“Tambulai Kikonkoji Kyami”
1 Mu ino ntanda ya makatazho ne bijikila, twatana lusekelo lwa kine byo twaswa lwito lwa Yesu lwa kwitukokolosha kupichila mu kutambula kikonkoji kyanji. (Mat. 11:29, 30) Kutambula kikonkoji kya bwana ja bwanga kwavwangamo kwingila mwingilo uleta lusekelo nangwa kya kuba wakosa. Kabiji kwavwangamo ne kusapwila mambo awama a Bufumu ne kukwasha bantu kukokolokela pamo ne atweba mu kikonkoji kyapela kya Yesu.—Mat. 24:14; 28:19, 20.
2 Lusekelo mu Mwingilo wa mu Bujimi: Yesu kechi waambijile baana banji ba bwanga kupangachila kisendwa kyanji na kyabo kyo bajinga nakyo ne. Wibambijile kutulapo kisendwa kyabo kyanemene ne kusendako kyanji kyapela. Kechi twakinemenwa na bijikila bya buno bwikalo ne; kabiji kechi twingijila bunonshi bwa kubula ne kuketekela ne. (Luka 21:34; 1 Timo. 6:17) Nangwa kya kuba twapayankana kabiji twafwainwa ne kwingila kuba’mba tumone mwakwikwashisha, kupopwela Lesa kyo kintu kikatampe mu bwikalo bwetu. (Mat. 6:33) Umvwe saka twikala na mweno yawama ya kintu kyanema mu bwikalo bwetu, tukamonanga mwingilo wa mu bujimi kwikala wa kwitukokolosha mu kifulo kya kwitulemuna.—Fili. 1:10.
3 Javula twamba bingi pa bintu byo twatemwa. (Luka 6:45) Bena Kilishitu bonse batemwa bingi Yehoba ne bintu byawama byo alaya bikoba Bufumu bwanji. Onkao mambo, byo kisangajikapo kwamba pa “mambo a lusekelo a bintu byawama” ne kulubako ku bijikila bya moba onse kimye kyo tuji mu mwingilo! (Loma 10:15) Umvwe kintu ketwikyube javula, po po twikiyukisha bulongo bya kwikyuba ne kumwenamo lusekelo. Mu jishinda jimotu, umvwe ketwingileko pakatampe mu mwingilo kwesakana na bulume bwetu, lusekelo lwetu lukabayilangako. Kabiji kitusangajika bingi umvwe bantu kebaswe bintu byo twibasapwila. (Byubilo 15:3) Nangwatu umvwe twatana bantu bamisula nangwa balupata, uno mwingilo wakonsha kwituletela lusekelo inge satuvuluka’mba tubena kutokesha Yehoba pa muchima byo tubena kwibikako kumwingijila kabiji ne kuba’mba, bibusa byanji bikalengela bantu kukeba kumvwa ku byo twibasapwila.—Byubilo 5:41; 1 Ko. 3:9.
4 Umvwe twaswa lwito lwa Yesu, twikala na jishuko ja kwingijila nanji pamo byo tuji Bakamonyi ba kwa Yehoba. (Isa. 43:10; Lum. 1:5) Kafwako kintu kikwabo kyakonsha kwituletela lusekelo kyakila pa kino ne!