Nanchi Lesa ko Aji Nyi?
Mukumbu wa mu Baibolo
Ee, mambo Baibolo waamba pa bintu bimwesha’mba Lesa kine ko aji. Baibolo witutundaika kwitabila mwi Lesa kechi kuswatu byamba bupopweshi kwa kubula bishinka ne. Bino twafwainwa kwingijisha “bulume bwa kulanguluka” ne “maana.” (Loma 12:1; 1 Yoano 5:20) Akimonai bino bishinka byaimena pa Baibolo:
Kwingila bulongo ne kukwatankana kwa bintu byumi biji mwiulu ne pano pa ntanda kumwesha’mba kuji Mulenga. Baibolo waamba’mba: “Nzubo yonse kuji wiishimika, bino walengele bintu byonse, ye Lesa.” (Bahebelu 3:4) Bino byambo bya kine, mambo ne bantu bavula bafunda bingi baswa kino kishinka.a
Byo tuji bantu, tukebesha bingi kuyuka ene mambo o twaikala na bumi. Akino kyo kintu kyo tukebesha bingi kukilatu ne nzala ya kukeba kuja kajo. Akino kyo kishinka kyaambapo Baibolo amba “muchima wa kukeba kuyuka Lesa” ye tupopwela. (Mateo 5:3; Lumwekesho 4:11) Uno muchima wa kukeba kuyuka Lesa kechi witulengelatu kuyuka’mba Lesa ko aji ne. Bino kumwesha’mba ye Mulenga wakeba’mba atweba tutwajijile kufunda pe aye.—Mateo 4:4.
Bungauzhi bwavula bwa mu Baibolo bwanembelwe kala bwafikile pa kimye kyafwainwa. Kufika ne bishinkatu bikwabo bya bungauzhi bwafikile, kumwesha’mba wibyambile kechi muntu ne.—2 Petelo 1:21.
Banembele Baibolo bayukile bishinka byaamba pa sayansi kukila bantu bajingako pa kyokya kimye. Kala bantu bayukile’mba ntanda beikwata ku banyama bakatampe nabiji banzovu, bangulube nangwa bañombe. Pano bino, Baibolo waamba’mba Lesa “wakobeka ntanda pa lwelele.” (Yoba 26:7) Kabiji Baibolo walumbulula bulongo biji ino ntanda amba “yabuluñana.” (Isaya 40:22) Bantu bavula balanguluka’mba pa kuba’mba banembele Baibolo bayuke bino bishinka, Lesa ye wibabuujile byonse byo banembele.
Baibolo wakumbula mepuzho avula bingi akatazha. Inge bantu bakankalwa kutaana mikumbu ku ano mepuzho akatazha, bamba’mba Lesa kafwako. Mepuzho nabiji ano a kuba’mba: Inge Lesa butemwe kabiji wa bulume bonse, pano mambo ka o kwaikela buyanji ne bubi pano pa ntanda? Mambo ka bupopweshi javula o butundaikila bingi bubi kukila kuba byawama?—Titusa 1:16.
a Wafunda pa bintu bya mulwelele aye Allan Sandage waambile pa jiulu ne ntanda amba: “Amiwa naswa kuba’mba ndonda ya bintu biji mwiulu ne pano pa ntanda kuba byaiyakotu bine ne. Kwafwainwa kwikala wibilengele. Kechi nayuka bulongo inge Lesa ko aji. Bino kuswa kuba’mba Mulenga ko aji kyo kishinkatu kya kulumbulwilamo ene mambo bintu kyo byaikelako.”