Tambwilainga na Lusekelo Panainga na Muchima Yense
YEHOBA, Shetu wa mwiulu wa butemwe wituta muchima pa muntu pa muntu. Mambo a Lesa etubula kuba’mba wata muchima bakalume banji bonse. (1 Pe. 5:7) Jishinda jimo jo etutelamo muchima Yehoba ke kupichila mu kwitupa bukwasho bwapusana pusana pa kuba’mba tumwingijilenga mu bukishinka. (Isa. 48:17) Kikatakata kimye kyo tupita mu makatazho etulengela kwikala na bulanda, Yehoba ukeba atweba kumwenamo mu bukwasho boapana. Kino kishinka kimwekela mu Mizhilo ya Mosesa.
Mu Mizhilo ya Mosesa, Yehoba wanengezhezhe bukwasho bwa butemwe ku “bayanji,” nabiji baana bakishale, banabakazhi bafwilwa, ne benyi. (Levi 19:9, 10; Mpitu. 14:29) Wayuka’mba bakalume banji bamo bakonsha kukeba bukwasho ku bena Kilishitu bakwabo. (Yako. 1:27) Onkao mambo, kafwako kalume wanji nangwa umo wafwainwa kuzhinauka kutambwila bukwasho ku boba batundaikwa ne Yehoba kupana buno bukwasho ne. Nangwa byonkabyo, pa kutambwila bukwasho, twafwainwa kuba bino na muchima yense.
Kabiji Mambo a Lesa amwesha kuba’mba bantu ba Lesa baji ne na jishuko ja kupana. Akivulukai jishimikila ja “mulanda mwanamukazhi wafwilwa” ye bamwene kwi Yesu mu nzubo ya Lesa ku Yelusalema. (Luka 21:1-4) Uno mwanamukazhi kyamweka wamwenejilemo bingi mu lunengezho lwa butemwe lwa Yehoba pa mambo a banabakazhi bafwilwa byonka byo kyaambiwapo mu Mizhilo. Nangwa kya kuba wajinga mulanda, uno mwanamukazhi wafwilwa uvulukwa, kechi na mambo a kutambwila ne, bino ke na mambo a kupana. Bumpanyi bwanji bwafwainwa bwamuletejile bingi lusekelo, mambo Yesu waambile’mba: “Lusekelo lo bamona aba bapana lwakila lo bamona aba batambula.” (Byu. 20:35) Kwesakana na kino kishinka, mwakonsha ‘kupana’ byepi ne kwikala ba lusekelo?—Luka 6:38.
“I ki ka kyo Nkamupa Yehoba?”
Nyimbi wa masalamo waipwizhe’mba: “Lelo i kika kyo nkamupa Yehoba Na mambo a byanji byonse byawama byo angubila?” (Sala. 116:12) Mfweto ka yo atambwijile? Yehoba wamukwashishe mu bimye “byakatazha ne bulanda.” Kabiji Yehoba ‘wapokolwele muchima [wanji] ku lufu.’ Pano pa kino kimye, wakebelenga ‘kupapo’ Yehoba bintu bimo. Nanchi nyimbi wa masalamo wakonsheshe kuba ka? Waambile’mba: “Nkamubila Yehoba byo nachipile.” (Sala. 116:3, 4, 8, 10-14) Wafukwilepo kulama milaye yonse yo alaile kwi Yehoba ne kwiifikizha.
Ne anweba mwakonsha kuba bino. Mu ñanyi jishinda? Kupichila mu kwikala bwikalo bwakwatankana na mizhilo ne mafunde a Lesa kimye kyonse. Onkao mambo, monai kuba’mba kupopwela Yehoba kyo kintu kyakilamo kunema mu bumi bwenu ne kuleka mupashi wa Lesa kwimutangijila mu byonse byo muba. (Sapwi. 12:13; Nga. 5:16-18) Pano bino kwambatu kine, kechi mwakonsha kumubwezhezha Yehoba bintu byonse byawama byo emubila ne. Nangwa byonkabyo, ‘kimusangajika bingi Yehoba’ pa kumona kuba’mba mubena kwipana mu mwingilo wanji na muchima wenu yense. (Mana. 27:11) Byo jaikalapo jishuko kusangajika muchima wa Yehoba mu jino jishinda!
Kwashainga Kipwilo Kukoma ku Mupashi
Kwa kubula nangwa kuzhinaukatu ne, musa kwitaba kuba’mba mwamwenamo mu kipwilo kya bwina Kilishitu mu mashinda avula. Kupichila mu kipwilo, Yehoba wapana kajo ka ku mupashi kavula. Mwatambwijile bukine bwimulengejile kukasuluka ku bupopweshi bwa bubela ne ku mfishi ya ku mupashi. (Yoa. 8:32) Pa kupwila kwa kipwilo, ne kupwila kukatampe, kwanengezhezhe ‘kalume wa kishinka kabiji wa maana,’ mwafunjile maana atangijila ku bumi bwa myaka mu paladisa panopantanda mukabula misongo ne buyanji. (Mat. 24:45-47) Abya mwakonsha kubala mfweto yonse yo mwatambwila kupichila mu kipwilo kya Lesa kabiji ne yo mukatambwila kulutwe na lwendo nyi? Ki ka ne anweba kyo mwakonsha kupana ku kipwilo?
Mutumwa Paulo wanembele’mba: “Mubiji yense, byo anungakana pamo ne kusambakana ke umo konka ku abya bipana manungi onse, pa kwingila bulongo byonse pa kintu, pa kintu, mubiji uya na kubaya ne kwikomesha mwine monka mu butemwe.” (Efi. 4:15, 16) Nangwa kya kuba kino kinembelo kyaamba kikatakata ku jibumba ja bena Kilishitu bashingwa, jifunde jijimo jakonsha kwingila ne kubena Kilishitu bonse lelo jino. Ee, yense mu kipwilo wakonsha kulengela kipwilo kukomenako ku mupashi ne kubailako. Mu ñanyi mashinda?
Twakonsha kuba bino kupichila mu kwibikako kimye kyonse kutundaika ne kukwasha bakwetu ku mupashi. (Loma 14:19) Twakonsha ne kulengela ‘mubiji kubaya’ kupichila mu kumwesha bipangwa bya mupashi wa Lesa mu byo tuba na bakwetu ba mu lwitabilo. (Nga. 5:22, 23) Kunungapo, twakonsha kutanapo bimye bya kuba’mba “twibobile bantu bonse byawama, pakuba bene bene bonka bakwetu ba mu lwitabilo.” (Nga. 6:10; Hebe. 13:16) Bonse mu kipwilo, ko kuba’mba balongo ne banyenga, banyike ne bakulumpe, bakonsha kwikala na lubaji mu ‘kukomesha mubiji mu butemwe.’
Kunungapo, twakonsha kwingijisha maana etu, ngovu, ne bintu byetu bya ku mubiji kwivwanga mu mwingilo wa kupulusha myeo wingila kipwilo. Yesu Kilishitu waambile’mba: “Mwatambulatu.” Twafwainwa kubapo byepi? Waambile’mba: “Panaitu.” (Mat. 10:8) Onkao mambo, Ingilaingako pakatampe mwingilo wanema wa kusapwila Bufumu ne kulenga baana ba bwanga. (Mat. 24:14; 28:19, 20) Abya mwakepelwa bulume bwa kuba bino nyi? Akivulukai mwanamukazhi wafwilwa mulanda ye baambilepo kwi Yesu. To apaine twajinga tucheche bingi. Pano bino, Yesu waambile’mba wapaine byavula pa bonse. Wapaine byonse byo akonsheshe kupana.—2 Ko. 8:1-5, 12.
Tambwilainga na Muchima Yense
Nangwa byonkabyo kwakonsha kwikalako bimye bimo byo mwakonsha kusaka bukwasho ku kipwilo. Kechi mwafwainwa kuzhinauka kutambwila bukwasho bwakonsha kwimupa kipwilo umvwe kemupite mu makatazho a mu buno bwikalo ne. Yehoba wapana banabalume bafikapo kulama ne ‘kujiisha kipwilo kya Lesa’ ba kwimukwasha umvwe kemupite mu meseko ne lumanamo. (Byu. 20:28) Bakulumpe ne bakwabo mu kipwilo bakeba kwimutekenesha, kwimukwasha ne kwimuzhikijila mu bimye byakatazha.—Nga. 6:2; 1 Tesa. 5:14.
Pano bino umvwe bemupa bukwasho bomukeba, monai’mba mwibutambwila na muchima yense. Kimye kyonse tambwilainga bukwasho bo bemupa na lusanchilo. Monainga bukwasho bo bemupa bena Kilishitu bakwenu kuba’mba ke bupe bwa Lesa. (1 Pe. 4:10) Kino kyanemena ka? Mambo kechi tukeba kutambula bitambwila bantu ba mu ino ntanda babula kusanta ne.
Yukainga pa Kupelela ne Kuba Bintu na Maana
Mu nkalata yanji ku kipwilo kya ku Filipai, Paulo wanembele pa mambo a kwa Timoti amba: “Kechi nji na muntu mukwabo uji na muchima pamo ne aye, ukateshako bulongo muchima ku bwikalo bwenu ne.” Pano bino Paulo wanungilepo’mba: “Bonse besakila byabo bene, kechi bintu bya kwa Yesu Kilishitu ne.” (Fili. 2:20, 21) Kwesakana na byaambile Paulo, nga atweba lelo jino twakonsha kuchinuzhuka byepi kutabankana na ‘kwikebela bintu byetu’?
Kechi twafwainwa kukizhamo kukatazha bakwetu mu kipwilo umvwe ke twibalombe kwitukwasha mwakubila na makatazho ne. Mambo ka? Akilangulukai pa kino: Kwa kubula nangwa kuzhinaukatu ne, twafwainwa kusanta bingi umvwe mulongo witupa bukwasho bwa bintu bimo bya ku mubiji kimye kya makatazho a kupulumukatu. Nanchi abya twakonsha kumukanjikizha kwitupa buno bukwasho nyi? Ine. Po pamotu, nangwa kya kuba balongo betu kimye kyonse bakeba kwitukwasha, twafwainwa kuyuka pa kupelela ne kuba bintu na maana byo tuketekela kuba’mba bakonsha kwitupa abo bene po bakebela kuba bino. Mambo byonse bakwetu ba mu lwitabilo byo boba mu kwitukwasha kupwisha makatazho, tusaka abo kwibyuba na muchima yense.
Kwa kubula nangwa kuzhinaukatu ne, balongo ne banyenga ba bwina Kilishitu benengezha kwipana kwimukwasha kimye kyonse. Nangwa byonkabyo, kimo kimye bakonsha kukankalwa kwimukwasha mu byonse byo musaka. Umvwe kyaikala bino, ketekelai kuba’mba Yehoba ukemukwasha, byonka byo akwashishe nyimbi wa masalamo, mu meseko onse o mwakonsha kupitamo.—Sala. 116:1, 2; Fili. 4:10-13.
Byonkabyo, kechi mukankazhame kutambwila lunengezho lonse lo emupa Yehoba ne, kikatakata mu bimye bya malwa. (Sala. 55:22) Ukeba anweba kuba bino. Pano bino, ukeba ne anweba ‘kupana na lusekelo.’ Onkao mambo, ubai monka mo ‘mwafuukwila mu michima yenu,’ kupana papelela bulume bwenu mu kutundaika mpopwelo ya kine. (2 Ko. 9:6, 7) Mu jino jishinda, mukakonsha kuba byonse bibiji, kutambwila na lusekelo ne kupana na muchima yense.
[Kitenguluzha/Bipikichala pa peja 31]
“Lelo i ki ka kyo nkamupa Yehoba na mambo a byanji byonse byawama byo angubila?”—Sala. 116:12.
▪ Monaipo mashinda amo a ‘kubilamo bantu bonse byawama’
▪ Tundaikainga ne kukwasha bakwenu ku mupashi
▪ Ingilaingako mwingilo wa kulenga baana ba bwanga papelela bulume bwenu