Yesu Wavuzhizhe Bashinkwa Kabiji Wajimwineko Baana Banji Ba Bwanga Pa Mbizho

Jibumba jikatampe jaishile kwi Yesu mu Ndekapoli ku musela wa Kalunga ka Ngalilea. Bavula baishile na kuteleka kwi aye ne kuba’mba ebabuke bikola byabo. Basendele bitumbe bikatampe nangwa’mba misansa mo basendelanga kajo.

Byo papichileko kakimye, Yesu waichile baana banji ba bwanga ne kwibambila’mba: “Nejumvwina bingi lusa jibumba, mambo ke moba asatu o naikala nabo kabiji kafwako kyo bajapo ne. Mambo umvwe nebambile’mba babwele ku mazubo abo na nzala, basakutembuka mu jishinda, kabiji bamo bafuma kwalepa.” Bino baana banji ba bwanga bamwambijile’mba: “Kuno ku mpunzha ko tuji kwalepa, kwepi ko twakonsha kutaana bashinkwa ba kujiisha bano bantu?”—Mako 8:2-4.

Yesu wibashikishe’mba: “Muji na bashinkwa banga?” Baana ba bwanga bakumbwile’mba: “Batanu na babiji ne tumasabi tucheche.” (Mateo 15:34) Kepo Yesu aambijile bantu kwikala panshi. Washikwile bashinkwa ne tumasabi, kabiji byo alombele, wibapaine ku baana banji ba bwanga kuba’mba bebapane ku bantu. Kabiji bonse bajiile ne kwikuta. Bashikwile bibese byashajilepo ne kuyuzha bitumbe bitanu na bibiji. Nangwa kya kuba pajinga banabalume nobe 4,000, bonse bajiile kuvwangakotu ne banabakazhi ne baana.

Yesu byo aambijile jibumba kuya, wakanjijile mu bwato ne kwabukila ku Mangadana ku muzhika wa Kalunga ka Ngalilea. Akwa Bafaliseo ne ba mu bupopweshi bwa Basadusea baishile pamo na kweseka Yesu amba amweshepo kiyukilo kimo kufuma mwiulu.

Yesu byo ayukile’mba babena kumweseka, wibambijile’mba: “Umvwe kyafika mabanga anweba mwamba’mba, ‘Kukakya bulongo, mambo jiulu jachila,’ kabiji lukelo amba, ‘Kusakwikala mashika ne mvula, mambo jiulu jachila ne kufinda.’ Mwayuka kulumbulula bimweka jiulu, bino biyukilo bya ano moba mukankalwa kwibilumbulula.” (Mateo 16:2, 3) Kepo Yesu abuujile Bafaliseo ne Basadusea amba kafwako kiyukilo kyo bakebamwesha ne, kana kyonka kya kwa Yona.

Yesu ne baana banji ba bwanga bakanjijile mu bwato ne kuya ku Beteseda ku kabeta ka buyeke musela bwa kalunga. Byo bakiyilenga, baana banji ba bwanga bavulukile’mba balubako kusenda bashinkwa, bajingatu na shinkwa umo. Yesu byo avulukile bintu byo afuminetu na kwisamba na Bafaliseo ne Basadusea batundaikanga Heloda, wajimwine baana banji ba bwanga amba: “Saka mulaba; Jimukai na mbizho ya Bafaliseo ne mbizho ya kwa Heloda.” Baana ba bwanga balangulukilenga’mba ubena kwamba pa mbizho mambo balubileko kusenda bashinkwa. Yesu byo ayukile’mba kechi bakwatakanya ne, wibepwizhe’mba: “Mambo ka o mubena kwipachikila pa mambo a kubula bashinkwa?”—Mako 8:15-17.

Yesu wajishishe biumbi bya bantu na bashinkwa. Onkao mambo, baana ba bwanga bafwainwe kuyuka’mba kechi waambilenga pa kubula bashinkwa bonkabe ne. Wibepwizhe’mba: “Nanchi kechi mwavuluka byo natebawile bashinkwa batanu banabalume 5,000 bo bajiile nenyi? Bitumbe binga byayujile na bibese byo mwasendele?” Abo bakumbwile’mba: “Jikumi na bibiji.” Yesu watwajijile kwamba’mba: “Byo natebawile bashinkwa batanu na babiji banabalume 4,000 bo bajiile, bitumbe binga bikatampe byayujile na bibese byo mwasendele?” Abo bakumbwile’mba: “Bitanu na bibiji.”—Mako 8:18-20.

Yesu waipwizhe’mba: “Mambo ka o mwabujila kuyuka’mba kechi nabaambenga ne anweba pa bashinkwa ne?” Kabiji wanungilepo amba: “Jimukai na mbizho ya Bafaliseo ne Basadusea.”—Mateo 16:11.

Kepo baana ba bwanga bakwatakenye kyo aambilengapo. Mbizho ilengela muvuba ne shinkwa kututumuka. Yesu waingijishenga mbizho kulumbulula biji bubi. Wajimwinenga baana ba bwanga kwikala bajimuka na mambo “a mafunjisho a Bafaliseo ne Basadusea,” atwalanga bantu mungi.—Mateo 16:12.