Bapwishishenga Sukulu wa Gileada wa Nambala 123

Aba Bapwishishe Sukulu Wa Gileada Bebakambizhizhe “Kutatula Kupoya”

PA JUBA ja pa Kibelushi, pa September 8, 2007, bantu 6,352 kufuma mu byalo 41 bashinkilweko ku kupwila kwa boba bapwishishenga sukulu wa Gileada wa nambala 123. Kimye kya 10 koloko, cheyamani wa kokwa kupwila aye Anthony Morris wa mu Jibumba Jitangijila wafikenejiletu kutambwila luonde. Panyuma ya kwambapo byambo bya kushinkwila, waichile ñambi mutanshi Gary Breaux wa mu Kometi ya Musampi wa mu United States.

Mulongo Breaux watundaikile baana ba sukulu amba, kechi na mambo a mwekelo yabo ne, aba boba kyaswa muchima wa Yehoba bo ba buya kwi aye. (Yele. 13:11) Wakambizhizhe boba bapwishishe sukulu kutwajijila na kumwesha buno buya. Ñambi walondejilepo, aye Gerrit Lösch wa mu Jibumba Jitangijila waambile’mba kyawama bingi kuketekela kutambula mfweto umvwe tubena kwingijila Yehoba. (Hebe. 11:6) Nangwa byonkabyo, mingilo yetu yafwainwa kwingijiwa mu butemwe bwa kine.

Mukulumpe mu Dipatimenti Itala pa Masukulu a mu Jibumba ja Lesa, aye William Samuelson, naye watundaikile boba bapwishishe sukulu kwikala bakishinka ne kulamachila ku mwingilo wanema wa kusapwila pa mambo a Mfumu ubena kulama ne kumwesha munema kupichila mu byubilo byabo byawama.a Kabiji Sam Roberson nkwasho mu Dipatimenti Itala pa Masukulu a mu Jibumba ja Lesa watundaikile bano bapwishishe sukulu kuta muchima kimye kyonse ku byubilo byawama bimwesha bantu bakwabo. Umvwe bauba bino, po po bakonsheshe kwikala na muchima wa ‘kutemwa balongo bonse.’—1 Pe. 2:17.

Panyuma ya ano majashi awama, mufunjishi wa sukulu wa Gileada, aye Mark Noumair waipwizhe boba bapwishishe sukulu joja juba bamo kwambapo bintu bimo byamwekele mu mwingilo wa mu bujimi kimye kyo bafunjilenga sukulu wabo wa Gileada. Bonse bajinga mu luonde bemwenejile bene bano baana ba sukulu byo batemwa mwingilo ne kukebesha kukwasha bakwabo. Kepo Kent Fischer wingijila pa Ofweshi wa Musampi wa Patterson aipwizhe ba mu Kometi ya Musampi kufuma mu byalo bisatu mo batumine bamishonale. Byambo byo baambile bano balongo byalengejile luonde pamo ne bansemi bavula ba bano bapwishishenga sukulu kuyuka kuba’mba bamishonale bo batuma balamwa bingi bulongo mu byalo mo baya na kwingijila. Kabiji Izak Marais wa mu Dipatimenti itala pa bya Kutuntulula mabuku naye waipwizhepo bamo babandamo mu uno mwingilo wa bumishonale kwambapo bimo bimweka abyo byalengejile bapwishishenga sukulu kuyuka bintu bya lusekelo byo bakatananga mu mwingilo.

Jashi jikatampe jaambile Geoffrey Jackson wa mu Jibumba Jitangijila jajinga na mutwe wa kuba’mba “Ki ka kyo Mukoba na byo Mwaumvwa?” Mulongo Jackson, waingijile mu mwingilo wa bumishonale pa myaka pepi na 25 mu South Pacific, waambile pa byambo bya kupezhako bya mu Jashi ja pa Mutumba. Mu joja jashi, Yesu waambile pa bantu babiji batungile mazubo, umo wa maana ne mukwabo wabujile maana. Ñambi waambile’mba mazubo onse abiji afwainwa atungiwe ku mpunzhatu imo. Bino muntu wabujile maana watungile pa busenga, pano awa wajinga na maana aye wapoyele posotu ne byo ataine kitendekesho kyakosa po atungile nzubo yanji. Mvula wa kinkunkwila byo aishile, nzubo yatungijilwe pa jibwe kechi yaponene ne, bino aya yatungijilwe pa busenga yaponene.—Mat. 7:24-27; Luka 6:48.

Yesu walondolwele’mba muntu wabujile maana ufwanyikizhiwa ku boba baumvwine byo aambilenga, pano kechi baubilepo nangwa kimo ne. Ne muntu wa maana wafwanyikizhiwa ku boba baumvwine byambo bya kwa Yesu ne kwibingijisha. Mulongo Jackson wabujile bapwishishe sukulu amba, “Umvwe saka mwingijisha byo mwafunda mu lufunjisho lwa Baibolo mu mwingilo wa bumishonale, mukekala pamo nobe mwanamulume wa maana.” Onkao mambo, mu byambo bya kupezhako watundaikile baana ba sukulu “kutatula kupoya” mu mwingilo wabo wa bumishonale.

Kepo aba bapwishishe sukulu batambwile mapepala abo a kupwishishapo sukulu [diploma], ne kwibabula ku byalo ko bakaya na kwingijilanga, kabiji Mulongo Morris waambilepo byambo bya kupezhako. Watundaikile bapwishishenga sukulu kulonda Yesu kimye kyonse ne kubula kulubamo kukinka manungo mwi Yehoba. Apano po papwijile ne mutanchi yense.

[Tubyambo twa mushi]

[Kitenguluzha pa peja 31]

BIBELENGELO BYA BAJINGA MU SUKULU

Bafumine mu byalo: 10

Bebatuma mu byalo: 24

Baana basukulu bonse pamo bajinga: 56

Myaka ya kusemwa umvwe twiyabanya pa muntu pa muntu ke: 33.5

Myaka yo baikala mu bukine umvwe twiyabanya pa muntu pa muntu ke: 17.9

Myaka yo baingila mu mwingilo wa kimye kyonse umvwe twiyabanya pa muntu pa muntu ke: 13:8

[Kipikichala pa peja 32]

Bapwishishenga Sukulu wa Gileada wa Nambala 123

Ndonda ya mazhina alondelapo ibena kubalwa kufuma panshi kuya peulu, ne mazhina nao alondankana kutatwila ku kipiko kuya ku kilujo mu munongo umo umo.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.