“Anweba mwi Balunda Nami”

“Anweba mwi balunda nami, umvwe mwauba byo nemukambizha.” —YOA. 15:14.

1, 2. (a) Balunda ba kwa Yesu bafumine mu ñanyi nkomeno yapusana pusana? (b) Mambo ka o kyanemena kwikala balunda ba kwa Yesu?

BANABALUME bajinga ne Yesu mu nzubo ya peulu bafumine mu nkomeno yapusana pusana. Bankasa ne kolo ba Petelo ne Andeleo bakwatanga masabi. Mateo wajinga musonkeshi, ao ye basujile ku Bayudea. Bamo nabiji Yakoba ne Yoano, bamuyukile Yesu kufumatu ku Bwanyike. Bakwabo nabiji Natanela, papichiletu myaka icheche kufuma po bamuyukijile. (Yoa. 1:43-50) Pano bino, bonse batainweko ku Kijiilo kikatampe kya Lupitailo mu Yelusalema bufuku baswile kuba’mba Yesu wajinga Mesiasa walayiwe, Mwana Lesa mumi. (Yoa. 6:68, 69) Bafwainwa baumvwine bingi bulongo byo ebambijilenga’mba: “Amiwa nemutela namba balunda nami; mambo bintu byonse byo naumvwine kwi Batata, nebilumbulula kwi anweba.”—Yoa. 15:15.

² Byambo byaambile Yesu ku batumwa banji bakishinka bingila ne ku bena Kilishitu bashingwa lelo jino, ne ku balunda nabo ba ‘mikooko ikwabo.’ (Yoa. 10:16) Kechi na mambo a nkomeno yetu ne, twakonsha kwikala balunda ba kwa Yesu. Kyanema bingi kwikala balunda nanji mambo kuba kino kwitulengela kwikala balunda na Yehoba. Kya kine, umvwe twabula kufwenya kwipi ne Kilishitu kiketukatazha kufwenya kwipi ne Yehoba. (Tangai Yoano 14:6, 21.) Twafwainwa kuba byepi pa kuba’mba twikale balunda ne Yesu kabiji ne kutwajijila na buno bulunda? Saka tukyangye kwisamba pa uno mutwe wanema, twayai tumone kya kumwenako kya kwa Yesu kya kwikala mulunda wawama kabiji ne byo twakonsha kufunjilako ku byaubilenga baana banji ba bwanga kwi aye.

Kya Kumwenako kya kwa Yesu kya Kwikala Mulunda Wawama

3. Yesu bamuyukijile ku ka?

³ Mfumu wa maana Solomone wanembele’mba: “Munonshi bamutemwa ku bavula.” (Mana. 14:20) Kuno kupesapesa kumwesha miteeto iji na bantu bambulwa kulumbuluka ya kwikala na bulunda bwaimena pa byo bakonsha kutambwila kechi pa kupana ne. Yesu kechi wajinga na ino miteeto ne. Kechi waongwelwepo na mambo a mali nangwa kutumbalala kwa bantu ne. Kya kine, Yesu watemenwe nsongwalume munonshi wajinga ndamakyalo kabiji wamwichile kuba’mba ekale mwananji wa bwanga. Nangwa byonkabyo, Yesu wamwambijile uno muntu kupotesha byonse byo ajinga nabyo ne kupana ku bayanji. (Mako 10:17-22; Luka 18:18, 23) Yesu kechi bamuyukijile ku kwipampata na banonshi ne bantu batumbalele ne, bamuyukijile ku bulunda bwanji na boba bo balengulwile. —Mat. 11:19.

4. Mambo ka o twakonsha kwambila’mba balunda ba kwa Yesu batamishanga?

⁴ Kya kine, balunda nanji Yesu batamishanga. Petelo kimye kimo wakankelwe kumwena bintu mu jishinda ja bu mupashi. (Mat. 16:21-23) Ba Yakoba ne Yoano bamwesheshe bwitote byo balombelenga Yesu kuba’mba ebape bifulo bya peulu mu Bufumu bwanji. Byubilo byabo byazhingijishe batumwa bakwabo, kabiji kusaka kutumbalala kwaletele lutobo lukatampe. Nangwa byonkabyo, Yesu wakwashishe balunda nanji mu butekanye kechi wafikenejiletu kwi bakajipila ne. —Mat. 20:20-28.

5, 6. Mambo ka Yesu o atwajijile kwikala mulunda na batumwa bavula? (b) Mambo ka Yesu o apwishishe bulunda bwanji ne Yudasa?

⁵ Yesu kechi watwajijile kwikala mulunda na bantu bambulwa kulumbuluka na mambo a kwibalekatu amba bobenga byo bakeba nangwa kubula kuta muchima ku bumbulwa kulumbuluka bwabo ne. Mu kifulo kya byobyo, watele muchima pa byubilo byabo byawama. Kya kumwenako, Petelo, Yakoba ne Yoano balaajile mu kifulo kya kumutundaika Yesu kimye kyo apichilenga mu meseko akijilemo kutama. Yesu kyamulefwile bingi. Nangwa byonkabyo, wamwene kuba’mba bajinga na milanguluko yawama byo aambile’mba: “Muchima kine waswa, pakuba mubiji wanekena.”—Mat. 26:41.

⁶ Mu kupusanako, Yesu wapwishishe bulunda bwanji ne Yudasa Isakaliota. Nangwa kya kuba Yudasa wamwekanga nobe mulunda, Yesu wayukile kuba’mba uno wajinga mulunda nanji waongwelwe. Yudasa byo aikele na bulunda na bya panopantanda, wialwile mwine ke mulwanyi ne Lesa. (Yako. 4:4) Onkao mambo, Yesu waambile pa bulunda bwanji na batumwa banji 11 bakishinka, saka amupanga kala Yudasa. —Yoa. 13:21-35.

7, 8. Yesu wamwesheshe byepi butemwe bwanji ku balunda nanji?

⁷ Yesu kechi watele muchima ku bilubo bya balunda nanji ne, kabiji waubanga bintu bya kwibatokesha ku muchima. Kya kumwenako, walombele kwi Shanji kuba’mba ebazhikijile mu kimye kya meseko. (Tangai Yoano 17:11.) Yesu wayukile papelejile bulume bwabo bwa ku mubiji. (Mako 6:30-32) Kabiji kechi watemenwetu kwibabula byo alangulukanga ne, bino wakebanga ne kumvwa milanguluko yabo ne byo beumvwinenga. —Mat. 16:13-16; 17:24-26.

⁸ Bumi ne lufu lwa kwa Yesu byalengejile balunda nanji kumwenamo. Kya kine, wayukile kuba’mba wafwainwe kupana bumi bwanji bwakebewenga ku bantu bonse pa kuba’mba afikizhe bololoke bwa Shanji. (Mat. 26:27, 28; Hebe. 9:22, 28) Yesu wapaine bumi bwanji kuba’mba amwesheshemo butemwe bwanji. Yesu waambile’mba: “Ka paji muntu uji na butemwe bwakila bo buno ne, amba muntu elele balunda nanji mweo wanji.”—Yoa. 15:13.

Baana ba Bwanga Baubilepo Byepi pa Bulunda Bwabo ne Yesu

9, 10. Bantu baubilepo byepi pa bumpanyi bwa kwa Yesu?

⁹ Yesu wamweshanga bumpanyi byo apananga kimye kyanji, kutemwa bantu ne kupana bintu bya ku mubiji. Na mambo a kino, bantu baishilenga koaji, kabiji ne abo bamupanga na lusekelo. (Luka 8:1-3) Kwesakana na byo apichilemo aye mwine, Yesu wakonsheshe kwamba’mba: “Panai, kabiji kikemupewa; kipimo kyawama, kyo bashindaika, ne kusunkenya, kyayula paa, sa kichika, kyo bakemupa mu kyaji kyenu. Mambo kyonka kyo kipimo kyo mupimako kyo kyo mukapiminwako ne anweba.”—Luka 6:38.

¹⁰ Kya kine, bamo baishilenga kwi Yesu na mambotu a bintu byo ebapelenga. Bano balunda ba bubela bamunyemene Yesu byo bakankelwe kumvwisha mwatajile byambo byo aambile. Mu kifulo kya kuketekela Yesu byo bakankelwe kumvwisha byambo byanji, balangulukijile mungi ne kumunyema. Pano bino batumwa baikele bakishinka. Bulunda bwabo ne Kilishitu bwajinga mu kizumba, bino bamutundaikilenga mu bimye byawama ne byatama. (Tangai Yoano 6:26, 56, 60, 66-68.) Bufuku bwa juba janji japeleleko panopantanda mu bumuntu, Yesu wamwesheshe byo atemenwe balunda nanji byo aambile’mba: “Anweba mwi boba bakelwa ne amiwa mu lweseko lwami.”—Luka 22:28.

11, 12. Yesu wibalayile ka baana banji ba bwanga, kabiji nabo baubilepo byepi?

¹¹ Byo papichiletu kimye kicheche kufuma Yesu po atakaikijile baana banji ba bwanga pa mambo a bukishinka bwabo, bano bonka bantu bamo bamunyemene. Moyo wa kuchina bantu kimye kicheche wibalengejile kubula kutemwa Kilishitu. Yesu wibalekejileko mambo ne jikwabo. Byo afwile ne kusangulwa, wamwekele kobaji ne kwibabula pa mambo a bulunda bwanji ne abo. Kunungapo, wibapele mwingilo wanema bingi, wa kulenga baana ba bwanga “ba mu mikoka yonse ya bantu” ne kwikala bakamonyi banji “monse mwapela ntanda.” (Mat. 28:19; Byu. 1:8) Nga baana ba bwanga baubilepo byepi?

¹² Baana ba bwanga baingijile na ngovu kutwala mambo awama a Bufumu. Na bukwasho bwa mupashi wazhila wa Yehoba, bakumbenye Yelusalema na mafunjisho abo. (Byu. 5:27-29) Kechi bachiine lufu ne kuleka kukokela mukambizho wa kwa Yesu wa kulenga baana ba bwanga ne. Mu myaka ichechetu yapichilepo kufuma po batambwijile mukambizho wa kwa Yesu, mutumwa Paulo wanembele’mba mambo awama asapwijilwe “mu bilengwa byonse bya muno munshi.” (Kolo. 1:23) Kya kine, bano baana ba bwanga bamwesheshe kuba’mba banemekele bulunda bwabo ne Yesu!

13. Mu ñanyi mashinda mafunjisho a kwa Yesu mo akwashishe baana banji ba bwanga?

¹³ Aba baikele baana ba bwanga nabo balekele mafunjisho a kwa Yesu kupimpula bwikalo bwabo. Ku bavula, kino kyalumbulwilenga kupimpula byubilo ne bumuntu bwabo. Bamo saka bakyangye kwikala baana ba bwanga bakijinga na byubilo bya kwilaala na banabalume nangwa banabakazhi bakwabo, bankende, bapendwapendwa ne bangivi. (1 Ko. 6:9-11) Bakwabo bapimpwile byubilo byabo pa mambo a byo bamonanga boba ba mu mukoka ungi. (Byu. 10:25-28) Bakokejilenga Yesu. Bavujile bumuntu bwa kala ne kuvwala bumuntu bupya. (Efi. 4:20-24) Bayukile “muchima wa Kilishitu,” kumvwisha ne kulondela ndangulukilo ne byubilo byanji. —1 Ko. 2:16.

Bulunda Bwetu ne Kilishitu Lelo Jino

14. Yesu walayile kuba ka mu ‘moba akapelako’?

¹⁴ Bena Kilishitu bavula ba mu myaka kitota kitanshi bamuyukile Yesu nangwa kumumona panyuma ya kusangulwa. Atweba kechi twamumonapo ne. Pano twakonsha kwikala byepi balunda ne Kilishitu? Jishinda jimo ke kukokela mikambizho ya kalume wakishinka kabiji wa maana, awo walengwa na balongo ba kwa Yesu bashingwa na mupashi bakiji panopantanda. Yesu walayile kuba’mba mu ‘moba akapelako’ ukapa kalume wanji bukulumpe “bwa bintu byanji byonsetu.” (Mat. 24:3, 45-47) Lelo jino bavula bakeba kwikala balunda ba kwa Kilishitu kechi ba mu jibumba ja kalume ne. Kukokela mikambizho ya jibumba ja kalume wakishinka kwibalengela byepi kwikala balunda ne Kilishitu?

15. Ki ka kiyukisha muntu kuba’mba ukekala mukooko nangwa mbuzhi?

¹⁵ Tangai Mateo 25:31-40. Yesu watelele ba mu jibumba ja kalume wakishinka amba balongo banji. Mu kishimpi kyaamba pa kwabanya mikooko ne bambuzhi, Yesu waambile kuba’mba umona byo tuba ku balongo banji nobe tubena kuba kwi aye. Waambile kuba’mba kintu kikatampe kikakonsha kwabanya mukooko ne mbuzhi ke bintu byo oba muntu ku “wapelako wa bano balongo [banji].” Onkao mambo, jishinda jikatampe aba baji na luketekelo kwa kwikala panopantanda jo bamwesheshamo bulunda bwabo ne Kilishitu ke kupichila mu kutundaika jibumba ja kalume wakishinka.

16, 17. Twakonsha kumwesha byepi bulunda bwetu ku balongo ba kwa Kilishitu?

¹⁶ Umvwe muji na luketekelo lwa kwikala panopantanda mu Bufumu bwa Lesa, mwakonsha kumwesha byepi bulunda bwenu ku balongo ba kwa Kilishitu? Twayai tumone mashinda asatu. Kitanshi, ke kupichila mu kwingilako mwingilo wa kusapwila na muchima yense. Kilishitu wakambizhe balongo banji kusapwila mambo awama mwaya ntanda. (Mat. 24:14) Nangwa byonkabyo, balongo ba kwa Kilishitu bashalapo panopantanda lelo jino kyakonsha kwibakatazha kufikizha uno mutembo kwa kubula bukwasho bwa balunda nabo ba mikooko ikwabo. Kya kine, kimye kyonse jibumba ja mikooko ikwabo kyo jingilako mwingilo wa kusapwila, jikwasha balongo ba kwa Kilishitu mu kufikizha mwingilo wabo wazhila. Kilishitu ne jibumba ja kalume wakishinka kabiji wa maana banemeka bingi buno bulunda.

¹⁷ Jishinda ja bubiji jibumba ja mikooko ikwabo mo jakonsha kukwashishamo balongo ba kwa Kilishitu ke kupichila mu kubingula mibingu ya kukwasha mwingilo wa kusapwila. Yesu watundaikile baana banji ba bwanga kwimwena balunda na “nsabo yabula koloka.” (Luka 16:9) Kino kechi kilumbulula’mba twakonsha kupota bulunda na Yesu nangwa Yehoba ne. Pakuba ke kupichila mu kwingijisha nsabo yetu kutundaika Bufumu bwa kwa Yehoba ne mwingilo wa kipwilo panopantanda, tumwesha bulunda ne butemwe bwetu kechi mu byambotu ne, bino ne mu “byubilo ne bukine.” (1 Yoa. 3:16-18) Tupana buno bukwasho kimye kyo twingilako mwingilo wa busapwishi, kubingula mali a buntungi ne kuwamishisha mapunzha etu po tupwila, kabiji ne byo tubingula mibingu ya mwingilo wa kusapwila mwaya ntanda. Kikale twapana bupe bucheche nangwa bwabaya, Yehoba ne Yesu batemwa bingi byo tupana na lusekelo. —2 Ko. 9:7.

18. Mambo ka o twafwainwa kukokela lutangijilo lwa mu Baibolo lupana bakulumpe mu kipwilo?

¹⁸ Jishinda ja busatu atweba bonse jo tumwesheshamo amba twi balunda ne Kilishitu ke kupichila mu kulondela lutangijilo lupana bakulumpe mu kipwilo. Mupashi wazhila ye utongola bano banabalume kupichila mwi Kilishitu. (Efi. 5:23) Mutumwa Paulo wanembele’mba: “Kokelai bemutangijila ne kwibanekenena.” (Hebe. 13:17) Kimo kimye, kyakonsha kwitukatazha kulondela lutangijilo lwa mu Baibolo lwitupa bakulumpe mu kipwilo kyetu. Twayuka bulongo bumbulwa kulumbuluka bwabo, kabiji kino kyakonsha kwitulengela kusuula lujimuno lwabo. Nangwa byonkabyo, Kilishitu, Mutwe wa kipwilo, usekela mu kwingijisha bano banabalume bambulwa kulumbuluka. Onkao mambo, jishinda jo tumwenamo buntangi bwabo jalamata bingi bulunda bwetu ne Kilishitu. Umvwe ketulubeko ku bilubo bya bakulumpe mu kipwilo kabiji ne kulondela lutangijilo lwabo na lusekelo, tukamwesha byo twatemwa Kilishitu.

Ko Twakonsha Kutana Balunda Bawama

19, 20. Bintu ka byo twakonsha kutanamo mu kipwilo, kabiji ki ka kyo tukesambapo mu mutwe walondelapo?

¹⁹ Yesu kechi witutatu muchima kupichila mu bakafunga ba butemwe kwapwa ne, bino ne kupichila mu kwitupa bainetu ne balongo betu ne banyenga yetu ba ku mupashi mukachi ka kipwilo. (Tangai Mako 10:29, 30.) Kimye kyo mwatendekeletu kupwanañana na jibumba ja kwa Yehoba, balongo benu ba ku mubiji baubilepo byepi? Kwa kubula nangwa kuzhinaukatu ne, bemutundaikile kufwenya kwipi ne Lesa ne Kilishitu. Bino Yesu wajimunañeneko amba kimye kimo “balwanyi ba muntu bakekala ba mu kisaka kyanji mwine.” (Mat. 10:36) Byo kitekeneshapo kuyuka kuba’mba mukachi ka kipwilo, twakonsha kutanamo boba bakonsha kufwenya kwipi ne atweba kukila mulongo ye twasemwa nanji! —Mana. 18:24.

²⁰ Byonka byamwesha Paulo mu lwimu lwa mu nkalata yanji yapeleleko ku kipwilo kya ku Loma, waikele na balunda bavula. (Loma 16:8-16) Mutumwa Yoano wapezhezheko nkalata yanji ya busatu na byambo bya kuba’mba: “Bemunai balunda netu pa mazhina.” (3 Yoa. 14) Ne aye wajinga na balunda bavula bawama. Twakonsha kulondela byepi kya kumwenako kya kwa Yesu ne baana ba bwanga batanshi kya kutwajijila kwikala na bulunda bwawama na balongo ne banyenga yetu mu kipwilo? Mutwe walondelapo ukakumbula buno bwipuzho.

Musakukumbula’mba Ka?

•Kya kumwenako ka Yesu kyo amwesheshe kya kwikala mulunda wawama?

•Nga baana banji ba bwanga baubilepo byepi pa kwikala balunda ne Yesu?

•Twakonsha kumwesha byepi amba twi balunda ne Kilishitu?

[Kipikichala pa peja 14]

Yesu watelenga muchima ku byalangulukanga balunda nanji ne byo beumvwanga

[Bipikichala pa peja 16]

Twakonsha kumwesha byepi amba twakebesha kwikala balunda ne Kilishitu?