BANTU BEPUZHA AMBA . . .

Mambo ka bantu bamo mu Baibolo o babujila kwibatongwela mazhina?

Mu buku wa mu Baibolo wa Luta, muntu wakaine kwingila mwingilo wanji kwesakana na byaambile Mizhilo ya Mosesa bamutelatu amba Kananga. (Luta 4:1-12) Nanchi twafwainwa kwamba’mba bantu banembwa mu Baibolo bo babula kutongola mazhina bajinga na byubilo byatama nangwa amba kechi banemene ne nyi?

Ine. Akimonai kino kyamwekele kyapusanako. Kimye kyo anengezhenga Kijiilo kya Lupitailo, Yesu wabujile baana banji ba bwanga amba, “yainga mu muzhi, musakutanamo muntu” ne kunengezha kijiilo ku nzubo yanji. (Mateo 26:18) Nanchi twafwainwa kwamba amba “Muntu” ye batongola mu kino kyepelo wajinga muntu watama nangwa wajinga muntu wa panshi pa kubula kumutongola jizhina nyi? Ine, mambo uno “muntu” wajinga mwana wa bwanga wa kwa Yesu. Byo kiji kuba’mba jizhina janji kechi janemene mu jino jishimikila ne, kechi jatongolwamo ne.

Mu Baibolo muji mazhina a bantu bavula bajinga na byubilo byatama; kabiji muji ne bantu bavula bakishinka bo babula kutongola mazhina ne. Kyakumwenako jizhina ja mwanamukazhi mutanshi aye Evwa, jayukanyikwa bingi. Bino, byubilo byanji ne kubula lukokelo kwalengejile Adama kulenga mambo, kyo kyalengela ne atweba kwikala bandengamambo. (Loma 5:12) Kupusanako ne muka Nowa ye babula ne kutongolapo jizhina mu Binembelo, bino wajinga na lukokelo mu kwingijila pamo na mwatawanji mwingilo wanema. Kubula kumutongola jizhina kechi kwalumbulwilenga amba kechi wanemene nangwa amba Yehoba kechi wamupesheshe ne.

Mu Baibolo muji ne bantu bakwabo baingijile mingilo yanema mu kufikizha kyaswa muchima wa Yehoba, bino kechi be batongolapo mazhina ne. Akilangulukai pa kamwale mwina Isalela wajinga muzha mu nzubo ya kwa Nemani, awo wajinga mukulumpe wa nzhita ya bena Silya. Waambile saka achinchika kwi muka Nemani, pa ngauzhi wa Yehoba wajinga mu Isalela. Kino kyalengejile kya kukumya kikatampe kumweka. (2 Bamfumu 5:1-14) Mwana wa mukazhi wa kwa Yefita mutonyi wa bena Isalela, wajinga na lwitabilo. Wafuukwilepo kubula kusongolwa ne kubula kusema pakuba amba afikizhe luchipo lwachipile bashanji. (Mitonyi 11:30-40) Kabiji kuji ne banyimbi ba masalamo 40 babulwa kutongolwa ne, kubikapotu ne bangauzhi bakwabo babula kutongolwa abo baingijile mingilo yanema.—1 Bamfumu 20:37-43.

Kabiji kuji ne bamalaika bakishinka baingijile mingilo yanema, bino kechi batongolwa mazhina ne. Bano bamalaika bavula bingi, bino babijitu bo batongolwa mu Baibolo ko kuba’mba Ngabaliela ne Mikela. (Danyela 7:10; Luka 1:19; Yuda 9) Bashala kechi be batongolapo mazhina mu mashimikila a mu Baibolo ne. Kyakumwenako, Manowa shanji Samisonyi waipwizhe malaika amba: “Jizhina jenu mwi bañanyi? namba, bino bintu byo bikafika tukemunemeke?” Wakumbwile kuba’mba: “Mambo ka o wangipuzhizha jizhina jami?” Uno malaika wikepeshe ne kukana munema wafwainwa kupanwatu kwi Lesa.—Mitonyi 13:17, 18.

Baibolo kechi waambapo mambo ene o yatongwela mazhina a bantu bamo ne o yabujila kutongola mazhina amo ne. Bino twakonsha kufunjilako byavula ku bantu bakishinka baingijile Lesa kwakubula kutumbalala nangwa kuya nkuwa.