Kitango 47

Byo Twakonsha Kuyuka Amba Amagedonyi Ijitu Pepi

KIYUKILO wikiyuka, ke ibyo nenyi?— Mu Kitango 46 twamwene kiyukilo Lesa kyo apaine kya kumwesha’mba kechi ukonauna jibiji ntanda na muyulo ne. Kabiji batumwa baipwizhe kiyukilo kya kuyukilako amba Yesu wabwela kabiji ne kuyuka umvwe mpelo iji pepi.—Mateo 24:3.

Yesu byo ayile mwiulu kechi wakonsheshe kumweka ne, onkao mambo bantu bakebelenga bingi kiyukilo kya kuba saka bekimona kya kumwesha amba Yesu watendeka kulama. Yesu wabujile baana banji ba bwanga bintu bikamwekanyikanga panopantanda. Umvwe bino byatendeka kumweka, po po kyakonsheshe kuyukanyikwa’mba wabwela kabiji ke Mfumu ubena kulama mwiulu.

Byo afunjishenga baana banji ba bwanga kwikala saka babena kulaba, Yesu waambile’mba: “Aki talai ku mukuyu, ne ku bichi byonse; byo bisapuka, anweba mwibimona ne kuyuka anwe bene amba pano mayoo ke aji pepi.” Umvwe mayoo ke aji pepi uyuka’mba pano ke mayoo. Kabiji wakonsha kuyuka umvwe Amagedonyi iji pepi kupichila mu kumona bintu bibena kubiwa byaambilepo Yesu.—Luka 21:29, 30.

Pa ino peja ne yalondelapo, paji bipikichala bibena kumwesha bintu byaambilepo Yesu amba byo bikekala kiyukilo kya kumwesha’mba Bufumu bwa Lesa bujitu pepi. Umvwe bino bintu byonse byamwekanyika, Bufumu bwa Lesa bubena kulamwa na Kilishitu bukalalaula makafulumende onse a bantu, kwesakana na byo twatangile mu Kitango 46.

Akitajisha bulongo pa bipikichala biji pa mapeja afumako, tubena kukeba twisambepo pa bino. Byambo byanembwa pa Mateo 24:6-14 ne Luka 21:9-11, byo byo ubena kumona pa bibye bipikichala. Kabiji abye bipikichala biji ne na manambala. Ano manambala o aji ne ku mapalagalafu aamba pa bino bipikichala. Pano akitwaya tumone mbaji ya kino kiyukilo kyaambile Yesu kana ibena kufikizhiwa nyi nangwa ne.

(1) Yesu waambile’mba: ‘Mukomvwa makondo ne nkuwa ya makondo, . . . mukoka ukemena mukoka mukwabo, ne bufumu bukemena bufumu bukwabo.’ Nanchi wakyumvwapo kala bantu saka bamba pa nkondo nyi?— Kwajinga nkondo itanshi ya ntanda yonse mu 1914 kufika mu 1918, kabiji nkondo ya kibiji ya ntanda yonse yajingako mu 1939 kufika mu 1945. Kala kechi kwajingapo makondo a ntanda yonse ne. Ano moba makondo ajitu ntanda yonse. Pa juba pa juba tumvwa masawakya a makondo pa TV, pa Waileshi ne kwiatangatu mu mapepala a byambo.

(2) Kabiji Yesu waambile’mba: ‘Kukekala bipowe bya nzala . . . kuku ne kuku.’ Wayukishatu bulongo amba bantu bavula kechi baji na kajo ne. Pa juba pa juba bantu bakukankalwa kubala bafwa na mambo a kukepelwa kwa kajo.

(3) Yesu wanungilepo amba: ‘Kuntu kwavula kukekala . . . myalo.’ Nanchi mwalo wamuyuka nyi?— Ke kikola kipaya bantu bavula bingi. Mwalo umo utelwa’mba kipwizhipwizhi waipayile bantu pepi na 20 milyonyi mu mwakatu umo. Mu ano moba etu bantu kukila pa 20 milyonyi kampepo bakafwa na muzenzempuya. Kabiji pa mwaka pa mwaka bipwalonda, kikola kya muchima, ne bikolatu bikwabo bipaya bantu bavula bingi.

(4) Yesu watongwelepo ne kintu kikwabo amba: ‘Kukekala . . . bitentanshi ne kuku ne kuku.’ Kitentanshi wikiyuka nyi?— Kitentanshi kisunkenya mushiji. Kikundula mazubo, kabiji kipaya ne bantu. Kufumatu mu ma 1914, pa mwaka pa mwaka kwikala bitentanshi byavula bingi. Wa kyumvwapo kala bantu saka bamba pa bitentanshi nyi?—

(5) Yesu waambile’mba lubaji lukwabo lwa kino kiyukilo ke ‘kuvula kwa bubi.’ Kyo kine kintu bwivi ne bukapondo kyo byavujila bibye. Bantu mu mapunzha onsetu baji bingi na moyo amba kwendapo bangivi basaba nzubo yabo ne kwibebila. Ano moba bubi ne bukapondo byavulamo bingi kukila ne byo kyajinga kala.

(6) Yesu waambile pa lubaji lwanema bingi lwa kino kiyukilo amba: ‘Ano mambo awama a bufumu akasapwilwa panopantanda ponse mwa kwibashimwina ba mu mikoka yonse ya bantu; bino ke ku mpelo.’ (Mateo 24:14) Umvwe wanemeka “ano mambo awama,” wafwainwa kubulangako ne bakwenu. Umvwe ke ube bino ko kuba’mba ubena kuba byonka byaamba kinembelo.

Bantu bamo bakonsha kwamba’mba bintu byaambanga Yesu byubiwatu jonse. Pano bino, abino bintu byonse bikyangye kubiwapo mu mapunzha avula ne. Pano wikiyuka kino kiyukilo nyi?— Umvwe twamona bintu byonse byo twisambapo saka byubiwa, twafwainwa kuyuka’mba ino ntanda bukumotu ikapingizhiwepo na ntanda ipya ya Lesa.

Yesu byo aambilenga pa kiyukilo, waambile ne pa kimye kimo kya mu mwaka. Waambile’mba: “Lombai amba, po tukanyema kechi pakekale mu bañondo ba mashika ne.” (Mateo 24:20) Nga bino byambo wibitazhizhe mwepi?—

Umvwe muntu ubena kunyema kizumba mu kimye kya mashika, ki ka kyubiwa?— Kikatazha bingi pa kuba’mba obe bino. Kyakonsha kutama bingi umvwe muntu wafwa na mashika mambo a kuba’mba kimye kwabula mashika wapayankenetu na kuba bintu bikwabo, ke ibyo nenyi?—

Nanchi wayuka kishinka Yesu kyo aambilengapo byo aambile amba kechi kyawama kunyema mu kimye kya mashika nenyi?— Witubujilenga’mba byo twayuka’mba Amagedonyi ijitu pepi, kechi twafwainwa kukankazhamanga mu kwingijila Lesa ne. Umvwe ketukankazhame, kechi tukekala na kimye kya kwingijila Yehoba ne. Twakonsha kwikalatu byonka byajinga boba mu kimye kya Muyulo mukatampe baumvwine byaambilenga Nowa pano bino kechi batwelele mu bwato ne.

Pano akitwaya twisambe pa byo kikekala umvwe nkondo ya Amagedonyi yapwa. Tusa kukafunda pa bintu Lesa byo akobila aba bamutemwa kabiji babena kumwingijila.

Abye binembelo nabyo bimwesha’mba Amagedonyi ijitu pepi: 2 Timoti 3:1-5 ne 2 Petelo 3:3, 4.

[Bipikichala pa jipa 244-246]

Lufunjisho ka Yesu lo afunjishenga byo aambile pa kichi kya mukuyu?

[Kipikichala pa jipa 249]

Yesu byo aambile pa kunyema kimye kya mashika, ñanyi lufunjisho lo afunjishenga?