Bakyanyike Batemwa Bukine

MYAKA 2,400 yapitapo, nyimbi wamasalamo Muhebelu washikishe’mba: “I ku kika ko akatokesha nsongwalume jishinda janji?” (Masalamo 119:9) Jino jipuzho jafwainwa bingi neano moba mambo bakyanyike babena kupita mumakatazho avula bingi panopantanda. Byubilo bincha byabulalelale byalengela bakyanyike bavula kusambula AIDS. Pepi nobe kichika kyabantu baji nakino kikola kilenga moyo, kebantu bamyaka yakusemwa pakachi ka 15 ne 24. Bizhima nabyo bileta bingi makatazho, bilengela bakyanyike kufwa lufu lwalunkanankana. Nyimbo yatama; mafilimu amalwañano neabyubilo byatama, bintu byobatamba patelevizhonyi nepamavidyo; nebintu byamulekese byobatamba pa Intaneti byobibena konauna bingi bakyanyike. Onkao mambo, jipuzho jashikishe nyimbi wamasalamo janema bingi kubansemi nekubakyanyike ano moba.

Nyimbi wamasalamo mwine wakumbwile jino jipuzho janji amba: “Ponka pa kwijita muchima monka mwayila byambo byenu.” Kwakubula nangwa kuzhinaukatune, Byambo bya Lesa Baibolo biji namikambizho yawama kubakyanyike, kabiji mukwiilondela, bakyanyike bavula babena kwikala bingi bulongo mubwikalo bwabo. (Masalamo 119:105) Twayai tumonepo bakyanyike bamo batemwa Lesa kabiji bebikako kwikala bakosa kumupashi muino ntanda yayula byubilo byakisangajimbwe nebantu basakisha bintu byakumubiji.

Basanchila Bingi Lufunjisho Lwabansemi

Jacob Emmanuel, wajinga painiya wakimye kyonse pamyaka imo saka akyangye kuya nakwingijila pamusampi wa Bakamonyi bakwa Yehoba mu Mexico. Uvuluka bingi nalusanchilo butemwe bwanji bwakutemwa kwingijila Lesa byobwakomene’mba: “Nangwa kyakuba balunda nami balongo bakoma kumupashi bayuka byavula bankwashishe, bansemi yami bobakizhizhepo kunkwasha. Bansemi yami nebalongo bakumupashi bantundaikile kutemwa mwingilo wabusapwishi. Pachepache bantwajilenga mujishinda jawama; kabiji kechi neumvwinepo namba babena kunkanjikizhane.”

David waingila pano kemyaka yavula mumwingilo wakimye kyonse, uvuluka byokyamusangajikilepo pakumona bansemi yanji batendeka bupainiya bwiikajila kimye aye nenkasanji saka bakijitu banyike. Bashanji byobafwile, bainanji batwajijile mumwingilo wabupainiya bwiikajila. Bainabo bebalaminenga aku sababena kwingila mwingilo wakusapwila mambo awama. David waamba’mba: “Bamama kechi bankanjikizhepo kwikala painiyane, bino atweba bene kisemi kyonse twasangalele bingi kwingila bupainiya, kabiji namambo akwingijila pamo nebyotwaingijilenga bulongo, kyantundaikile neamiwa namba nafwainwa kwikala painiya.” Pamambo abuneme bwakumufunjisha bulongo nekumuta muchima kubansemi yanji, David waamba’mba: “Jonse bufuku, bamama betutangilanga mashimikila aji mubuku wa Ukufuma Kuli Paradise Waluba Ukuya Kuli Paradise Wanonkwa.a Jishinda jobetulumbulwilangamo oa mashimikila jitukwashishe bingi kutemwa kuja kajo kakumupashi.”

Kusanchila Kupwila

Bakyanyike bamo bashupikwa bingi kusanchila kupwila kwabwina Kilishitu. Batanwakotu namambo akuba’mba bansemi yabo bobebasenda. Bino umvwe bebikako kutanwa kukupwila, mukupita kwakimye bakatemwanga kutanwa kukupwila. Monai byaubile Alfredo watendekele mwingilo wakimye kyonse kasa aji namyaka yakusemwa 11. Aye mwine waswa kuba’mba, kimye kyoajinga namyaka yakusemwa itanu, kechi wakebanga kuya nakupwilane, mambo akuba wakunukanga umvwe babena kupwila, bino bansemi yanji kechi bamuswishanga kulaala kimye kyobabena kupwilane. Uvuluka’mba: “Byonakomenenga, pachepache natatwile kutemwa kupwila, kikatakata kimye kyonayukile kutanga nekunemba mambo natendekele kukumbulapo mubyambo byami amiwa mwine.”

Cintia uji namyaka yakusemwa 17 painiya wakimye kyonse, washimikizha kwendañana nabantu bawama byokwamukwashishe kukomesha butemwe bwanji bwakutemwa mwingilo wa Lesa. Waamba’mba: “Kupwañana nabalongo nekutanwa kimye kyonse kukupwila kwankwasha kubula kukelwa kimye kyonse nabakwetu bakukyalo nekubula kubako bintu byavula byuba bakyanyike, nabiji kuya kumazubo adisiko nakwitobwela. Kabiji kumvwa mikumbu nebyapichilemo bantu bamo pakupwila kwandengejile kusakisha kumupa Yehoba byonse byonji nabyo, kabiji nayuka namba kintu kyawamisha kyonji nakyo kebwanyike bwami. Onkao mambo, nafuukwile namba nakonsha kwibwingijisha mumwingilo wanji.”

Nangwa byonkabyo, waswa kuba’mba: “Kwajinga kimye kimo saka nkyangye kubatizwa, kyonabujile kutemwa kutanwa kukupwila, sambepa namba nji nabyakutanga byakusukulu, nangwatu mingilo yakuba ikwabo yakusukulu. Kechi natainwengako kukupwila javulane, kabiji kino kyatatwile kumbwezha bingi panyuma kumupashi. Natatwile kwendañana namwanyike wamulume wabulanga kufunda Baibolo. Kine namusanchila bingi Yehoba pakuba bukiji-bukiji napimpula byubilo byami.”

Kwifuukwila Kwamwine Muntu

Pablo wakyanyike mukwabo ubena kwingijila Yehoba mumwingilo wakimye kyonse, umvwe bamushikisha kintu kyanema kumuntu kukomesheshamo butemwe bwakutemwa bukine bwa Byambo bya Lesa, wamba’mba: “Namona namba kujitu bintu bibiji: Kwikala nalufunjisho lwapa bunke kimye kyonse nekwikala namukoyo wakwingila mwingilo wabusapwishi. Kine nebasanchila bingi bansemi yami pakumfunjisha bukine pe Yehoba, kabiji nayukishatu namba kino kyokintu kyawamisha kyobankwasha. Pano bino, neamiwa mwine nafwainwa kushiinwa kine kintu kyonatemenwa Yehoba. Pakino kyafwainwa kuyuka ‘bula ne kimino’ kyabukine buji mu Baibolo. Mujino jishinda momotwikela nakilaka kya Byambo bya Yehoba, ‘bitemesha mujilo’ mwiatweba kuba’mba twibyambe kubakwetu. Uno mukoyo wakwingila mwingilo wakusapwila ukakosesha lusanchilo lwetu lwakusanchila bukine.”—Efisesa 3:18; Yelemiya 20:9.

Jacob Emmanuel watongolwa kala, uvuluka nebuneme bwakwifuukwila muntu mwine kwingijila Yehoba. Waamba’mba bansemi yanji kechi bamukanjikizhengapo’mba abatizwene. Waamba’mba: “Nayuka namba kino kyawamine bingi mambo mona byawama bibena kufumamo. Kyakumwenako, bakyanyike bamo bonakayanga nabo javula befuukwijile bene kubatizwa pamo neamiwa. Nangwa kyakuba kino kyajingatu bulongo, namwene namba bamo babatizwetu mambo akumona’mba bakwabo byobyo bauba, kabiji kechi papichile nekimyene, mukoyo wabo wakwingila mingilo ya Bufumu wapwile. Pano amiwa, bansemi yami kechi bankanjikizhepo amba nepane kwi Yehoba ne. Nefuukwijile amiwa mwine.”

Mwingilo Wakipwilo

Bakyanyike bamo bafunda bukine bwa Byambo bya Lesa abo bene, kwakubula kwibakwasha kubansemi yabone. Kubano kechi kyapela kufunda kuba byawama nekutwajijila byonkabyone.

Noé uvuluka bukine byobwamukwashishe. Kufumatu kubwanyike bwanji, wajinga bingi muntu wabukaji kabiji wajinga bingi nakanwa. Byoatatwile kufunda Baibolo saaji namyaka yakusemwa 14, watendekele kufomoka muchima akyo kyalengejile bansemi yanji babujile kutemwa Baibolo kusangalala bingi. Noé byoailenga nakukoma kumupashi, wakebeshe bingi kwingijisha bumi bwanji bonse mumwingilo wa Lesa. Kino kimye kyotubena kwamba, uji mumwingilo wakimye kyonse.

Alejandro naye watendekele kutemwa bukine bwabwina Kilishitu kimye akijingatu mwanyike mucheche nangwa kyakuba bansemi yanji kechi bebukebelengane. Mubyambo byanji byakusanchila bukine waamba’mba: “Nakomejile mukisemi kyakisho kyabu Katolika. Bino bintu byakafulumende wa Komyunisiti byonafunjile byakuba’mba Lesa ufwako byailengatu nakukomenako, mambo muchechi kechi bankumbwilenga mepuzho ankatazhanga kufumatu kubwanyike bwamine. Jibumba ja Yehoba jankwashishe kufunda maana akuyuka Lesa. Maana onafunjile ampulushishe bingi, mambo umvwe kechi nafunjile Baibolo ne, kampe inge netumpile mubyubilo byatama, bukitomi, nangwa kampe kwingijisha bizhima. Kampe umvwe neamiwa naikele kewamubipanyi byabumulwila ntanda, mufuma byabulanda.”

Wakyanyike wakonsha kutwajijila byepi kukeba bukine nekwibukakachila aye mwine kwakubula kumukwasha kubansemi? Kwakubula nangwa kuzhinaukatune, bakulumpe mukipwilo nebakwabotu mukipwilo bengila bingi mwingilo wanema. Noé uvuluka’mba: “Nkyangye kwiumvwapo namba nji bunkene, mambo kimye kyonse Yehoba wikalatu pepi neamiwa. Kabiji balongo nebanyenga bavula bankwasha bingi babaikale pano ke batata ne bamama, nebakolojami bakumupashi.” Luno wingijila pa Betele kabiji wingijisha kimye kyanji mumwingilo wa Lesa. Byonkabyo, ne Alejandro naye washimikizha’mba: “Kintu kyonkasangalelamo kikupu kekyakuba’mba najinga najishuko jakwikala mukipwilo muji jibumba jabakulumpe bantemenwe bingi. Kikatakata nasanta bingi pakino mambo byonajinga namyaka yakusemwa 16 kimye natendekele kufunda Baibolo, natendekele kwikala nabijikila byasampukamo kubakyanyike. Bisemi byamu kipwilo kechi byansankijilepone. Kimye kyonse bantambwilanga mumazubo abo, kumpa kajo kepo nekuntemwa kyakine.” Luno lotubena kwamba Alejandro uji mumwingilo wakimye kyonse kukila pamyaka 13.

Bantu bamo balanguluka’mba bantu bakoma bobonka bafwainwa kwikala mubupopweshi. Bino nangwa byonkabyo, bakyanyike bavula bafunda bukine bwa Baibolo mumyaka yabo yabwanyike, kabiji bamutemwa bingi Yehoba nekutwajijila kwikala bakishinka kwiaye. Byambo byakwa Davida byanembwa mu Masalamo 110:3 byawama bingi kubano banyike. Waambile’mba: “Bantu benu bakelambula saka baswa abo bene mu juba ja bulume bwenu, mu bivwalo byazhila: Kufuma munda mwa lukelo, pamo nobe kime, bansongwalume benu bakeya kwi anweba.”

Kikebewa bingi kwibikako pakuba’mba bakyanyike bafunde bukine nekwibukosela. Byokiletapo lusekelo pakumona kuba’mba bavula babena kwikala mujibumba ja Yehoba, babena kutanwa kukupwila kimye kyonse nekwibikishako nakufunda Baibolo. Namambo akuba bino, batemwa Byambo bya Lesa nemwingilo wanji!—Masalamo 119:15, 16.

[Tubyambo twa mushi]