byepi inge kuji mashinda akonsha kwimukwasha kwiyowa kutanga Baibolo? Nanchi mwakonsha kutendeka kutanga Baibolo nyi?

Monai byambapo bantu bamo kutanga Baibolo byo kwibakwasha.

Ezekiel uji na myaka ya mu ma 20 waambile’mba: “Kala kechi nayukile kintu kyanema mu bumi bwami ne. Bino kutanga Baibolo kwankwasha bingi mu bwikalo wami. Mu Baibolo muji mafunde awama o ndondela pa juba pa juba.”

Frieda uji na myaka ya mu ma 20 waambile’mba: “Kala najinga bingi na kanswatu. Kutanga Baibolo kwandengela kutekanya. Luno ñumvwañana na bantu kabiji nji na balunda bavula bingi.”

Ba Eunice baji na myaka ya mu ma 50, baambile’mba: “Baibolo wankwasha kwikala na byubilo byawama.”

Kwesakana na byaamba bano bantu, kutanga Baibolo kwalengela bantu bavula kwikala bulongo. Kutanga Baibolo kwakonsha kwimulengela kwikala na byubilo byawama. (Isaya 48:17, 18) Baibolo wakonsha ne kwimukwasha (1) kuyuka bya kufuukula bintu bulongo, (2) kusala balunda bawama, (3) kuyuka bya kuba na bijikila bya mu bwikalo, (4) kufunda bukine bwaamba pe Lesa. Mafunde aji mu Baibolo afuma kwi Lesa. Onkao mambo, inge ke mulondele byaamba Baibolo, mukamwenamo bingi. Byonse bitubuula Lesa byawama bingi.

Mwafwainwa kutendeka kutanga Baibolo. Pano ñanyi bintu byakonsha kwimukwasha kutendeka kutanga Baibolo ne kwiyowa byo mubena kutanga?

Mwafwainwa kuba byepi pa kuba’mba mutemwe kutanga Baibolo ne kumvwisha byo mutanga? Londelai bino bishinka bisatu byakwasha bantu bavula bingi.

Ikalai kwabula kyongo. Monai kuba’mba ko muji kechi kuji kyongo ne. Kabiji kafwako bya kwimuvulañanya pa kutanga ne. Mwafwainwa kwikala muji kyeya kabiji mubena kupita mwela pa kuba’mba mutangenga bulongo.

Nengezhai muchima. Baibolo wafuma kwi Shetu wa mwiulu. Twakonshatu kumvwisha byo tubena kutanga inge twipelula byonka bipelula mwana mucheche ye babena kufunjisha ku bansemi bamutemwa. Inge kujipo bimo byatama byo mwaumvwapo kala pa Baibolo, mwafwainwa kwibilubako ne kutatu muchima pa bisakwimufunjisha Lesa.—Salamo 25:4.

Lombai saka mukyangye kutendeka kutanga. Mu Baibolo muji mambo a Lesa. Onkao mambo, Lesa ye wakonshatu kwitukwasha pa kuba’mba tumvwishe byo tubena kutanga. Lesa walaya “kupana mupashi wazhila ku boba bamulomba!” (Luka 11:13) Mupashi wazhila wakonsha kwimukwasha kumvwisha bilanguluka Lesa pa bintu bimo. Kabiji ukemukwasha ne kumvwisha “bintu byazhika bya Lesa.”—1 Kolinda 2:10

Umvwainga byo mubena kutanga. Kange mupitengamotu kapambala ne. Langulukaingapo pa byo mubena kutanga. Mwafwainwa kwiipuzhanga’mba: ‘Ñanyi byubilo byajinga na uno muntu ye mbena kutangapo? Nakonsha kufunjilako ka ku uno muntu?’

Ibikilai bikonkwanyi. Mwafwainwa kwibikila bikonkwanyi pa kuba’mba mumwenemo mu byo mubena kutanga mu Baibolo. Mwakonsha kwibikila bikonkwanyi nabiji bino byalondelapo: ‘Kuyuka bulongo Lesa, kwikala na byubilo byawama ne kwikala bulongo na bakazhi benu nangwa bamwatawenu.’ Salai byepelo bya mu Baibolo byakonsha kwimukwasha kufikizha bikonkwanyi byenu.a

Bishinka bitanu byo twaambapo bikemukwasha bingi pa kutanga Baibolo. Pano ki ka kyakonsha kwimulengela kutemwa kutanga Baibolo? Kibaaba kyalondelapo kisakukumbula buno bwipuzho.

Kuleta mukose nyi, inyi mumvwa bulongo? Kutanga Baibolo kukemukwasha byepi? Bino byonse byaimena pa byo mutanga Baibolo. Pano twayai tumone byo mwakonsha kuba pa kuba’mba mwiyowenga kutanga Baibolo.

Ingijishainga Baibolo ye batuntulula bulongo. Kikemukatazha kwiyowa kutanga inge mu byo mubena kutanga muji byambo bya kala nangwa byo mwabula kuyuka. Ingijishainga Baibolo wapela kumvwa kabiji muji byambo bifika pa muchima. Mwafwainwa kwingijishanga Baibolo ye batuntulula bulongo.a

Ingijishainga biñambañamba byaiyamo. Luno ma Baibolo avula bingi, kechi kujitu o bapulinta ne. Mwakonsha kutanga Baibolo pa intaneti nangwa ye mwakopolwela pa kompyuta, pa tabuleti nangwa pa foni. Bino biñambañamba byakonsha kwimukwasha kukeba byepelo bikwabo bya mu Baibolo byaamba pa byo mubena kutanga, nangwa kumona ma Baibolo akwabo byo atuntulula byobyo byepelo. Kabiji mwakonsha ne kuteleka ku Baibolo ye batangila jimo. Bavula batelekapo ku bimo inge baji pa lwendo, inge babena kuchapa nangwa inge babena kuba bintutu bikwabo. Nanchi ne anweba mwakonsha kwingijishapo jishinda jimo pa ano jakonsha kwimukwasha nyi?

Ingijishainga mabuku alumbulula Baibolo. Bya kwingijisha pa kufunda Baibolo byakonsha kwimukwasha kumvwisha byo mubena kutanga. Mapu amwesha byalo byaambapo Baibolo, byakonsha kwimukwasha kuyuka mapunzha a mu Baibolo kimye kyo mubena kutanga ne kulanguluka pa bintu byamwekelenga mu ano mapunzha. Bibaaba bitanwa mu magazini ne pa keyala wa jw.org/kqn, Pa lubaji lwa kuba’mba “Bifunjisha Baibolo” byakonsha kwimukwasha kumvwisha biji mu Baibolo.

Mwafwainwa kwesekanga mashinda a pusana pusana. Inge kimukatazha kutanga Baibolo kufuma ko atendekela kufika ko apelela, nanchi kujipo mabuku a mu Baibolo o mwakonsha kutendekelapo kutanga nyi? Inge mukeba kuyuka bantu bo baambapo mu Baibolo, mwakonsha kutanga bitango byaamba pa bobo bantu. Mashinda akonsha kwimukwasha aji mu kakitenguluzha ka kuba’mba, “Yukai Bulongo Bantu bo Baambapo mu Baibolo.” Nangwa tangai kwesakana na mutwe ye mwasala nangwa byamwekele. Mwakonsha kumonapo jishinda jimo jakonsha kwimukwasha.

Kafwako buku uji nobe Baibolo ne. Mu Baibolo mo mutanwatu mafunde afuma ku Mulenga wetu. (2 Timoti 3:16) Mu Baibolo muji byambo bitukwasha bingi mu bwikalo. O ene mambo, Baibolo o yaambila’mba: “Mambo a Lesa o omi kabiji aji bingi na bulume.” (Bahebelu 4:12) Baibolo witukwasha kikatakata mu mashinda abiji. Witukwasha kwikala bulongo lonka luno, kabiji witukwasha ne kuyuka bulongo Lesa ne milaye yanji.—1 Timoti 4:8; Yakoba 4:8.

Baibolo wakonsha kwimulengela kwikala bulongo. Baibolo wakonsha kwimukwasha mu bwikalo bwenu. Mafunde a mu Baibolo akonsha kwimukwasha mu bino.

• Kuyuka bya kumvwañana mu masongola ne na bantu bakwabo.—Efisesa 4:31, 32; 5:22, 25, 28, 33.

• Inge muji na bijikila nangwa mubena kukolwa.—Salamo 37:8; Byambo bya Maana 17:22.

• Kwikala na byubilo byawama.—1 Kolinda 6:9, 10.

• Inge mwayanda.—Byambo bya Maana 10:4; 28:19; Efisesa 4:28.a

Kulondela mafunde a mu Baibolo kwakwasha bingi balume ne bakazhi ba mu kyalo kya Asia. Byonkatu byo kikala ku bavula inge popo besongolatu, nabo javula bapusenangamo kabiji bakankalwanga kwisamba saka bakasuluka. Bino byo batendekele kulondela byo batanganga mu Baibolo, bintu byaalukile. Ba Vicent baambile’mba: “Byo natangilenga mu Baibolo byakwashishe kuyuka bya kupwisha makatazho o twapichilengamo mu masongola mu meso anteka. Kulondela mafunde a mu Baibolo kwitulengela kwikala bingi na lusekelo.” Bakazhi babo ba Annalou baswile’mba: “Kutanga byapichilemo bantu batongolwa mu Baibolo kwitukwasha bingi. Luno tubena kwikala na lusekelo mu masongola etu kabiji kechi twakizhamo kukeba bya bwikalo ne.”

Kwimukwasha kuyuka bulongo Lesa. Ba Vicent baambile pa masongola abo amba: “Kutanga Baibolo kwandengela bingi kufwenya pepi ne Yehoba.” Byaambile ba Vicent byamwesha kuba’mba kutanga Baibolo kwakonsha kwimukwasha kwikala balunda na Lesa. Inge mwatendeka kutanga Baibolo, ne anweba Lesa ukekala mulunda nenu. Mukayuka ne bintu byawama byo aamba biji kulutwe, kimye kyo mukekala na “bumi bwa kine kine” myaka ne myaka. (1 Timoti 6:19) Kafwako buku mukwabo wakonsha kwimulengela kuyuka bino bintu ne.

Inge ke mutange Baibolo ne kulondela byo yaamba, ne anweba mukamwenamo bingi lonka luno kabiji mukamuyuka bulongo Lesa. Bimo byo mukatanganga mu Baibolo kechi mukebyumvwishanga ne, byonka byo kyajinga ku ntungu mwina Etiopya wajingako kala luno papita ne myaka 2,000. Wajinga na mepuzho avula bingi. Byo bamushikishe inge wayukile byo atangilenga, wakumbwile’mba: “Nakonsha kwibiyuka byepi kwa kubula muntu wa kundumbulwila?”b Uno ntungu bamulumbulwijile byo atangilenga kwi Filipa wajinga mwana wa bwanga wa kwa Yesu. (Byubilo 8:30, 31, 34) Ne anweba inge mukeba kuyuka bulongo byaamba Baibolo, lombai kwimufunjisha kyatutu pa www.jw.org/kqn nangwa tuminai pa keyala wetu uji mu uno magazini. Kabiji mwakonsha kwisamba na Bakamonyi ba kwa Yehoba bekala koko kwenu nangwa yai pa Nzubo ya Bufumu iji ku mpunzha ko mwikela. Nga mambo ka a kubujila kutendeka kutanga Baibolo lelo jonka pa kuba’mba mwikalenga bulongo?