Kitango 19

Nanchi Kulwa Kwawama Nyi?

NANCHI wayukapo banyike babalume nangwa babakazhi betota amba baji na ngovu nyi?— Nanchi umvwa bulongo kwendañana nabo nyi? Abya watemwa muntu wa lusa kabiji wa mutende nyi?— Mufunjishi Wayukisha waambile’mba: ‘Bapwanya bantu bo batokwa: mambo bakatelwa’mba, baana ba Lesa.’—Mateo 5:9.

Pano bino, kimye kimo bakwetu bakonsha kwituzhingijisha, ke ibyo nenyi?— Kampepo twakonsha ne kukeba kushinkanya. Kino kyamwekelepo ne ku baana ba bwanga ba kwa Yesu kimye kyo bayilenga ku Yelusalema ne Yesu. Leka nkubule byo kyajinga.

Byo baendeleko musinso walepa, Yesu watumine baana banji ba bwanga bamo na kumona kibamba mwakukokolokela mu muzhi wa Samaliya. Bino bena Samaliya kechi bakebelenga amba bekale mu yewa muzhi ne, mambo kechi baumvwañananga ne. Kabiji kechi bakebanga muntu kuya ku Yelusalema na kupopwela ne.

Umvwe yobe kyamwekejile, inge waubilepo byepi? Nanchi inge wazhingijile nyi? Abya inge washinkenye nabo nyi?— Ba Yakoba ne Yoano byo byo bakebelenga kuba. Bamwambijile Yesu amba: ‘Nanchi musaka tukambizhe mujilo afume mwiulu ebasoke nyi?’ Kyo kine kintu Yesu kyo ebatelelanga’mba Baana ba kutatauka nobe Mvula! Bino Yesu wibambijile’mba kechi kyawama kumanyika bakwetu ne.—Luka 9:51-56; Mako 3:17.

Ee, kimye kimo bantu bakonsha kwikala bakanama. Baana bamo kechi bakonsha kukeba’mba tukayenga nabo ne. Bakonsha ne kwamba’mba: “Fuma pape kechi tubena ku kukeba ne.” Umvwe kintu kya uno musango kyamwekana, kyakonsha kwitulengela kumvwa kutama, ke ibyo nenyi? Kampepo twakonsha ne kukeba kushinkanya. Nanchi twafwainwa kushinkanya nyi?—

Aki tola Baibolo obe. Zhikula pa Kinembelo kya Byambo bya Mana kitango 24, kyepelo 29. Panembwa’mba: “Kechi wambe’mba: Nkamuba byonka byo anguba amiwa ne; nangwa’mba: Nkamulubwila monka mwayila byubilo byanji, ne.”

Nanchi bino byambo byatala mwepi?— Byaamba’mba kechi twafwainwa kushinkanya ne. Kechi twafwainwa kushinkanya na muntu mambotu a kuba’mba waubile kyatama ne. Pano ibyepi umvwe mukwenu keakebe amba mulwe? Kampepo wakonsha kutendeka kukuseleka. Wakonsha kuba keakwendeleke amba wachina. Kampepo wakonsha ne ku kwambila’mba wikileya. Nga obewa wakonsha kubapo byepi? Nanchi wafwainwa kulwa nyi?—

Twaya tumone ne jikwabo byaamba Baibolo. Zhikula pa Mateo kitango 5, kyepelo 39. Yesu waambile’mba: “Kumukosela mubi ne: kabiji awa wakupuma jibuta ja kilujo, mwalwile ne jikwabo.” Bino byambo Yesu wibitazhizhe mwepi? Nanchi waambilenga’mba umvwe mukwenu wakwimba kinkonyi ku jibuta, wafwainwa ne kwalwila ku jikwabo nyi?—

Ine, Yesu kechi mo mo ekitazhizhe ne. Kuno kupumana kechi kwa kwimbañana kinkonyi ne. Kujitu nobe kushinjika mukwenu. Wakonsha kukutasulamo kalupi kukeba’mba mulwenga. Ukeba’mba tuzhingile. Umvwe twazhingila ne kumushinjika, ki ka kyakonsha kumweka?— Twakonsha kutendeka kulwa.

Pano bino Yesu kechi wakebanga’mba baana banji ba bwanga balwenga ne. Onkao mambo waambile’mba umvwe muntu witupuma, atweba kechi twafwainwa kumupumamo ne. Kechi twafwainwa kuzhingila ne kutendeka kulwa ne. Umvwe twauba bino, ko kuba’mba tujitu pamo na yeo muntu watendeka kanwa.

Umvwe lukatazho lwatendeka, wafwainwa kuba byepi?— Wafwainwa kufumapo. Mukwenu wakonsha kuba saka akushindaikatu. Bino umvwe papita kimye wakonsha kukoka ne kwikileka. Umvwe wanyema kechi kilumbulula’mba ngovu ufwayo ne. Kimweshatu patoka’mba ukeba kuba bintu byaoloka.

Pano kyakonsha kwikala byepi umvwe mwatendeka kulwa, mukwenu wamupuma ne kumupuma? Ki ka kyakonsha kumweka?— Awa ye wapuma wakonsha kubwela jibiji na bakwabo. Bakonsha kukupuma na kichi nangwa kukwasa mpoko. Nanchi wamona kine kintu Yesu kyo aambijile amba kechi twafwainwa kulwa nenyi?—

Twafwainwa kuba byepi umvwe twamona bantu saka balwa? Nanchi twafwainwa kukwashako umo nyi?— Baibolo witubula kintu kyawama kyo twafwainwa kuba. Zhikula pa Byambo bya Mana kitango 26, kyepelo 17. Patangiwa’mba: “Muntu wibika mu lutobo lwa bakwabo uji pamo nobe muntu ukwata ku matwi a kabwa ubena kupitatu.”

Ki ka kyakonsha kumwekana umvwe wakwata ku matwi a kabwa? Wakonsha kukozha kabwa, kabiji ne aye naye wakonsha ku kusuma, ke ibyo nenyi? Monka kabwa mo abena kulukuchila’mba asopoke, ne obewa wakonsha keukwachishe ne kukwachisha.

Umvwe wamulekako, wakonsha ku kusuma kyatama bingi. Pano nanchi wakonsha kuba monka wamukwachilatu nyi?—

Lo lukatazho lo twakonsha kupitamo umvwe twivwanga mu lutobo lwa bakwetu. Kechi twakonsha kuyuka waji kutendeka nangwa kyalengela kuba’mba balwenga ne. Kimye kimo umo bakonsha kumupuma, kampe na mambo a kuba’mba waibile kintu kya mukwabo. Umvwe twamukwasha, ko kuba’mba tubena kukwasha ngivi. Kuba bino kechi kwawama ne, ke ibyo nenyi?

Wafwainwa kuba byepi umvwe wamona bantu babena kulwa?— Umvwe pa sukulu, wafwainwa kubula mufunjishi. Kabiji umvwe kechi pa sukulu ne, wafwainwa kwita bansemi bobe nangwa bakapokola. Ee, nangwa bantu babena kukeba kulwa, twafwainwa kwibapwanya pamo.

Baana ba bwanga ba kine ba kwa Yesu kechi balwa ne. Mu kuba kino, tumwesha’mba, tuji na bulume bwa kuba bintu byaoloka. Baibolo waamba’mba mwana wa bwanga wa kwa Yesu “kechi wafwainwa kutoboka ne, kana ekale wakoka muchima ku bonse.”—2 Timoti 2:24.

Pano twaya tumone lujimuno lukwabo lwawama lwakonsha kwitukwasha kuchinuzhuka kanwa: Loma 12:17-21 ne 1 Petelo 3:10, 11.

[Kipikichala pa jipa 102]

Ba Yakoba ne Yoano bakebelenga kuba ka pa kuba’mba bashinkanye na bena Samaliya?

[Kipikichala pa jipa 104]

Ki ka kyo twafwainwa kuba umvwe muntu umo keakebe’mba tulwe?

[Kipikichala pa jipa 105]

Kwivwanga mu lutobo lwa bakwetu kiji byepi nobe kukwata ku matwi a kabwa? Mambo bakonsha ku kukozha.

[Kipikichala pa jipa 106]

Umvwe wamona bantu babena kulwa wafwainwa kuba byepi?