Mepuzho Kufuma Kubatanga
Mambo ka Yesu o aambijile mwanamukazhi ye bayukile bantu amba wajinga ndengamambo kuba’mba mambo anji amulekejilwe?—Luka 7:37, 48.
Yesu byo aikele kya kusendalala na kuja mu nzubo ya Mufaliseo wa jizhina ja Shimona, mwanamukazhi umo ‘wamwimenejile munyuma Yesu ku maulu anji.’ Awa mwanamukazhi wamuzobeshe maulu anji na mipolo, ne kwiashimuna na nsuki ya ku mutwe wanji. Wiafyompele ne kwiashinga na manyi anunkila bulongo. Jishimikila ja mu Mambo Awama jashimuna amba, awa mwanamukazhi ‘mu muzhi [bamuyukile amba wajinga] ndengamambo.’ Kya kine kuba’mba yense muntu mbulwa kulumbuluka ndengamambo, pano bino Binembelo javula bingijisha kino kyambo kulumbulwilamo muntu ulenga mambo akatampe nangwa wayukanyikwa amba ulengalenga mambo. Kyamweka awa mwanamukazhi wajinga pite. Uno mwanamukazhi ye ye baambijile kwi Yesu amba: “Mambo obe akulekelwa.” (Luka 7:36-38, 48) Yesu walumbulwilenga ka byo aambile bino byambo? Byo kiji kuba’mba pa kyokya kimye kitapisho kya bukuzhi kechi kyakipainwe ne, pano nga luno lulekelo lwa mambo lwakonsheshe kubiwa byepi?
Panyuma ya kuba awa mwanamukazhi wapwisha kovwa maulu a kwa Yesu ne kwiashinga manyi, bino saka akyangye kulekelwa mambo, Yesu waingijishe kishimpi kulondolwelamo kishinka kyanema kwi Shimona wamutambwijile. Byo aesakenye bundengamambo ku nkongole yabaya ya kukankalwa kubwezha, Yesu waambijile Shimona amba: “Kwajinga umo ukongwesha bantu wajinga na bantu babiji ba bikoloto. Umo wakolotele bitota bitanu bya mali, mukwabo naye makumitu atanu. Byo babujile bya kupana, wibalekeletu bonse babiji. Mbulai nanchi ñanyi ukakilamo kumutemwa?” Shimona wakumbwile amba: “Amiwa nalanguluka namba, awa yenka ye alekele byavula.” Ne aye Yesu waambile amba: “Mwaamba bulongo.” (Luka 7:41-43) Atweba bonse tuji na kikoloto kwi Lesa kya kumukokela, onkao mambo, inge twabula kumukokela kabiji twalenga mambo, tukankalwa kumupa Lesa byamufwainwa. Ne mu jino jishinda, kikoloto kyetu kibaya. Nangwa byonkabyo, Yehoba uji nobe yewa ukongwesha wifuukwila kwitulekela bikoloto. O ene mambo Yesu o atundaikijile baana banji ba bwanga kulomba kwi Lesa ne kwamba amba: ‘Tulekelaiko bikoloto byetu, byonka byo twibalekela bikoloto betulenga mambo.’ (Mat. 6:12, NW) Mu Luka 11:4, bino bikoloto byatelwa amba mambo.
Kala bantu balekelwanga mambo kwi Lesa umvwe bauba byepi? Buchibamambo bwanji bwalumbuluka ke bwa kuba’mba umvwe muntu walenga mambo wafwainwa kufwa. O ene mambo, Adama o afwijile panyuma ya kulenga mambo. Nangwa byonkabyo, mu Mizhilo yo apaine Lesa ku mukoka wa bena Isalela, umvwe muntu walenga mambo, wafwainwetu kulekelwa mambo inge wapana mulambo wa nyama kwi Yehoba. Mutumwa Paulo wanembele amba: “Mwayila Mizhilo pepi bintu byonse bitokeshiwa ku mashi, kabiji pabula kwichila mashi lulekelo lwa mambo kafwako.” (Hebe. 9:22) Bayudea kechi bayukilepo jishinda jikwabo jo bafwainwe kwingijisha pa kuba amba balekelwe mambo abo kwi Lesa ne. Kino kyo kyalengejile bantu bajingako mu moba a kwa Yesu kukana byo aambile ku yewa mwanamukazhi. Aba baikele ne Yesu na kuja beambijilenga abo bene na bene amba: “Lelo nanchi uno ye ñanyi ulekela mambo?” (Luka 7:49) Pano nanchi mambo alengele yewa mwanamukazhi ndengamambo afwainwe kulekelwa byepi?
Bungauzhi butanshi bwaambiwe panyuma ya kuba bamulume ne mukazhi batanshi basatuka bwaambile pa nkebelo ya kwa Yehoba ya kuletako ‘lukunwa’ ye bafumpile ku kashiko kwi Satana ne ku ‘lukunwa’ wanji. (Nte. 3:15) Kuno kufumpa kwaubiwe kimye Yesu kyo bamwipayile ku balwanyi ba kwa Lesa. (Nga. 3:13, 16) Mashi a kwa Kilishitu aichikile bo bukuzhi bwapainwe bwa kukuula bantu ku bundengamambo ne lufu. Na mambo a kuba kafwako nangwa kimo kyakonsha kulengela Yehoba kubula kufikizha nkebelo yanji ne, ko kuba’mba byambo byanembwa mu Ntendekelo 3:15 byo byaambiwetu, po pamotu ne kuba’mba bukuzhi bwapainwe kwesakana na mwayila mweno ya Lesa. Pa kyokya kimye wakonsheshe ne kulekelako mambo boba baitabijile mu milaye yanji.
Bwina Kilishitu saka bukyangye kwikalako, Yehoba watelele bantu bavula amba bajinga baoloka. Pa bano pajinga Enoka, Nowa, Abalahama, Lehaba ne Yoba. Na mambo a lwitabilo lwabo, baketekejile kuba’mba milaye ya Lesa ikafika. Mwana wa bwanga Yakoba wanembele amba: “Abalahama wamwitabile Lesa, kabiji lwamutelelwe ke bololoke.” Pa mambo a kwa Lehaba, Yakoba waambile amba: “Kabiji byonkabyo ne aye Lehaba, awa pite, kechi wabingishiwe mu mingilo” nenyi?—Yako. 2:21-25.
Mfumu Davida wa bena Isalela ba kala walengele mambo akatampe avula, bino wajinga na lwitabilo lwakosa mwi Lesa wa kine, kabiji wamwesheshe lulapilo lwa kine kimye kyonse. Kabiji kunungapo, Binembelo byaamba amba: “[Yesu] ye amwesheshe Lesa amba ekale mfuto ya mambo, ya mu lwitabilo lwa mu mashi anji, mu kumwesha bololoke bwa Lesa bwa kuleka ao mambo alengelwe kala, monka mu kukokamuchima kwa Lesa; naamba namba mambo a kumwesha bololoke bwanji pa kyo kino kimye: amba mwine ekale waoloka, ne wa kumubingisha awa waitabila mwi Yesu.” (Loma 3:25, 26) Na mambo a kitapisho kya bukuzhi bwa kwa Yesu kyafwainwe kupanwa kulutwe na lwendo, Yehoba kwakubula konauna bololoke bwanji wamulekejileko mambo Davida.
Kino byo byo kyajinga ne ku yewa mwanamukazhi washingile Yesu manyi ku maulu. Waikelenga bwikalo buncha, pano walapijile. Wayukile amba wakebewenga bukuzhi bwa kumulekelako mambo anji, kabiji wamwesheshe mu byubilo byanji kuba’mba kine wasanchijile bingi yewa ye baingijishe kwi Yehoba kupana buno bukuzhi. Nangwa kya kuba kyafwainwe kupanwa kulutwe na lwendo, akya kitapisho kyaketekejilwe amba buneme bwakyo bwakonsha kwingila ku bantu nabiji yewa mwanamukazhi. O ene mambo Yesu o aambijile yewa mwanamukazhi amba: “Mambo obe akulekelwa.”
Byonkatu byamwesha jino jishimikila, Yesu wakasulukilanga bandengamambo. Wibobilanga byawama. Kabiji Yehoba wifuukwila kulekela mambo a bandengamambo balapila. Uno ke mulaye wawama bingi kabiji utundaikañana ye betulaya atweba bantu bambulwa kulumbuluka!
[Kipikichala pa peja 7]
Batelelwe amba baoloka