7. (a) Hana wachipile’mba ka, kabiji mambo ka? Ki ka kyamwekele? (b) Luchipo lwa kwa Hana lumbulwilenga’mba bwikalo bwa kwa Samwela bukekala byepi? (Monai tubyambo twa munshi.)

⁷ Hana ke muntu mukwabo wafikizhe luchipo lo achipile kwi Yehoba. Walayile Lesa mulaye saka aji na binyenge bikatampe ne bulanda na mambo a myendeleko ya mpaji nanji ne kubula baana. (1 Sam. 1:4-7, 10, 16) Hana walombele na muchima yense kwi Lesa ne kuchipa amba: “Anweba Yehoba wa mabumba, inge mumone lumanamo lwami amiwa wa mwingilo wenu ne kumvuluka, kabiji mwabula kundubako amiwa wa mwingilo wenu ne kumpa mwana wa mulume amiwa wa mwingilo wenu, ne amiwa nkamupana kwi anweba Yehoba moba onse a bumi bwanji, kabiji kechi bakamutendapo nsuki ne.”a (1 Sam. 1:11) Lesa wakumbwile lulombelo lwanji ne kumupa mwana wamulume. Wasangalele bingi. Pano bino, kechi walubilemo luchipo lo achipile kwi Lesa ne. Kimye kyo asemene mwana, waambile’mba: “Namulombele kwi Yehoba.”—1 Sam. 1:20.