Kitango 1

Ene Mambo Yesu O Aikejile Mufunjishi Wayukisha

KALA kene papita ne myaka 2,000, kwasemenwe mwana wakomene ne kwikala muntu wayukanyikilwe bingi. Kafwako muntu nangwa umo wajinga na madeke nangwa myotoka ne. Kabiji kechi kwajinga matelevizhonyi, makompyuta, ne Intaneti ne.

Uno mwana bamutumbile jizhina amba Yesu. Wajinga na maana kukila bantu bonse panopantanda. Kabiji waikele ke mufunjishi wayukisha kufunjisha. Walondololanga bintu byakosa mu jishinda japela kumvwa.

Yesu wafunjishanga bantu konse ko ebatananga. Wibafunjishanga ku kitulu kya kalunga ka mema ne mu maato. Kabiji wibafunjishanga mu mazubo abo ne pa lwendo. Yesu kechi wajingapo na motoka ne, kabiji kechi waendelepo mu sakya nangwa mu shitima ne. Waendangatu panshi kuya mu mapunzha avula na kufunjisha bantu.

Tufunda bintu byavula bingi ku bantu bakwetu. Pano bino, twakonsha kufunda bintu byanema bingi ku Mufunjishi Wayukisha, aye Yesu. Byambo byafunjishanga Yesu biji mu Baibolo. Kijitu nobe Yesu ubena kwamba kwi atweba umvwe ke tutange nangwa kumvwa ku bino byambo biji mu Baibolo.

Mambo ka Yesu o aikejile Mufunjishi Wayukisha? Kishinka kimo ke kya kuba’mba Yesu bamufunjishe. Kabiji wayukile’mba kyanema bingi kumvwa bibena kwambiwa. Nga Yesu waumvwanga kwi ñanyi? Ñanyi wamufunjishe?— Shanji ye wamufunjishe. Lesa ye Shanja Yesu.

Yesu saka akyangye kwiya panopantanda, waikalanga mwiulu na Lesa. Onkao mambo, Yesu wapusene bingi na bantu bakwabo mambo kafwako muntu nangwa umo waikelepo mwiulu saka akyangye kusemwa panopantanda ne. Mwiulu Yesu wajinga Mwana wa lukokelo, waumvwinanga Shanji. Onkao mambo, Yesu wafunjishanga bantu bintu byo afunjile kwi Lesa. Ne obewa wakonsha kulonda Yesu umvwe ke umvwine bashobe ne bainobe.

Kishinka kikwabo Yesu kyo aikejile Mufunjishi Wayukisha ke kya kuba’mba watemenwe bantu. Wakebanga kukwasha bantu kuyuka Lesa. Yesu watemenwe bakulumpe ne baana ba bacheche pamo. Kabiji baana ba bacheche batemwanga bingi kuya kwi Yesu mambo waambanga nabo, kabiji naye waumvwanga byo baambanga.

Juba jimo bansemi baletele baana babo ba bacheche kwi Yesu. Pano bino baana banji ba bwanga balangulukile’mba Mufunjishi Wayukisha kechi uji na kimye kya kwisamba na baana ba bacheche ne. Baambijile bano bansemi ne baana babo amba bwelaimo. Nga Yesu waambilepo’mba ka?— Waambile’mba: ‘Balekai baana bacheche beye kwi amiwa; ne kwibakanya ne.’ Ee, Yesu wakebele baana ba bacheche kuya koaji. Nangwa kya kuba wajinga muntu wa maana kabiji wanema, Yesu waikalangapo na kimye kya kufunjisha baana ba bacheche.—Mako 10:13, 14.

Nanchi obewa wayuka ene mambo Yesu o afunjishanga baana ba bacheche ne kumvwa ku byo baambanga nyi? Kishinka kimo ke kya kuba’mba wakebelenga kwibasangajika kupichila mu kwibabula bintu byaamba pe Lesa, Shanji wa mwiulu. Nga obewa wakonsha kusangajika byepi bantu?— Wakonsha kwibasangajika umvwe ke wibabule bintu byo wafunda pe Lesa.

Kimye kimo, Yesu waingijishe mwana mucheche kufunjisha baana banji ba bwanga lufunjisho lwanema bingi. Waletele mwana mucheche mukachi ka baana banji ba bwanga, ne kwibambila’mba bafwainwa kupimpula byubilo byabo ne kwikala nobe mwana mucheche.

Bino byambo Yesu nanchi wibitazhizhe mwepi? Nanchi wayuka mukulumpe, nangwa mwanyike wakomako, byo afwainwa kwikala nobe mwana mucheche nyi?— Mwana mucheche kechi wayuka byavula kukila mukulumpe ne, kabiji wikala na muchima wa kukeba kufunda. Onkao mambo, Yesu waambilenga’mba baana banji ba bwanga bafwainwa kwipelula nobe baana ba bacheche. Ee, atweba bonse twakonsha kufunda bintu byavula ku bakwetu. Kabiji twafwainwa kuvulukanga’mba mafunjisho a kwa Yesu anema bingi kukila bintu byo tulanguluka atwe bene.—Mateo 18:1-5.

Kabiji kishinka kikwabo Yesu kyo aikejile Mufunjishi Wayukisha ke kya kuba’mba waambanga bintu byafikanga bantu pa michima. Wibilumbulwilenga bulongo. Waambilepo pa bañonyi, maluba, ne bintutu bikwabo kuba’mba akwashe bantu bamuyuke Lesa.

Juba jimo Yesu byo ajinga ku mutumba, bantu bavula baishile koaji. Yesu waikele ne kutendeka kwamba jashi, byonka byo ubena kumona pa kikye kipikichala. Jino jashi jitelwa’mba Jashi ja ku Mutumba. Waambile’mba: ‘Talai ku bañonyi ba mwiulu. Kechi babyala ne. Kechi balonga kajo mu matala ne. Pano bino Lesa wa mwiulu wibajisha. Nanchi anweba kechi mwibakila bañonyi mu kunema nenyi?’

Kabiji Yesu waambile’mba: ‘Langulukai buluba bwa mungye byo bukoma. Bukoma kwa kubula kwingila mwingilo ne. Kabiji monai byo bumwekana bulongo! Nangwatu Mfumu Solomone ka avwajilepo bulongo pamo ne abo buluba ne. Nanchi umvwe Lesa ukomesha maluba ekomenatu, abya wakonsha kukankalwa kwimulama nyi?’—Mateo 6:25-33.

Nanchi wayuka lufunjisho Yesu lo afunjishenga nyi?— Kechi wakebelenga’mba tubambishenga michima amba kwepi ko twakonsha kufumya kajo nangwa bya kuvwala ne. Lesa wayuka’mba tukeba bino byonse. Yesu kechi waambile’mba twafwainwa kwikalatu chaka kwa kubula kwingila pa kuba’mba twikale na kajo ne bya kuvwala ne. Pano bino, waambile’mba patanshi twafwainwa kukeba Lesa. Umvwe twauba bino, Lesa uketukwasha kwikala na bya kuja ne bya kuvwala. Walanguluka’mba kino kyakonsha kubiwa nyi?—

Yesu byo apwishishe kwamba, bantu baubilepo ka?— Baibolo waamba’mba, bakuminye bingi jishinda jo afunjishengamo. Baumvwinenga bingi bulongo kuteleka kwi aye. Byambo byo aambile byakwashishe bantu kuba byawama.—Mateo 7:28.

Onkao mambo, kyanema bingi kufunda kwi Yesu. Wayuka byo twakonsha kumumvwina nyi?— Tuji na byambo byanji byanembwa mu buku. Nanchi uno buku wamuyuka nyi?— Uno buku ke Baibolo. Twakonsha kumumvwina Yesu umvwe twateshako muchima ku bintu byo tutanga mu Baibolo. Baibolo waamba pe Lesa byo etukambizha kumumvwina Yesu. Akitwaya tumone byo kyajinga.

Juba jimo, Yesu wasendele baana banji ba bwanga basatu ku mutumba. Bano bajinga ba Yakoba, Yoano, ne Petelo. Tukafunda bintu byavula pa bano bantu basatu kulutwe, mambo bonse bajinga baana ba bwanga ba kwa Yesu. Byo bajinga ku mutumba, kilungi kya kwa Yesu kyatendekele kusama nobe juba. Kabiji bivwalo byanji byaalukile to nobe kyeya, byonka byo ubena kumona pa kikye kipikichala.

Kepo Yesu ne balunda nanji, baumvwine jiwi kufuma mwiulu amba: “Uno ye Mwanami, ye natemwa, mo namwena lusekelo; mumvwai aye.” (Mateo 17:1-5) Nanchi wayuka waambile bino byambo nyi?— Wajinga Lesa! Ee, Lesa ye waambile’mba, bafwainwa kumumvwina Mwananji.

Nga atweba ano moba kiji byepi? Nanchi tukokela Lesa ne kumvwina Mwananji, Mufunjishi Wayukisha nyi?— Atweba bonse twafwainwa kubanga bino. Abya ubena kuvuluka byo twakonsha kumumvwina nyi?—

Ee, twakonsha kumumvwina Mwana Lesa umvwe ketutange mashimikila a mu Baibolo aamba pa bwikalo bwanji. Kobiji bintu byavula bingi Mufunjishi Wayukisha byo akeba kwitubula. Ukatemwa bingi kufunda bino bintu byanembwa mu Baibolo. Kabiji ukekala bingi na lusekelo umvwe ke ubuleko bakwenu bintu byawama byo ufunda.

Bishinka bikwabo byawama byaamba pa buneme bwa kumvwina Yesu, zhikula Baibolo obe ne kutanga Yoano 3:16; 8:28-30; ne Byubilo 4:12.

[Kipikichala pa jipa 11]

Mambo ka baana ba bacheche o bayilanga kwi Yesu?

[Kipikichala pa jipa 12]

Lufunjisho ka baana bakomako ne bakulumpe lo bakonsha kufunjilako ku mwana wa mucheche?

[Kipikichala pa jipa 13]

Ñanyi lufunjisho Yesu lo afunjishenga kimye kyo aambile pa bañonyi ne maluba?

[Kipikichala pa jipa 14]

“Uno ye Mwanami, . . . mumvwai aye”