Yehoba Ulama Bonse Bamuketekela
“Lusa lwenu lwa butemwe ne bukine bwenu bindamenga myaka.”—MASALAMO 40:11.
1. Mfumu Davida walombele ka kwi Yehoba, kabiji ukobilwa ka kwesakana na kuno kulomba?
DAVIDA MFUMU wa bena Isalela bakala ‘wamupembejile Yehoba’ kabiji waambile’mba “ne aye wabandamine ko [aji], waumvwine ne kwita [kwanji.]” (Masalamo 40:1) Bimye byavula wamwene Yehoba byo alama aba bamutemwa. Onkao mambo, Davida walombele’mba Yehoba amulamenga myaka yonse. (Masalamo 40:11) Byo aji pa banabalume ne banabakazhi bakishinka bakamona “lusanguko lwakila mu kuwama,” Yehoba ubena kumuvuluka kabiji ukamusangula. (Bahebelu 11:32-35) Bwikalo bwanji bwa kulutwe bukawama bingi. Jizhina janji janembwa “mu buku wa kwibavulukilako” wa Yehoba.—Malakai 3:16.
2. Nga Binembelo bitukwasha byepi kuyuka byo kilumbulula kulamwa na Yehoba?
2 Nangwa kya kuba bantu ba lwitabilo batongolwa mu Bahebelu kyapitala 11 bajingako kala kene Yesu Kilishitu saka akyangye kwiya panopantanda ne, bwikalo bo baikelenga bwajingatu byonka byafunjishenga Yesu amba: “Awa watemwa mweo wanji ukamutaya; pakuba awa washikwa mweo wanji panopantanda ukamulama ne ku bumi bwa myaka.” (Yoano 12:25) Onkao mambo, kulamwa na Yehoba kechi kulumbulula’mba pano kyapwa kafwako kumanama nangwa kupatwa ne. Kulamwa na Yehoba ke kuzhikijilwa ku mupashi kuba’mba twikale baitabilwa ne aye.
3. Twayuka byepi amba Yesu Kilishitu bamulamine kwi Yehoba, kabiji ki ka kyafuminemo?
3 Yesu wamanaminenga ne kunenwa kyatama bingi, kabiji balwanyi banji bamwipayile ne kufwa lufu lwatama bingi. Pano bino, kino kechi kilumbulula’mba Lesa walajile mulaye wanji wa kulama Mesiasa ne. (Isaya 42:1-6) Yesu byo asangukile pa juba ja busatu panyuma ya kufwa lufu lwatama, kimweshatu patoka’mba Yehoba waumvwine misashijilo yanji ya kukeba bukwasho—byonkatu byo aumvwine misashijilo ya kwa Davida. Yehoba wamukoseshe kuba’mba atwajijile kwikala wakishinka. (Mateo 26:39) Yesu bamulamine kabiji kino kyamulengejile kwikala muntu ubula kufwa mwiulu, popamotu ne bantu bavula baitabila mu bukuzhi nabo bakekala na bumi bwa myaka ne myaka.
4. Bena Kilishitu bashingwa ne ‘mikooko ikwabo’ baji na ñanyi luketekelo?
4 Twafwainwa kuketekela’mba byonkatu Yehoba byo alamine Davida ne Yesu, ne ano moba byo byo akonsha kulama bakalume banji. (Yakoba 1:17) Balongo bashingwa ba kwa Yesu bakiji panopantanda bafwainwa kuketekela mulaye wa Yehoba wa kuba’mba: “Buswanyi bubula kubola, bubula kutamishiwa, bubula kwaluka, bo bemulamina mwiulu, yenka anweba bo balama konka ku bulume bwa Lesa mambo a lwitabilo lwenu, amba, mukamone lupulukilo lo baubila jimo, amba, lukasoloke mu juba jikapelako.” (1 Petelo 1:4, 5) ‘Mikooko ikwabo’ iji na luketekelo lwa kwikala panopantanda, nayo yafwainwa kuketekela mwi Lesa ne milaye yanji byonka byamwesha ne byambo bya nyimbi wa Masalamo bya kuba’mba: “Mutemwai Yehoba, anweba bazhijikwa banji bonse. Yehoba wibalama batekanya.”—Yoano 10:16; Masalamo 31:23.
Kulamwa ku Mupashi
5, 6. (a) Bantu ba Lesa balamwa byepi ano moba? (b) Bena Kilishitu bashingwa baji na bulunda bwa mutundu ka ne Yehoba, nga aba baji na luketekelo lwa kwikala panopantanda baji na bwa mutundu ka?
5 Ano moba, Yehoba wanengezha mashinda mwa kulamina bantu banji ku mupashi. Nangwa kya kuba kechi wibalama ku lupato nangwa makatazho ne bya malwa bya mu bwikalo ne, ubena kwibalama ne kwibatundaika kuba’mba bakoseshe bulunda bwabo ne aye. Kitendekesho kyo baalapo buno bulunda bwabo ke lwitabilo lwabo mwi Lesa kupichila mu bukuzhi. Bena Kilishitu bamo bakishinka bashingwa na mupashi wa Lesa kuba’mba bakalamenga pamo ne Kilishitu mwiulu. Batelwa’mba baana ba Lesa baoloka ba ku mupashi, kabiji bino byambo byamba pe abo amba: “Ye witupokolwele mu lūsa lwa mfishi, ne kwitutuntulwila mu bufumu bwa Mwananji ye atemwisha; mwi aye mo mo twamwena bukuzhi bwetu, lo lulekelo lwa mambo etu.”—Kolose 1:13, 14.
6 Bena Kilishitu bavula bakishinka nabo bakonsha kumwenamo mu lunengezho lwa Lesa lwa bukuzhi. Tutanga amba: “Mwana muntu naye kechi waishila’mba, bamwingijile ne, poso amba, ebengijile, ne kupana mweo wanji ke kya kukula bavula.” (Mako 10:45) Bano bena Kilishitu batengela kimye kya kulutwe mo bakelemenanga ‘bwana bwa bene bwa lukumo bwa baana ba Lesa.’ (Loma 8:21) Kabiji banemeka bingi bulunda bwabo na Lesa ne kukebesha kukosesha buno bulunda.
7. Ano moba Yehoba ulama byepi bakalume banji ku mupashi?
7 Jishinda jimo Yehoba jo alaminamo bantu banji ke kupichila mu kwibafunjisha kimye kyonse. Kino kibalengela kwikala na maana ene alumbuluka. Kabiji kimye kyonse Yehoba wibatangijila kupichila mu Byambo byanji, jibumba janji, ne mupashi wanji wazhila. Kupichila mu buntangi bwa ‘kalume wa kishinka ne wa maana,’ bantu ba Lesa mwaya ntanda yonse ke kisemi kimotu. Jibumba ja kalume jinengezha kajo ka ku mupashi kabiji kimye kimo umvwe kyakebewa jinengezha ne bintu bya ku mubiji ku kisemi kya bakalume ba Yehoba nangwa kya kuba bano bantu bafuma mu mikoka ne byalo byapusana pusana.—Mateo 24:45.
8. Yehoba ulengela bantu banji bakishinka kwikala na ñanyi luketekelo, kabiji wibalaya ka?
8 Byonkatu Yehoba byo abujile kumuzhikijila Yesu ku mubiji ku balwanyi banji, ne ano moba kechi uzhikijila bena Kilishitu ku mubiji ne. Pano bino, kino kechi kilumbulula’mba Lesa witushikwa ne. Lesa kuba witushikwa nangwa pachechetu ne! Kino kimwesha luketekelo lo etuketekela mambo twayuka’mba aye yenkatu ye mfumu kwapwa. (Yoba 1:8-12; Byambo bya Mana 27:11) Yehoba kechi ukalengesha bumvu bantu bakishinka ne, “mambo Yehoba watemwa buchibamambo bwaoloka, ne kwibalekelela bazhijikwa banji ne; abo balamwa myaka ne myaka.”—Masalamo 37:28.
Kulamwa mu Lusa lwa Butemwe ne Bukine
9, 10. (a) Nga bukine bwa Yehoba bulama byepi bantu banji? (b) Baibolo umwesha byepi amba Yehoba ulama bantu banji bakishinka kupichila mu lusa lwanji lwa butemwe?
9 Mu lulombelo lwanji lwanembwa mu Salamo 40, Davida washikishe kumulama mu lusa lwa butemwe bwa Yehoba ne bukine. Bukine bwa Yehoba ne butemwe bwa kutemwa bololoke bimulengela kumweshatu patoka bintu byo akeba. Aba bekala mwayila bintu byo akeba wibalama ku bya malwa, moyo, ne makatazho bipitamo aba bebikana. Kya kumwenako, twakonsha kwizhikijila atwe bene ne balunda netu ku makatazho avula umvwe ke tubule kwingijisha bizhima ne kutoma malwa bibi, kuchinuzhuka bulalelale, ne bwikalo buncha. Nangwa aba bafuma mu jishinda ja Yehoba ja bukine—byonka byaubile Davida kimye kimo—kitekenesha bingi kuyuka amba Lesa ye “kyakufyamamo” bandengamambo balapila. Bantu ba uno mutundu bakonsha kwamba’mba: “Mukandamwina ku byakatazha.” (Masalamo 32:7) Kine luno byo lwaikalapo lusa lwa butemwa bwa Lesa!
10 Kya kumwenako kikwabo kya lusa lwa butemwe bwa Lesa ke kya kuba’mba, Lesa ujimuna bakalume banji kubula kwikala ba panopantanda ibi, mambo bukumotu akeyonaune. Tutanga’mba: “Inge mutemwe panopantanda nangwa bya panopantanda ne. Umvwe muntu watemwa panopantanda, butemwe bwa kutemwa Tata kechi buji mwi aye ne. Mambo byonse biji panopantanda, lwiso lwa mubiji, ne lwiso lwa meso, ne kwitota kwatu kwa buno bumi, kechi byo bya Tata ne, nanchi byo bya panopantanda.” Umvwe twaumvwina luno lujimuno ne kubila monka mo lwaambila, twakonsha kulama bumi bwetu myaka ne myaka, mambo kinembelo kyatwajijila kwamba’mba: “Kabiji panopantanda pakapita ne lwiso lwapo; pakuba aye uba kyaswa muchima wa Lesa ukekala myaka ne myaka.”—1 Yoano 2:15-17.
Kulamwa na Maana ne Milangwe
11, 12. Londololai maana ne milangwe byo bitulama.
11 Aba bonse bakeba kwitabilwa na Lesa, Solomone mwana Davida wanembele’mba: ‘Maana a kupima bintu akakusopanga, ne milangwe ikakulamanga.’ Kabiji wakambizhe amba: ‘Wikale na maana . . . kechi wialeke maana ne, ne ao akakulama.’—Byambo bya Mana 2:11; 4:5, 6.
12 Twikala ba maana umvwe ke tulanguluke pa byo tufunda mu Byambo bya Lesa. Kuba bino kuketulengela kwikala ba maana ne kuyuka bintu byo twafwainwa kuba. Kino kyanema bingi, mambo atweba bavula twayuka—kampepo kupichila mu bintu byo twapitamo—kuba’mba makatazho eya umvwe ke tube bintu mu jishinda jabula kufwainwa. Ntanda iji mu maboko a kwa Satana ikeba’mba tutemweko bunonshi, kuya nkuwa, ne bulume, pano bino Yehoba witutundaika kuta muchima pa bintu bya ku mupashi. Kukeba bunonshi, kuya nkuwa, ne bulume, byakonsha konauna bisemi, bulunda, ne bintu bya ku mupashi. Kabiji kifumamo muntu wakonsha kujilamotu mpwa kubula mambo kwesakana na byaambile Yesu amba: “Muntu nangwa ukanonka ntanda yonse, ne kutaya mweo wanji, bino ukajilamo ka?” (Mako 8:36) Maana amwesha’mba twafwainwa kumvwina lujimuno lwa kwa Yesu lwa kuba’mba: “Nanchi sambilai kukebesha bufumu bwanji, ne bololoke bwanji; ne bino bintu byonse bikemubikilwapo.”—Mateo 6:33.
Kwita Muchima Atwe Bene Kwatama
13, 14. Kwita muchima obe mwine kulumbulula ka, kabiji mambo ka o kwaikela bumbulwa maana?
13 Mu kisemwatu bantu beta bingi muchima abo bene. Pano bino, umvwe muntu mu bwikalo bwanji bonsetu wanemekako bintu byo akeba, kino kileta bingi makatazho. Onkao mambo, pa kuba’mba tulamawizhe bulunda bwetu ne aye, Yehoba witufunjisha kubula kwita muchima atwe bene. Kwita muchima obe mwine kulumbulula “kufundumanatu na kufumpila bintu byo ukeba obe mwine.” Nanchi kino kechi kibena kumweshatu patoka biji byubilo bya bantu ano moba nenyi? Ee, Baibolo waambatu patoka’mba “mu moba akapelako,” a bwikalo bubi bwa kwa Satana, “bantu bakekala betemwa abo bene,” nangwa’mba ba kwita muchima.—2 Timoti 3:1, 2.
14 Bena Kilishitu bomvwina mukambizho wa mu Baibolo wa kutesha muchima ku bintu bya bakwabo, kwibatemwa byonka byo betemwa abo bene. (Luka 10:27; Filipai 2:4) Bena kengi bakonsha kulanguluka’mba kuba kyakonsheka ne, pano bino kyanema bingi umvwe tukeba kwikala bulongo mu masongola, kwikala na kisemi kyawama, kabiji ne kwikala na balunda ba kine. Onkao mambo, kalume wa Yehoba kechi wafwainwa kwikala muzha ku kino kyubilo kya kwitemwa aye mwine mu bwikalo bwanji bonsetu kya kuba ke akankalwe ne kuta muchima ku bintu bya ku mupashi ne. Kintu kyanema, wafwainwa kuta muchima kwi Yehoba Lesa ye apopwela.
15, 16. (a) Byubilo bya kwita obe mwine muchima mwakonsha kufuma ka, kabiji ñanyi wa kumwenako mu kino? (b) Kwambatu kine, muntu upelawizha kuzhachisha bakwabo uba byepi?
15 Byubilo bya kwita muchima obe mwine byakonsha kulengela muntu keemone’mba waoloka, kabiji kino kyakonsha kumulengela kwikala wabula maana, witota. Baibolo wambatu patoka’mba: “Obewa muntu uzhachisha mukwenu, nangwa wi wa byepi, wabula ne mwa kwibingishisha obe mwine; pakuba monka mo uzhachisha mukwenu, wifwisha nao obe mwine; mambo ne obewa umuzhachisha, wibyuba abya byonka bimotu.” (Loma 2:1; 14:4, 10) Bantangi ba bupopweshi ba mu moba a kwa Yesu bemonanga’mba baoloka abo bene, onkao mambo balengululwilenga Yesu ne baana banji ba bwanga. Mu kuba bino baikele ke ba kuzhachisha bakwabo. Byo babujile kuyuka bilubo byabo, bezhachishenga abo bene.
16 Yudasa mwana wa bwanga wa kwa Yesu wamusolwele, waikele ke wa kuzhachisha bakwabo. Mu Betani, Maliya nyenga ya kwa Lazalasa byo ashingile maulu a kwa Yesu na manyi a lupoto lwanema, Yudasa wamukajipijile kyabaya bingi. Waambile byambo bya kumunena’mba: “Mambo ka ano manyi abujilwe kupotwa na mali bitota bisatu, ne kupana ku balanda?” Jishimikila ja mu Baibolo jatwajijila’mba: “Byo aambile bino, kechi mambo a kutesha muchima wanji ku balanda ne; mambo onka aye wajinga ngivi, kabiji byo asendelenga fukuta watolelengamo byo babikilengamo.” (Yoano 12:1-6) Onka mambo, kechi twafwainwa kwikala nobe Yudasa nangwa bantangi ba bupopweshi ne, mambo bazhachishanga bakwabo kabiji mu kuba bino bezhachishenga abo bene.
17. Lumbululai byo kyatamina kwita muchima obe mwine nangwa kwilundumika.
17 Bino nangwa kechi bajinga bangivi nobe Yudasa ne, bena Kilishitu bamo batanshi baikele ba kwitota ne kwita muchima abo bene. Na mambo a bino byubilo, Yakoba wanembele’mba: “Pakuba pano mubena kwitotela mu kwitakaika kwenu kwatu.” Kabiji wanungilepo amba: “Kwitota konse kwa byonkabyo ko kubi.” (Yakoba 4:16) Kwitota pa bintu byo tuba nangwa pa mingilo yo twingila mu mwingilo wa Yehoba ke kukosama. (Byambo bya Mana 14:16) Vulukai kya mumwekejile mutumwa Petelo, wiketekejile ne kwilundumika aye mwine amba: “Bonse nangwa basa kwituntula pe anweba, amiwa kechi nketuntule ne. . . . Amiwa nangwa mfwe nenu, kechi nsa kwimukana ne.” Kwambatu kine, kechi twafwainwa kuba ke twilundumike ne. Mambo byonse byo tuji nabyo, ke na mambotu a lusa lwa butemwe bwa Yehoba. Umvwe ke tuvuluke kino kishinka kimye kyonse kechi tuketotanga nangwa kwilundumika ne.—Mateo 26:33-35, 69-75.
18. Yehoba wibamona byepi bantu betota?
18 Twajimunwa amba: “Awa witota kulutwe ukonaika, kabiji awa uji na muchima wilundumika kulutwe ukapona.” Mambo ka? Yehoba wakumbula’mba: “Kwitota ne kwilundumika . . . byo byo nashikwa.” (Byambo bya Mana 8:13; 16:18) Yehoba wamuzhingijile bingi “mfumu wa Asilya na mambo a kwitota kwanji kwa misula ne kwilundumika kwanji.” (Isaya 10:12) Kabiji wamukambwile na mambo a kuno kwitota kwanji kwa misula. Bukumotu ntanda ya kwa Satana ne bantangi bayo bamweka ne babula kumweka, betota ne kwinemeka abo bene bakebakambule. Mwane atweba kine kechi twafwainwa kulonda byubilo bya kwitota bya bano balwanyi ba Yehoba ne!
19. Bakalume ba Lesa bomvwa byepi, pano bino bafwainwa kuba ka?
19 Bena Kilishitu bakine bomvwa bingi bulongo pa kwikala bakalume ba Yehoba. (Yelemiya 9:24) Pano bino, bafwainwa kwipelula. Mambo ka? Mambo “bonse balenga mambo, kabiji bapelelelatu ne kufika ku lukumo lwa Lesa ne.” (Loma 3:23) Onkao mambo, byo tuji bakalume ba Yehoba, pa kuba’mba twilame twafwainwa kwikala na muchima wajingapo na mutumwa Paulo, waambile’mba “Kilishitu Yesu waishile panopantanda mu kupulusha bandengamambo,” kabiji wanungilepo amba: “Mwi abo yami mwine wakilamo kulenga mambo.”—1 Timoti 1:15.
20. Yehoba ulama byepi bantu banji ano moba, kabiji kulutwe na lwendo ukebalama byepi?
20 Bantu ba Lesa byo banemeka bintu bya ku mupashi kukila kunemeka bintu bya ku mubiji, twafwainwa kuketekela’mba Yehoba ukatwajijila na kwibalama ku mupashi. Kabiji twafwainwa kuketekala’mba umvwe malwa akatampe atendeka, Yehoba ukalama bantu banji kechi ku mupashi konkatu ne, ukebalama ne ku mubiji. Byo bakatwela mu ntanda ipya ya Lesa, bakabijika na lusekelo amba: “Talai, uno ye Lesa wetu; twamupembejilenga, namba aketupulushe; uno ye Yehoba, twamupembejilenga; twayai tusekele ne kusangalala mambo witupulusha.”—Isaya 25:9.
Mukivuluka nyi?
• Mfumu Davida ne Yesu Kilishitu balaminwe byepi?
• Bantu ba Yehoba ano moba babena kulamwa byepi?
• Mambo ka o twafwainwa kuchinuzhukila kwita muchima atwe bene?
• Mambo ka o twakonsha kumvwina bulongo ne kwikala bepelula?
[Bipikichala pa peja 19]
Yehoba walamine byepi ba Davida ne Yesu?
[Bipikichala pa peja 21]
Mu ñanyi mashinda bantu ba Lesa mo babena kulaminwa ku mupashi ano moba?
[Bipikichala pa peja 22]
Nangwa tumvwa bulongo byo twingijila Yehoba, kimye kyonse twafwainwa kwipelulanga