Kulama Mutende ne Butooto mu Kipwilo

PA mwaka pa mwaka, bantu bavula babena kwiya ku nzubo ya Yehoba kuji bupopweshi bwa kine, kufikizha bungauzhi bwa mu Baibolo. (Mika 4:1, 2) Twibatambwila na lusekelo mu “kipwilo kya Lesa.” (Byu. 20:28) Bomvwa bingi bulongo kwingijila Yehoba pamo ne atweba ne kwiyowa paladisa wetu wa ku mupashi watoka kabiji wa mutende. Mupashi wazhila wa Lesa ne mafunde awama aji mu Mambo anji bitukwasha kwikala mu mutende ne kulengela kipwilo kwikala kyatooka.—Sala. 119:105; Zeka. 4:6.

² Kwingijisha mafunde a mu Baibolo kwitulengela “kuvwala bumuntu bupya.” (Kolo. 3:10) Twibikishako bingi kukana mitotololo ne lutobo. Na mambo a kumwena bintu monka mumwena Yehoba, tushinda byubilo bya ino ntanda bilengela kwabenamo. Kabiji kino kitulengela kwingijila pamo saka twakwatankana na balongo betu ntanda yonse.—Byu. 10:34, 35.

³ Nangwa byonkabyo, bimye bimo pamweka makatazho avulañanya mutende ne kukwatankana mu kipwilo. Ñanyi kintu kilengela ano makatazho? Javula ke na mambo a kukankalwa kulondela mafunde a mu Baibolo. Kabiji tubena kulwa na byubilo byetu bya bumbulwa kulumbuluka. Kafwako nangwa umo mwi atweba ubula kulenga mambo ne. (1 Yoa. 1:10) Bamo bakonsha kuba bubi bwakonsha kuleta byubilo byatama nangwa konauna mutende mu kipwilo. Twakonsha kuzhingijisha mukwetu na byambo byetu bya kupulumukatu nangwa na byubilo byetu, nangwa bakonsha kwitutuntwisha na byaamba mukwetu nangwa na byo auba. (Loma 3:23) Pa bimye bya uno mutundu, twakonsha kuba byepi pa kuba’mba tupwishe makatazho?

⁴ Yehoba mu butemwe bwanji witubuula byo twafwainwa kuba inge twapusenamo na mukwetu. Mu Mambo anji muji mafunde akonsha kwitukwasha inge twaikala na luno lukatazho. Bakafunga mu kipwilo bakwashañana inge twapusenamo. Umvwe ke ketulondela mafunde a mu Binembelo, twakonsha kwikala jikwabo na bulunda bwawama na bakwetu ne kwikala na bulunda bwawama ne Yehoba. Umvwe betufundako nangwa betukajipila pa mambo o twalenga, twafwainwa kuyuka’mba kuno kwitololako kumwesha butemwe bo etutemwa Shetu wa mwiulu.—Maana 3:11, 12; Hebe. 12:6.

KUPWISHA MAMBO ACHECHE

⁵ Bimye bimo, balongo nangwa banyenga mu kipwilo bakonsha kutoboka nangwa kupusenamo mulwabo. Bafwainwa kupwisha bukiji luno lukatazho na mambo a kutemwa balongo. (Efi. 4:26; Fili. 2:2-4; Kolo. 3:12-14) Javula inge mwapusenamo na mwina Kilishitu mukwenu, lukatazho lwenu lwakonsha kupwa inge mwalondela byaambile mutumwa Petelo amba, “itemwishai anwe bene na bene, mambo butemwe buvweta pa mambo avula.” (1 Pe. 4:8) Baibolo waamba’mba: “Atweba bonse twituntula javula.” (Yako. 3:2) Kabiji umvwe ke tulondele byaamba Muzhilo Wawama, tukobilanga bakwetu byonka byo tukeba’mba nabo betubilenga. Kabiji twakonsha kwibalekelako mambo ne kulubakotu ku mambo o betulenga.—Mat. 6:14, 15; 7:12.

⁶ Umvwe mwamona’mba mukwenu wazhingila na mambo a byo mwaambile nangwa byo mwaubile, mwafwainwa kupelawizha kukebapo jishinda ja kupwainamo. Vulukai’mba bulunda bwenu ne Yehoba nabo buji mu lukatazho. Yesu wafunjileko baana banji ba bwanga amba: “Kabiji umvwe ke ulete mulambo wobe ku kya kusokelapo bitapisho kabiji wavuluka’mba uji na mambo na mulongo wobe, sha konka mulambo wobe. Patanshi kapwane na mulongo wobe apa bino ubwele ulambule mulambo wobe.” (Mat. 5:23, 24) Kampe kechi mwaumvwisha mwatazha mukwenu ne. Inge kyaikala bino, mwafwainwa kwisamba nanji. Kwisamba bulongo na balongo ne banyenga mu kipwilo kukwasha bingi kubula kumvwina mungi byaamba mukwenu kabiji kukwasha kupwisha makatazho eya na mambo a bundengamambo bwetu.

KUFUNDAKO MUNTU KWINGIJISHA BINEMBELO

⁷ Bimye bimo, bakalama mu kipwilo bakonsha kufundako muntu umo pa kuba’mba bamukwashe kupimpula ndangulukilo yanji. Kuba kino kechi kwapeela ne. Mutumwa Paulo wanembejile bena Kilishitu ba mu Ngalatiya amba: “Balongo bami, umvwe muntu kaye mu jishinda jingi kwa kubula aye mwine kuyuka, anweba mwakoma ku mupashi mwafwainwa kumwalulula muntu wa byonka bino na muchima wakooka.”—Nga. 6:1.

⁸ Inge bakalama ke bengile mwingilo wabo wa kufunga jitanga ja Lesa, bazhikijila kipwilo ku bizumba byavula ne ku makatazho akonsha kwiyamo. Bakulumpe mu kipwilo bafwainwa kufikilamo kwingila mwingilo waambile Yehoba kupichila mwi Isaya amba: “Bonse pa muntu pa muntu bakekala nobe kya kufyamamo pa kwiya kipupu, bakekala nobe mpunzha ya kufyamamo pa kwiya mvula wa kinkunkwila, kabiji nobe tukola twa mema tuji mu kyalo mwabula mema, kabiji bakekala nobe kimfutele kya mu jibwe jikatampe jiji mu kyalo mwauma.”—Isa. 32:2.

KULABIJILA BAKYENDEENDE

⁹ Mutumwa Paulo wajimwineko pa bantu bamo bajinga na byubilo byatama byakonsheshe konauna kipwilo. Paulo waambile’mba: “Tubena kwimupa mikambizho . . . kuba’mba mwabane na mulongo yense wenda kyendeende kabiji ubula kulondela mafunjisho anweba o mwafunjile kwi atweba.” Walumbulwile mwatala bino byambo byo anembele’mba: “Umvwe muntu wabula kukookela byambo byetu biji mu ino nkalata, mumulabijile ne kuleka kupwanañana nanji, pa kuba’mba kimulenge bumvu. Pano bino, kange mumumonenga nobe mulwanyi ne, bino saka mumufunda byo aji mulongo.”—2 Tesa. 3:6, 14, 15.

¹⁰ Bimye bimo, muntu wakonsha kulenga mambo o bafwainwa kubula kumupangilapo mu kipwilo. Kabiji wakonsha ne kutendeka kulengulula mizhilo ya Lesa ilondela bena Kilishitu. Kino kyakonsha kuvwangamo kwikala nkope, wa milengulwila nangwa wa busaji ne “kwibika mu mambo a bakwabo.” (2 Tesa. 3:11) Kampe wakonsha kujiila bakwabo makusu pa mutwe nangwa kwivwanga mu byakisangajimbwe byabula kufwainwa. Bino byubilo bya bukyendeende byatama byakonsha kulengela kipwilo kunenwa bibi. Kabiji byakonsha kulengela ne bena Kilishitu bakwabo kutendeka kwibyuba.

¹¹ Bakulumpe mu kipwilo patanshi bakakwasha kyendeende kwingijisha mafunde a mu Baibolo. Nangwa byonkabyo, umvwe uno muntu watwajijilatu na kulengulula mafunde a mu Baibolo nangwa kya kuba bamujimunako javula, bakulumpe bakonsha kufuukulapo kwamba jashi ja kujimunako kipwilo. Pa kuba’mba bakulumpe bafuukulepo kunengezha jashi ja kujimunako kipwilo, bakesambapo pa kuba’mba bayuke kana byubilo byanji byatamishatu kabiji ubena kutundaika bakwabo kwibyuba nangwa ne. Ñambi ukapana lujimuno lwafwainwa pa mambo a byubilo bya bukyendeende, bino kechi ukatongola jizhina ja yewo kyendeende ne. Kabiji bantu bayuka byubilo bibena kwambiwapo mu jashi bakachinuzhukanga kupwanañana na yewo muntu, nangwa kya kuba ku mupashi bakapwanañenanga pamo ‘saka bamufunda byo aji mulongo.’

¹² Umvwe baongo ne banyenga baleka kupwanañana nanji, kikalengela kyendeende kumvwa bumvu ne kupimpula byubilo byanji. Inge kyamwekeshatu patoka’mba uno muntu waleka byubilo byanji byatama, kechi bafwainwa kumumonanga’mba ukiji kyendeende ne.

KUPWISHA MAMBO AMO AKATAMPE

¹³ Kulubako ne kulekelako muntu mambo kechi kulumbulula’mba twalengulula mambo nangwa’mba twiaswisha ne. Kabiji kechi mambo onse eyako na mambo a bundengamambo bo twaswana ne; kabiji kechi kyawama kutalapotu pa mambo akatampe ne. (Levi 19:17; Sala. 141:5) Lulayañano lwa Mizhilo lwamwesheshe’mba mambo amo abaya kukila akwabo, kabiji byo byo kiji ne mu kipwilo kya bena Kilishitu.—1 Yoa. 5:16, 17.

¹⁴ Yesu watongwelepo mashinda akonsha kulondela bena Kilishitu inge belenga mambo akatampe. Waambile’mba: “Umvwe mulongo wobe wakulenga mambo, [1] yanga ukamubuule mambo o akulenga. Umvwe wakumvwa, ko kuba’mba wabwezha mulongo wobe mu jishinda jawama. Bino umvwe wakana kukumvwa, [2] wafwainwa kusendapo muntu umo nangwa babiji, kuba’mba na byambo bya bakamonyi babiji nangwa basatu mambo alumbuluke. Umvwe wabula kwibomvwa, [3] buula kipwilo. Kabiji inge wabula kumvwina kipwilo, ekale kwi obewa nobe wa mu bisaka bikwabo nangwa nobe musonkeshi.”—Mat. 18:15-17.

¹⁵ Kishimpi kyaambile Yesu kiji mu Mateo 18:23-35, kimwesha’mba mambo aambiwapo mu Mateo 18:15-17 avwangamo mali nangwa bipe, nabiji kukankalwa kubwezha nkongole nangwa kuba bujimbijimbi. Ano mambo akonsha kwikala luntepentepe lwakonsha kutamisha jizhina ja muntu.

¹⁶ Umvwe mwashiinwa’mba mukwenu mu kipwilo wimulenga mambo akatampe, kange mupelawizhe kuya ku bakulumpe mu kipwilo kuba’mba bemukwashe ne. Byonka byakambizhe Yesu, patanshi isambai na muntu wimulenga mambo. Esekeshai kupwisha oo mambo anweba bene bubiji bwenu kwa kubula kwitako muntu mukwabo. Vulukai’mba Yesu kechi waambiletu’mba ‘yanga umubuuletu jimo mambo anji’ ne. Onkao mambo, inge muntu wakana kuswa mambo o alenga ne kukana kulomba lulekelo lwa mambo, kyakonsha kuwama kumusolomoka jikwabo. Umvwe mwapwisha lukatazho mu jino jishinda, muntu walengele mambo ukasanta bingi kuba’mba kechi mwabuujileko bantu bakwabo mambo o alengele nangwa kumutamishisha jizhina janji mu kipwilo ne. Inge mwauba bino, ko kuba’mba ‘mwamubwezha mulongo wenu.’

¹⁷ Umvwe muntu walengele mambo waswa mambo, walomba lulekelo lwa mambo ne kwingijilapo pa kupwisha oo mambo, kechi pafwainwa kwikala kabiji kutwala mambo kukwabo ne. Nangwa kya kuba ano mambo abaya, bene belengele mambo bakonsha kwiapwisha.

¹⁸ Umvwe mwakankalwa kubwezha mulongo wenu kupichila mu ‘kumubuula mambo o emulenga,’ mwakonsha kuba byonka byaambile Yesu amba, “wafwainwa kusendapo muntu umo nangwa babiji,” ne kwisamba na mulongo wenu jibiji. Aba bo mubena kuya nabo bafwainwa kwikala na mulanguluko wa kwimupwanya. Kyakonsha kuwama kusenda bakamonyi bayuka oo mambo. Inge kafwapo bajingapo kimye kyamwekele oo mambo, mwakonsha kuya na muntu umo nangwa babiji ba kwikala bakamonyi pa yewo mwisambo. Bakonsha kuyuka bulongo oo mambo o mubena kukeba kupwisha ne kumona kana kintu kyaubiwe kyatamishetu nangwa ne. Bakulumpe mu kipwilo bo baita kwikala bakamonyi pa ano mambo kechi bemenako kipwilo ne, mambo jibumba ja bakulumpe kechi jo jibatongola’mba bekale bakamonyi ne.

¹⁹ Inge mwakankalwa kupwisha lolo lukatazho nangwa kya kuba mwisambile nanji bubiji bwenu, kabiji mwayileko ne na muntu umo nangwa babiji kabiji mwalanguluka’mba kechi mwakonsha kulubakotu ne, mwafwainwa kubuula bakulumpe mu kipwilo. Vulukai’mba abo bakeba kulama mutende ne butooto bwa kipwilo. Byo mwaloba ku bakulumpe mu kipwilo, mwafwainwa kwibalekela ano mambo ne kuketekela mwi Yehoba. Kechi mwafwainwa kuleka byubilo bya muntu kwimutuntwisha nangwa kwimupwishisha lusekelo mu mwingilo wa Yehoba ne.—Sala. 119:165.

²⁰ Bakafunga ba jitanga bakakebakeba bishinka pa oo mambo. Inge kyatanwa’mba awo muntu wimulengele mambo akatampe kabiji kechi ukeba kulapila ne kwingijilapo pa bintu byo aubile ne, kavoto ka bakulumpe mu kipwilo kufumya uno ndengamambo mu kipwilo. Onkao mambo, bazhikijila jitanga ne kulengela kipwilo kwikala kyatooka.—Mat. 18:17.

BYA KUBA NA MAMBO AKATAMPE

²¹ Mambo akatampe amo nabiji a bulalelale, bukende, kwilaala kwa banabalume nangwa banabakazhi bonka bonka, mwenga, bunsatuki, kupopwela bankishi ne mambotu akwabo akatampe, kechi akebewa kulomba lulekelo lwa mambo ku muntu ye balenga mambo ne. (1 Ko. 6:9, 10; Nga. 5:19-21) Mambo a uno mutundu akonsha kulengela mu kipwilo kwikala byubilo byatama ne konauna mutende ujimo. Onkao mambo, mambo akatampe a uno mutundu bafwainwa kwiatwala ku bakulumpe mu kipwilo kuba’mba bengijilepo. (1 Ko. 5:6; Yako. 5:14, 15) Bantu bamo bakonsha kuya ku bakulumpe na kusolola mambo o balenga nangwa alenga bakwabo. (Levi 5:1; Yako. 5:16) Inge bakulumpe baumvwa’mba Kamonyi wabatizhiwa walenga mambo, patanshi bakulumpe babiji baya na kukebakeba bishinka. Umvwe bataana bishinka bibena kumwesha’mba kine walenga mambo akatampe, jibumba ja bakulumpe jikasala kavoto ka bakulumpe basatu nangwa kukilapo kuchiba ano mambo.

²² Bakulumpe mu kipwilo basopa bulongo jitanga ne kukebesha kwijizhikijila ku bintu byonse byakonsha konauna bulunda bwajo ne Lesa. Kabiji besekesha kwingijisha Mambo a Lesa bulongo kukwasha muntu yense walenga mambo kwikala na bulunda bwawama ne Lesa. (Yuda 21-23) Abino byo bamukambizhe Timoti kwi Paulo. Bamukambizhe’mba: “Nakukambizha ku meso a Lesa ne ku meso a Kilishitu Yesu ukachibila mambo bomi ne bafu, . . . Wibalengulule, wibakajipile ne kwibafunda mu butekanye ne na busendwe bwa kufunjisha.” (2 Timo. 4:1, 2) Kuba bino kwakonsha kusenda kimye kyabaya, pano bino ke lubaji lwa mwingilo wanema wa bakulumpe mu kipwilo. Kipwilo kinemeka bingi mwingilo wabo ne “kwibapa mushingi mukatampe.”—1 Tim. 5:17.

²³ Umvwe muntu bamutaana na mambo, kintu kitanshi bakulumpe mu kipwilo kyo boba, ke kukwasha ndengamambo kwikala na bulunda bwawama ne Lesa. Umvwe walapila kya kine, bakonsha kumukwasha pa kumukajipila ku mbaji nangwa pa meso a bonse bakamonyi bayuka oo mambo. Kino kikamukwasha kumololako ne kulengela bakwabo kufunjilako. (2 Sam. 12:13; 1 Timo. 5:20) Umvwe muntu bamufundako ku kavoto ka bakulumpe mu kipwilo, bamukanya kubapo bintu bimo. Onkao mambo, muntu walenga mambo bakamukwasha kwenda mu “jishinda jaoloka.” (Hebe. 12:13) Mu kuya kwa moba, inge muntu waleka kuba bintu byatama, bintu byo bamukainye bebifumyapo.

KUBIJIKA’MBA MUNTU BAMUFUNDAKO

²⁴ Inge kavoto ka mambo kamona’mba muntu walapila bino mambo o alengele akonsha kuyukanyikwa mu kipwilo nangwa mu kimasamasa nangwa umvwe bakeba’mba kipwilo kijimuke na yewo ndengamambo walapila, babijika kya kubijika kipi pa Kupwila kwa Bwikalo ne Mwingilo. Kyafwainwa kutangwa’mba: “[Jizhina ja muntu] bamufundako.”

INGE BAFUUKULA KUFUMYA MUNTU MU KIPWILO

²⁵ Bimye bimo ndengamambo wakonsha kutwajijila na byubilo byanji byatama kabiji wakankalwa ne kumvwina byo babena kumukwasha. “Mingilo imwesha kulapila” kechi yakonsha kumweka kimye kyo babena kumutotolwesha ne. (Byu. 26:20) Mwakonsha kuba byepi inge wabula kumwesha kulapila ponkapotu? Kyawama kufumya mu kipwilo ndengamambo wabula kulapila ne kumukanya’mba abulenga kupwanañana na bantu ba Yehoba batooka. Byubilo byatama bya ndengamambo bebifumyamo mu kipwilo, pa kuba’mba mubule kwikala byubilo byatama nangwa kuvulañanya mutende mu kipwilo ne kuzhikijila jizhina jawama ja kipwilo. (Mpitu. 21:20, 21; 22:23, 24) Mutumwa Paulo byo ayukile byubilo bya bunya byajinga na muntu umo mu kipwilo kya mu Kolinda, wakambizhe bakulumpe mu kipwilo amba “mwafwainwa kupana muntu wa uno mutundu kwi Satana . . . , pa kuba’mba mupashi [wa kipwilo] akapuluke.” (1 Ko. 5:5, 11-13) Kabiji Paulo waambilepo ne pa bantu bakwabo bo bafumishe mu kipwilo kya mu myaka kitota kitanshi bafumine mu bukine.—1 Timo. 1:20.

²⁶ Umvwe bafuukulapo’mba ndengamambo wabula kulapila bamufumye mu kipwilo, kavoto ka bakulumpe mu kipwilo kafwainwa kumubuula byo kafuukula, kumulumbulwila bulongo kishinka nangwa bishinka bya mu Binembelo byalengela kuba’mba bamufumye mu kipwilo. Pa kubuula ndengamambo byo bafuukulapo, kavoto ka bakulumpe mu kipwilo kakamubuula’mba inge wamona’mba mambo anji kechi beachiba bulongo ne, kabiji ubena kukeba’mba bakeambe jikwabo, wafwainwa kunemba nkalata kulumbulula bulongo ene mambo o abena kukebela’mba bakeambe jikwabo. Bakamupa moba atanu na abiji a kuba kino kufuma pa juba jo bamubuujile byafuukwile kavoto. Umvwe wanemba nkalata ya kukeba’mba mambo anji bakeambe jikwabo, jibumba ja bakulumpe jafwainwa kubuula kalama wa mwanzo, ne aye ukasala bakulumpe mu kipwilo bafikilamo ba kwikala mu kavoto ka kwamba mambo jikwabo. Bakengila papelela bulume bwabo kuteleka ku ano mambo mu mulungu umo kufuma po batambwijile nkalata ya kukeba kwamba mambo jikwabo. Umvwe kukekala kwamba mambo jikwabo, kechi bafwainwa kubijika’mba bamufumya mu kipwilo. Pa kyokyo kimye, muntu ye babena kutotolwesha kechi wafwainwa kukumbulapo, kulomba pa kupwila ne kwingilako mingilo ikwabo ne.

²⁷ Umvwe muntu ukeba’mba mambo anji bakeambe jikwabo bamuswisha, kimwesha’mba bamutemwa, kabiji kilengela’mba ambe biji ku muchima wanji. Inge muntu walenga mambo wabula kwiya ku mambo saka bamwita bimye byavula, bafwainwa kubijika’mba bamufumya mu kipwilo.

²⁸ Inge muntu walenga mambo kechi ukeba’mba mambo anji bakeambe jikwabo ne, kavoto ka bakulumpe mu kipwilo kafwainwa kumulumbulwila ene mambo o kyawamina kulapila ne byo afwainwa kuba pa kuba’mba akabwele mu kipwilo. Kino kikamukwasha ne kuketekela’mba ukapimpula byubilo byanji byatama kabiji pa kupitapo kimye ukabwela mu jibumba ja Yehoba.—2 Ko. 2:6, 7.

KUBIJIKA MUNTU AMBA BAMUFUMYA MU KIPWILO

²⁹ Inge bafuukulapo kufumya muntu mu kipwilo walenga mambo wabula kulapila, babijika kya kubijika kipi kya kuba’mba: “[Jizhina ja muntu] kechi ke Kamonyi wa kwa Yehoba ne.” Kino kikalengela balongo ne banyenga kuleka kupwanañana na yewo muntu.—1 Ko. 5:11.

MUNTU WALEKATU MWINE KWIKALA KAMONYI

³⁰ Kyambo kya kuba’mba “walekatu mwine kwikala Kamonyi” kingila ku byubilo byauba Kamonyi wabatizhiwa wasankilapo bwina Kilishitu bwanji kupichila mu kwamba mwine amba amiwa luno kechi ne Kamonyi wa kwa Yehoba ne. Nangwa na mambo a byubilo byanji wakonsha kumwesha’mba waleka mwine kwikala Kamonyi wa kwa Yehoba, nabiji kwingila mingilo ku kipamo kyuba bintu byapusana na bifunjisha Baibolo. Inge muntu wauba bino, ko kuba’mba bamuchibila mambo kwi Yehoba Lesa.—Isa. 2:4; Lum. 19:17-21.

³¹ Mutumwa Yoano wanembele pa boba basankijilepo lwitabilo lwa bena Kilishitu amba: “Bano bantu bafumine mwi atweba, bino kechi bajinga betu ne; mambo umvwe bajinga betu inge batwajijila kwikala ne atweba.”—1 Yoa. 2:19.

³² Inge muntu walekatu mwine kwikala Kamonyi, Yehoba umumona’mba watama kukila ne mwina Kilishitu wakooka mu lwitabilo, ubula kuya mu mwingilo wa kusapwila. Muntu wakonsha kukooka mu lwitabilo na mambo a kukankalwa kutanganga Mambo a Lesa kimye kyonse. Kampe na mambo a kupita mu makatazho nangwa lumanamo, mukoyo wanji wa kwingijila Yehoba wakonsha kupwa. Bakulumpe mu kipwilo ne bakwabotu mu kipwilo batwajijila na kukwasha uno mwina Kilishitu wakooka mu lwitabilo.—Loma 15:1; 1 Tesa. 5:14; Hebe. 12:12.

³³ Inge mwina Kilishitu wasalapo kuleka mwine kwikala Kamonyi, pekala kya kubijika kipi kya kubuula kipwilo, kya kuba’mba: “[Jizhina ja muntu] kechi ke Kamonyi wa kwa Yehoba ne.” Muntu wa uno mutundu bamumonatu byonka byo bamona muntu ye bafumya mu kipwilo.

KUBWEZHA MUNTU MU KIPWILO

³⁴ Muntu ye bapangile nangwa walekeletu mwine kwikala Kamonyi wa kwa Yehoba bakonsha kumubwezha mu kipwilo inge walapila kya kine. Bakonshatu kumubwezha inge wamwesha pa moba avula amba waleka byubilo byanji byatama kabiji ubena kukebesha kwikala na bulunda bwawama ne Yehoba. Bakulumpe mu kipwilo bamona’mba papita kimye kyabaya, bañondo bavula, mwaka nangwa kukilapotu kwesakana na mambo o alengele pa kuba’mba amweshe’mba walapila kya kine. Inge muntu ye bapanga wanembela jibumba ja bakulumpe nkalata ya kukeba kumubwezha, kavoto ka kubwezha muntu mu kipwilo kakesamba nanji. Kavoto kakamona inge ubena kumwesha “mingilo imwesha kulapila” ne kwisambapo inge kafwainwa kumubwezha pa kyokyo kimye nangwa ne.—Byu. 26:20.

³⁵ Inge muntu ye bapangile ku kipwilo kingi ubena kukeba kubwela, kavoto ka kubwezha muntu mu kipwilo mo aji kakasambakana nanji ne kwisambapo. Inge baji mu kavoto ka kumubwezha mu kipwilo bafuukulapo amba bamubwezhe mu kipwilo, bafwainwa kunembela jibumba ja bakulumpe mu kipwilo kya muchibijile mambo. Kavoto kamuchibijile mambo ne kavoto ka kumubwezha, tuvoto tonse bubiji twafwainwa kuyuka bishinka byonse pa kuba’mba tufuukulepo bulongo. Nangwa byonkabyo, kavoto kamuchibijile mambo ko kafwainwa kufuukulapo kuba’mba bamubwezhe.

KUBIJIKA’MBA MUNTU BAMUBWEZHA

³⁶ Inge kavoto ka kubwezha muntu mu kipwilo kashiinwa’mba muntu ye bapangile nangwa walekele mwine kwikala Kamonyi wa kwa Yehoba walapila kya kine, kabiji bafwainwa kumubwezha, bakabijika mu kipwilo muji kavoto ka mupaingile. Umvwe uno muntu wavilukila ku kipwilo kikwabo, nako bakabijika. Bafwainwa kwambatu’mba: “[Jizhina ja muntu] bamubwezha kwikala Kamonyi wa kwa Yehoba.”

MAMBO ALENGA BAANA BA BACHECHE BABATIZHIWA

³⁷ Mambo akatampe alenga baana ba bacheche babatizhiwa bafwainwa kwiatwala ku bakulumpe mu kipwilo. Inge bakulumpe babena kutotolwesha mwana mucheche walenga mambo, kyakonsha kuwama bansemi babatizhiwa ba uno mwana nabo kwikalapo. Bafwainwa kukwatankena pamo na kavoto ka bakulumpe mu kipwilo, kechi bafwainwa kulengela uno mwana walenga mambo kubula kumololako ne. Byonkatu byo kikala pa kutotolwesha bakulumpe balenga mambo, kavoto ka bakulumpe mu kipwilo kafundako mwana mucheche walenga mambo ne kumukwasha kuwamisha bulunda bwanji ne Lesa. Nangwa byonkabyo, umvwe mwana mucheche wabula kulapila, bafwainwa kumufumya mu kipwilo.

UMVWE BASAPWISHI BABULA KUBATIZHIWA BALENGA MAMBO

³⁸ Mwakonsha kuba byepi inge basapwishi babula kubatizhiwa balenga mambo akatampe? Kechi mwafwainwa kwibafumya mu kipwilo ne, mambo abo kechi Bakamonyi babatizhiwa ne. Nangwa byonkabyo, kechi bayuka mafunde a mu Baibolo ne. Onkao mambo, mwafwainwa kwibafundako mu butemwe pa kuba’mba bawamishe “jishinda jaoloka” ja kwendamo.—Hebe. 12:13.

³⁹ Inge musapwishi wabula kubatizhiwa walenga mambo kabiji bakulumpe babiji besamba nanji, baeseka kumukwasha bino wabula kulapila, bafwainwa kubuula kipwilo. Kwikala kya kubijika kipi kya kuba’mba: “[Jizhina ja muntu] kechi musapwishi wabula kubatizhiwa ne.” Kipwilo kikamonanga uno walenga mambo byonka byo kimona muntu wa ku kyalo. Nangwa kya kuba uno muntu walenga mambo kechi bamufumya mu kipwilo ne, bena Kilishitu bafwainwa kujimuka pa kupwanañana nanji. (1 Ko. 15:33) Kechi mwafwainwa kutambulanga masawakya anji a mu bujimi ne.

⁴⁰ Mu kuya kwa kimye, muntu wabula kubatizhiwa ye bafumishe pa busapwishi wakonsha kukeba kwikala musapwishi jikwabo. Inge kyaikala bino, bakulumpe mu kipwilo babiji bakesamba nanji pa kuba’mba bayuke inge wawamisha bulunda bwanji ne Lesa nangwa ne. Umvwe wafikilamo, bakabijika kya kubijika kipi kya kuba’mba: “[Jizhina ja muntu] pano waikala jikwabo ke musapwishi wabula kubatizhiwa.”

YEHOBA UPESHA MPOPWELO YA MUTENDE KABIJI YATOKA

⁴¹ Bonse bapwanañena pamo na kipwilo kya Lesa lelo jino bafwainwa kusekela mu bintu byawama Yehoba byo abena kupa bantu banji. Kwambatu kine, tuji na kajo ka ku mupashi kavula bingi ne mema a bukine ekizha kyefu. Kabiji Yehoba wituzhikijila kupichila mu jibumba janji jo batangijila kwi Kilishitu. (Sala. 23; Isa. 32:1, 2) Kwikala mu paladisa wa ku mupashi mu ano moba a kupelako akatazha kwitulengela kuyuka’mba twazhikijilwa.

⁴² Kwikala mu mutende mu kipwilo ne kwikilengela kwikala kyatooka kwitukwasha kutwajijila kusamisha kyeya kya bukine bwa Bufumu. (Mat. 5:16; Yako. 3:18) Na bukwasho bwa Lesa, bantu bavula bakamuyuka Yehoba ne kwingijila pamo ne atweba kuba kyaswa muchima wanji. Kino kiketuletela bingi lusekelo.