FWENYAI KWIPI NE LESA

‘Mwibisolola ku Baana Babacheche’

Nanchi mukeba kuyuka bukine pe Lesa, byo aji, byo atemwa ne byo ashikwa ne kyaswa muchima wanji nyi? Mu Mambo anji Baibolo, Yehoba Lesa wisolola aye mwine. Pano bino kechi yense utanga Baibolo wakonsha kumvwisha buno bukine ne. Mambo ka? Mambo kumvwisha bukine pe Lesa ke kintu kyanema bingi, kechi yense wakonsha kwibuyuka ne. Twayai twisambe pa byaambile Yesu pa buno bukine.—Tangai Mateo 11:25.

Kino kyepelo kyatendeka na byambo bya kuba’mba: “Pa kyokya kimye Yesu waambile amba.” Yesu waambilenga pa byamwekele panyuma kacheche. Popoafuminetu na kwambilamo bantu bakainenga kwikala baana banji ba bwanga ba mu mizhi isatu ya mu Ngalilea ko aubile byakukumya. (Mateo 11:20-24) Kampe mwakonsha kwishikisha’mba, ‘Muntu wakonsha kumona byepi mingilo ya kwa Yesu yakukumya kabiji wabula kwitabila bukine boafunjishenga?’ Kukosa michima kwabo ko kwibalengejile kubula kutako muchima.—Mateo 13:10-15.

Pa kuba’mba tumvwishe bukine bwa mu Baibolo, pakebwa bintu bibiji: Bukwasho bwa Lesa ne muchima wawama. Yesu waambile’mba: “Nemutota anweba Tata, Nkambo wa mwiulu ne ntanda, mambo mwafile bino bintu ku bamaana ne bamilangwe ne kwibisolola ku baana babacheche.” Abya mwamona ene mambo kumvwisha bukine bwa mu Baibolo kyo kwanemena nyi? Yehoba, “Nkambo wa mwiulu ne pano pa ntanda,” uji na lūsa lwa kubula kusolola bukine nangwa kwibusolola inge wakeba. Pano bino Lesa kechi utala ku bilungi pa kusolola bukine ne. Ki ka kimulengela kusololatu bukine bwa mu Baibolo ku bamo?

Yehoba utala bulongo bepelula, kechi belundumika ne. (Yakoba 4:6) Kechi usolola ‘maana ku bamaana’ ne, ko kuba’mba ku bantu belundumika babula kukeba kwibakwasha kumvwisha bukine. (1 Kolinda 1:19-21) Usolola maana ku “baana babacheche,” bantu beya koaji na muchima yense, bekepesha nobe baana ba bacheche. (Mateo 18: 1-4; 1 Kolinda 1:26-28) Yesu Mwana Lesa, wayukile bantu bajinga na ino michima. Bantu belundumika, bantangi ba bupopweshi bafunda kufika palepa kechi batambwijile byambo bya kwa Yesu ne, bino bakwatanga masabi bepelwile bo bebitambwijile. (Mateo 4:18-22; 23:1-5; Byubilo 4:13) Kabiji banonshi ne bafunda bamo bekepeshe kyakine nabo baikele baana ba bwanga ba kwa Yesu.—Luka 19:1, 2, 8; Byubilo 22:1-3.

Tubwele ku bwipuzho buji kuntendekelo bwa kuba’mba: Nanchi mukeba kuyuka bukine pe Lesa nyi? Umvwe ibyo, kuyuka kuba’mba Lesa kechi usekela mu bemona kwikala na maana mu ino ntanda ne, kusakwimutekenesha bingi. Usekela mu boba bobalengulula mu ino ntanda. Inge mwafunda Mambo a Lesa na muchima wipelula mukatambula bupe bwa Yehoba bwa kumvwisha bukine pe aye. Kumvwisha buno bukine kukemulengela kwikala na lusekelo mu bwikalo bwenu ne kwikala na “bumi bwa kine kine,” bumi bwa myaka mu ntanda ipya ya bololoke yalaya Lesa ibena kwiya katataka.a—1 Timoti 6:12, 19; 2 Petelo 3:13.

Kutanga Baibolo mu January:

Mateo 1-21

[Tubyambo twa mushi]