Yehoba Witupa Kajo Ketu ka pa Juba pa Juba

“Kuzhinauka ne: . . . pakuba Shenu wayuka’mba, mwibifwainwa bino.”—LUKA 12:29, 30.

1. Yehoba ujisha byepi banyama?

ABYA mwakimonapo kala ka bwalula nangwatu kañonyi kakwabo saka kapalaya pa biswaswa nyi? Apo kampe mwakizhinaukapo ne kala amba pano kasakujapo ne ka pa byobya biswaswa byo kabena kupalaya. Mu Jashi janji ja pa Mutumba, Yesu walumbulwile’mba twakonsha kufunjilako kwi Yehoba byoajisha tuñonyi. Waambile’mba: “Talai ku bañonyi, kechi babyala ne, nangwa kunowa ne, nangwa kulonga mu matala ne; kabiji Shenu wa mwiulu wibajisha. Anweba kechi mwibakila bañonyi mu kunema nenyi?” (Mateo 6:26) Yehoba ujisha bilengwa byanji byonse mu mashinda a kukumya.—Masalamo 104: 14, 21; 147:9.

2, 3. Ñanyi mafunjisho o twakonsha kufunjilako byo kiji kuba’mba Yesu witufunjishe bya kulombela kajo ketu ka pa juba pa juba?

² Pano nga mambo ka Yesu mu lulombelo lwanji lwa kumwenako o aambijile’mba: “Mwitupeko kajo ketu ka lelo”? (Mateo 6:11) Twakonsha kufunjilako mafunjisho awama bingi mu kuno kwipuzha kwapeela byonkabye. Patanshi, kituvululako amba Yehoba ye Mpanyi Mukatampe. (Masalamo 145:15, 16) Bantu bakonsha kujima ne kubyala, bino Lesa ye yenkatu wakonsha kukomesha bintu, ku mupashi ne ku mubiji. (1 Kolinda 3:7) Bintu byo tuja ne kutoma ke bya bupe kufuma kwi Lesa. (Byubilo 14:17) Umvwe twamulomba amba etupe kajo ketu ka pa juba pa juba kechi kilumbulula’mba lusanchilo tufwalo ne. Nangwa kikale byonkabyo, kwipuzha kwa uno mutundu kechi kwitwamunako ku mutembo ye tuji nanji wa kwingila mwingilo umvwe twakonsha kwingila ne.—Efisesa 4:28; 2 Tesalonika 3:10.

³ Kya bubiji, umvwe twalomba’mba mwitupeko “kajo ketu ka lelo” kimwesha’mba kechi twafwainwa kukilamo kubambisha michima yetu amba juba jikwabo kana kikekala byepi ne. Kabiji Yesu watwajijile kwamba’mba: “Kechi mubambishe michima yenu’mba, Lelo tusakuja ka? Nangwa’mba, Lelo tusakutoma ka? Nangwa’mba, Lelo byo tusakuvwala i bi ka? Mambo bino byonse bisaka Bagentila; pakuba Shenu wa mwiulu wayuka’mba, Bino byonse mwibifwainwa. Nanchi sambilai kukebesha bufumu bwanji, ne bololoke bwanji; ne bino bintu byonse bikemubikilwapo. Byonkabyo kechi mubambishe michima yenu na ja kesha ne: mambo ja kesha jine jikebambisha na byajo.” (Mateo 6:31-34) Lulombelo lwa kulombela ‘kajo ka lelo’ lumwesha byo twafwainwa kwikala bwikalo bwapela bwa ‘munema wa kunemeka Lesa ne kusekela na byonka byotuji nabyo.’—1 Timoti 6:6-8, NW tubyambo twa panshi.

Kajo ka ku Mupashi pa Juba pa Juba

4. Ñanyi bimye mu bwikalo bwa kwa Yesu ne bena Isalela bimwesha byo kyanemena kuja kajo ka ku mupashi?

⁴ Milombelo yetu ya kulomba kajo ketu ka pa juba pa juba yafwainwa ne kwituvululako byo twafwainwa kukeba kajo ka ku mupashi pa juba pa juba. Nangwa kyakuba Yesu waikele na nzala pa kimye kyabaya, wakaine byamwesekelenga Satana amba ambile mabwe aluke ke bashinkwa. Waambile’mba: “Kyanembwa’mba, Muntu kechi akamwene bumi ku shinkwa yenka ne, poso ku byambo byonse bifuma mu kanwa ka Lesa.” (Mateo 4:4) Apano Yesu waambile byambo bya kwa Mosesa, awo waambijile bena Isalela amba: “[Yehoba] wimupelwile ne kwimuleka’mba mufwe ku nzala, ne kwimujisha na manna o mwabujile kuyuka nangwa bashakulu benu ne; amba emuyukishe kino, amba muntu kechi umwena bumi mu kajo konka ne, poso mu byambo byonse bifuma mu kanwa ka Yehoba momo amwena bumi muntu.” (Mpitulukilo ya mu mizhilo 8:3) Jishinda joaingijishe Yehoba kupainamo manna jajinga jakupelamo bena Isalela kajo ka ku mubiji ne lufunjisho lwa ku mupashi. Lufunjisho lumo lwa ku mupashi lwajinga lwa kuba’mba bafwainwe “kutola kajo ka pa jonkaja juba.” Umvwe batola byavula byakilaila pa juba jimo, byashajilepo byatendekele kununka ne kuba mapila. (Kulupuka 16:4, 20) Bino, kino kechi kyaubiwe pa juba ja butanu na bumo kimye kyo batolele kajo ka moba abiji ka kuja kufika ne juba ja Sabado ne. (Kulupuka 16:5, 23, 24) Onkao mambo, ano manna ebavulwilengamo kuba’mba bafwainwe kwikala balukokelo ne kuba’mba bumi bwabo kechi bwaimenejile pa shinkwa yenka ne, bino bwaimenejile pa “byambo byonse bifuma mu kanwa ka Yehoba.”

5. Yehoba witupa byepi kajo ka ku mupashi pa juba pa juba?

⁵ Ne atweba twafwainwa kujanga moba onse kajo ka ku mupashi ketupa Yehoba kupichila mu Mwananji. Na mambo a kino, Yesu watongola ‘kalume wa kishinka ne wa maana’ kuba’mba apanenga “kajo pa kimye pafwainwa” ku ba mu nzubo yanji baji na lwitabilo. (Mateo 24:45) Jino jibumba ja kalume wa kishinka kechi jipanatu kajo ka ku mupashi kavula kupichila mu mabuku alumbulula Baibolo ne, bino jitutundaika ne kutanganga Baibolo pa juba pa juba. (Yoshua 1:8; Masalamo 1:1-3) Byonka byajinga Yesu, ne atweba twafwainwa kuja kajo ka ku mupashi kupichila mu kwibikishako kimye kyonse kufunda pe Yehoba ne kuba kyaswa muchima wanji.—Yoano 4:34.

Kulekelwa Mambo

6. Ñanyi nkongole yotwafwainwa kulombela kuba’mba tulekelwe mambo etu, kabiji Yehoba wakonsha kwiafuuta umvwe twauba byepi?

⁶ Kwipuzha kukwabo kuji mu lulombelo lwa kumwenako ke kwa kuba’mba: ‘Tulekelaiko mambo etu, byonka byo twibalekela betulenga mambo.’ (Mateo 6:12) Apano Yesu kechi watongwelenga nkongole ya mali ne. Walangulukilenga pa kulekelwa mambo etu. Mu byambo byanembwa bya kwa Luka bya lulombelo lwa kumwenako, bino byambo bitangiwa’mba: ‘Tulekelaiko mambo etu, mambo atwe bene twibalekela bonse betulenga mambo.’ (Luka 11:4) Onkao mambo, umvwe twalenga mambo, kiji nobe tuji na nkongole kwi Yehoba. Bino Lesa wetu wa butemwe wipana ‘kuzhimañanya,’ nangwa’mba kufuuta ino nkongole umvwe twalapila kya kine, ‘twaaluluka,’ ne kumulomba kuba’mba etulekeleko mambo etu saka tuji na lwitabilo mu kitapisho kya bukuzhi bwa kwa Kilishitu.—Byubilo 3:19; 10:43; 1 Timoti 2:5, 6.

7. Mambo ka o twafwainwa kulomba lulekelo lwa mambo etu pa juba pa juba?

⁷ Mu jishinda jikwabo twakonsha kwamba namba, tulenga mambo umvwe kyakuba twakankalwa kulondela mizhilo ya Lesa ya bololoke. Na mambo a bundengamambo bwetu bo twaswana, atweba bonse tupusa mu byambo, mu byubilo, ne mundangulukilo nangwa kukankalwa kuba byo twafwainwa kuba. (Musapwishi 7:20; Loma 3:23; Yakoba 3:2; 4:17) Onkao mambo, nangwa kyakuba twayuka namba twalenga mambo mo bwakila nangwa kechi twayuka ne, kimye kyo tubena kulomba twafwainwa kumona kuba’mba twalomba lulekelo lwa mambo etu.—Masalamo 19:12; 40:12.

8. Lulombelo lwa kulomba lulekelo lwa mambo lwafwainwa kwitulengela kubapo ka, kabiji kika kyafwainwa kufumamo?

⁸ Lulombelo lwa kulomba lulekelo lwa mambo lwafwainwa kwikala lwa kwipima obe mwine, kulapila, ne kulomba lulekelo lwa mambo, saka uji na lwitabilo mu bukuzhi bwa mashi aichikile a kwa Kilishitu. (1 Yoano 1:7-9) Pa kuba’mba lulombelo lwetu lwikale lwa kine, twafwainwa kulomba lulekelo lwa mambo kupichila mu ‘kuba mingilo yafwainwa lulapilo.’ (Byubilo 26:20) Mu jino jishinda twakonsha kwikala na lwitabilo kuba’mba Yehoba usa kwitulekelako mambo etu. (Masalamo 86:5; 103:8-14) Kikafumamo ke mutende wa mu milangwe, ‘mutende wa Lesa ubula kuyukanyika, ukalama michima yetu ne milanguluko yetu mwi Kilishitu Yesu.’ (Filipai 4:7) Bino lulombelo lwa kumwenako lwa kwa Yesu lwitufunjisha ne byo twafwainwa kuba pa kuba’mba tulekelwe mambo etu.

Pa Kuba’mba Tulekelwe Mambo, Ne Atweba Twafwainwa Kulekelako Bakwetu Mambo

9, 10. (a) Yesu wanungilepo’mba ka pa mambo a lulombelo lwa kumwenako, kabiji kino kyakoseshenga ñanyi kishinka? (b)Yesu watwajijile kushimikizha byepi byo twafwainwa kulekelangako mambo?

⁹ Kya lusekelo ke kya kuba’mba, kwipuzha kwa kuba’mba ‘tulekelaiko mambo etu, byonka byo twibalekelako betulenga mambo,’ lo lubaji lonka Yesu lo alumbulwilepo kyabaya mu lulombelo lwanji lwa kumwenako. Byo apwishishe kulomba, wanungilepo’mba: “Umvwe mwibalekelako bantu mambo abo, ne Shenu wa mwiulu naye ukemulekelako ne mambo enu pamo. Kabiji umvwe kechi mwibalekelako bantu mambo abo ne, ne Shenu wa mwiulu naye kechi ukemulekela mambo enu ne.” (Mateo 6:14, 15) Mu jino jishinda, Yesu walumbulwile bingi bulongo kuba’mba Yehoba wakonshatu kwitulekelako mambo umvwe ne atweba twifuukwila kulekelako bakwetu mambo abo.—Mako 11:25.

¹⁰ Pa kimye kikwabo, Yesu wapaine kya kumwenako kumwesha amba twafwainwa kulekelako bakwetu mambo umvwe ne atweba tukeba’mba Yehoba etulekeleko mambo etu. Washimikizhepo jishimikila ja mfumu umo wifuukwijile kufuuta nkongole ikatampe kalume yoakongwele kwi aye. Bino panyuma uno mfumu waishile kumukabisha bingi uno yenka kalume byoabujile kufuuta nkongole icheche mukwabo kalume yoakongwele kwi aye. Yesu wapezhezheko jishimikila janji nakwamba’mba: “Mo monka mo akemubila ne Tata wa mwiulu kana ne kwibalekela balongo benu mambo abo mu michima yenu ne.” (Mateo 18:23-35) Muji lufunjisho lwaumvwanyika bingi lwa kuba’mba: Mambo o twalekelwako pa muntu pa muntu kwi Yehoba avula bingi kukila mambo aji onse etulenga bakwetu. Ne kyakilapo ke kya kuba’mba Yehoba witulekelako mambo pa juba pa juba. Kine, twafwainwa kwibalekelangako bakwetu mambo abo o betulenga pa kimye pa kimye.

11. Ñanyi lujimuno loajimwañene mutumwa Paulo lo tusakulondela umvwe tukeba’mba Yehoba etulekeleko mambo, kabiji kika kyakonsha kufumamo?

¹¹ Mutumwa Paulo wanembele’mba: “Kasa mwiubila lusa anwe bene na bene, mwikale ba michima yanekena, ne kwilekela mambo anwe bene na bene, byonka byo emulekejile mambo aye Lesa mwi Kilishitu.” (Efisesa 4:32) Kwilekela mambo kya kine ko kuleta mutende ku bena Kilishitu. Kabiji Paulo watundaikile ne kuba’mba: “Byo muji basalululwa ba Lesa, bazhila, batemwe, vwalai bumuchima wanekena, ne lusa, ne kwipelula, ne bukimote, ne kukokamuchima; kasa mwitekenya anwe bene na bene, ne kwilekela mambo, umvwe umo uji na mambo na mukwabo; monka mo emulekejile mambo Nkambo, mo monka mo mubilanga ne anweba: ne pa bino byonse vwalai butemwe, ye mukwato ulumbulula byonse.” (Kolose 3:12-14) Abino byonse biji mu lulombelo loetufunjishe Yesu amba: ‘Tulekelaiko mambo etu, byonka byo twibalekela betulenga mambo.’

Kuzhikijilwa pa Kutwalwa mu Lweseko

12, 13. (a) Kwipuzha kukwabo mu lulombelo lwa kumwenako, ki ka kyo kwafwainwa kubula kulumbulula? (b)Ñanyi mwine mukatampe Wesekañana, kabiji lulombelo lwetu lwa kuba’mba kwitutwala mu lweseko ne lulumbulula ka?

¹² Kwipuzha kukwabo mu lulombelo lwa kumwenako lwa kwa Yesu ke kwa kuba’mba: ‘Kwitutwala mu lweseko ne.’ (Mateo 6:13) Nanchi Yesu watazhizhe mu kuba’mba twafwainwa kumulomba Yehoba amba abule kwitutwala mu lweseko nyi? Ine, kino kechi byobyo kilumbulula ne, mambo mwana wa bwanga Yakoba waingijishiwe na mupashi wazhila kunemba’mba: “Muntu byo aesekwa kechi ambe’mba, naesekwa kwi Lesa, ne; mambo Lesa kechi wesekwa na bubi ne, ne aye mwine kechi weseka muntu nangwa umo ne.” (Yakoba 1:13) Kabiji, nyimbi wa masalamo wanembele’mba: “Anweba Yehoba, inge mwaji mulondalonda kulenga-mambo kwetu, Anweba Nkambo, inge ñanyi ukakonsha kupuluka?” (Masalamo 130:3) Yehoba kechi uta muchima pa bilubo byetu byonse ne, kabiji kechi witutwala mu lweseko amba tulenge mambo ne. Pano nanchi luno lubaji lwa lulombelo lwa kumwenako lwatala mwepi?

¹³ Awa ukeba kwitutwala mu lweseko, amba tufwe mu tukose twa bujimuku ne kwituja ke Satana Diabola. (Efisesa 6:11) Ye mwine mukatampe Wesekañana. (1 Tesalonika 3:5) Umvwe ke tulombe’mba kwitutwala mu lweseko ne, ko kuba’mba tubena kulomba amba Yehoba abule kwituleka tupone umvwe twaikala mu lweseko. Tubena kumwipuzha amba etukwashe “Satana waketujimukila,” kuchina kwitutwala mu bya kweseka. (2 Kolinda 2:11) Tulombatu kuba namba twikale mu “kimfute kya kwa aye Wa bulume bonse,” saka etuzhikijila ku mupashi koalayapo boba bayukanyikisha bumfumu bwa Yehoba mu byonse byo boba.—Masalamo 91:1-3.

14. Mutumwa Paulo witulaya byepi amba Yehoba kechi uketulekelela ne, umvwe twamuketekela Aye mu kimye kyo tuji mu lweseko?

¹⁴ Twafwainwa kuketekela’mba umvwe byo byo tukebesha, kwikutongola mu lulombelo lwetu ne mu byubilo, kine Yehoba kechi uketuleka ne. Mutumwa Paulo witulaya’mba: “Kafwako lweseko lwimufikila lo babula kumona bantu bonse ne: mambo Lesa ye wa kishinka, kechi akemuleke’mba, mumone lweseko lwakila pa bulume bwenu ne: bino mu lweseko ukemumwena ne jishinda ja kupulukilamo, amba mumone mwa kwilukonshesha.”—1 Kolinda 10:13.

‘Kwitutwala mu Lweseko Ne’

15. Ano moba kyanemena ka kulomba kuba’mba tupokololwe ku yewa mubi?

¹⁵ Kwesakana na byaamba mabuku amo aketekelwa a bwina Kilishitu a Binembelo bya Kingiliki, lulombelo lwa kwa Yesu lwa kumwenako lwapezhako na byambo bya kuba’mba: “Mwitupokolole kwi yewa mubi.”a (Mateo 6:13) Mu ano moba a kupelako kikebewa bingi kupokololwa kwi Diabola. Satana ne bademona banji babena kulwa nkondo na bashingwa bashalapo, “bonka balama mikambizho ya Lesa, ne kukwachisha bukamonyi bwa Yesu,” ne balunda nabo ba mu “jibumba jikatampe.” (Lumwekesho 7:9; 12:9, 17) Mutumwa Petelo wajimwine bena Kilishitu amba: “Tekanyai, mulabenga ne kukenkenta: mulwanyi wenu Diabola, nobe bokwe wimba, upitañana na kusaka ye ayuka kuja: mwimenai kasa mwakosa mu lwitabilo lwenu.” (1 Petelo 5:8, 9) Satana ukeba bingi kuchibikizha mwingilo wetu wa kusapwila, uba bino kupichila mu bantu banji ba panopantanda—kikale bupopweshi, ba busulu, nangwa bamulwila ntanda—ukeba kwituzakamisha. Bino umvwe twaimana saka twakosa, Yehoba uketupokolola. Mwana wa bwanga Yakoba wanembele’mba: ‘Byonkabyo nekenenai Lesa; pakuba Diabola, mukanai, ne aye ukemunyema.’—Yakoba 4:7.

16. Ñanyi mashinda Yehoba o aji nao o engijisha kukwashishamo bakalume banji baji mu lweseko?

¹⁶ Yehoba waswishishe amba Mwananji esekwe. Bino Yesu byoamukaine Diabola, kwingijisha Byambo bya Lesa kwikala bya kumuzhikijila, Yehoba watumine bamalaika na kumukosesha. (Mateo 4:1-11) Byonkabyo, Yehoba wingijisha bamalaika banji kwitukwasha umvwe twalomba na lwitabilo ne kumulenga kwikala kyamba kyetu kyakosa. (Masalamo 34:7; 91:9-11) Mutumwa Paulo wanembele’mba: “Aye Nkambo wayuka kupokolola banemeka Lesa mu lweseko, ne kwibalama babulakoloka mu lukabisho, kupembelela juba ja kije.”—2 Petelo 2:9.

Kupokololwa Kukatampe Kujitu Pepi

17. Mu lulombelo lwa kumwenako lo twapewa, Yesu walumbulwile byepi bintu monka mobyaila?

¹⁷ Mu lulombelo lwa kumwenako, Yesu walumbulula bintu monka mobyaila. Atweba kyo tukebesha ke kuzhijika jizhina jikatampe kabiji jazhila ja Yehoba. Byo kiji kuba’mba ino nkebelo ikengilatu kupichila mu kwingijisha Bufumu bwa bu Mesiasa, tulomba Bufumu kwiya na konauna ma bufumu onse a bantu babulakoloka, nangwa’mba makafulumende, ne kumona’mba kyaswa muchima wa Lesa kyaubiwa panopantanda byonka byo kyubiwa mwiulu. Luketekelo lwetu lwa kwikala myaka ne myaka mu paladisa panopantanda lwaimena pa kuzhijika jizhina ja Yehoba ne kuyukanyikisha bumfumu bwanji bwaoloka mwaya ntanda yonse. Panyuma ya kulombela bino bintu byakilamo kunema, twakonsha ne kulombela bintu byetu bya pa juba ne juba, kulekelwa mambo etu, kupokololwa mu meseko ne ku mikika ya kwa aye mubi, Satana Diabola.

18, 19. Lulombelo lwa kumwenako lwa kwa Yesu lwitukwasha byepi kwikala balaba ne kukosesha luketekelo lwetu “kasa twakoselamo ne ku mpelo”?

¹⁸ Kupokololwa kwine kukatampe ku mubi ne ku ino ntanda yanji yaonaika kujitu pepi. Satana wayukishatu amba “kimye kyanji ke kicheche” kyashalako kumwesha ‘bukaji bwanji bukatampe’ panopantanda, kikatakata ku bakalume bakishinka ba kwa Yehoba. (Lumwekesho 12:12, 17) Mu kimwesho kyanji kya “juba jikapelako,” Yesu waambijile jimo bintu bya lusekelo bikamwekananga, bimo bya mu bino bikiji kulutwe yetu. (Mateo 24:3, 29-31) Byo tubena kumona bino saka bimwekana, luketekelo lwetu lwa kupokololwa lukabailangako. Yesu waambile’mba: “Bino bintu pa kutatula kwiya, inukai, ne kwinuna mitwe yenu; mambo bukuzhi bwenu ke buji pepi.”—Luka 21:25-28.

¹⁹ Lulombelo lwipi lwa kumwenako Yesu loafunjishe baana banji ba bwanga lwitutangijila bingi mu byotwakonsha kutongaula mu lulombelo lwetu mpelo byo ibena kufwenya pepi. Mwane kine twayai tutwajijile kwikala na luketekelo kufikatu ne ku mpelo kuba’mba, Yehoba ukatwajijila na kwitupa bintu byotukajilwa pa juba pa juba, bya ku mupashi ne bya ku mubiji. Milombelo yetu ya kwikala balaba iketulengela ‘kulama bulongo ntendekelo ya luketekelo lwetu kasa twakoselamo ne ku mpelo.’—Bahebelu 3:14; 1 Petelo 4:7.

[Tubyambo twa mushi]

Kupitulukamo

• Kyatala mwepi umvwe twalomba’mba mwitupeko “kajo ketu ka lelo”?

• Lumbululai mwatala lulombelo lwa kuba’mba ‘tulekelaiko mambo etu, byonka byo twibalekela betulenga mambo.’

• Kilumbulula ka umvwe twamulomba Yehoba amba abule kwitutwala mu lweseko?

• Mambo ka o twafwainwa kulombela kwi Yehoba amba “mwitupokolole kwi yewa mubi”?

[Bipikichala pa peja 25]

Twafwainwa kulekelako bakwetu mambo umvwe ne atweba tukeba kulekelwa mambo etu

[Byambo biji pa Kipikichala pa peja 23]

Lydekker