‘Kulaba ne Kukenkenta’ Mambo ka o Kwanemena?

“KIYUKILO kya kwikalapo kwenu ne kya mpelo ya buno bwikalo kyo kyepi?” (Mat. 24:3) Pa kukumbula buno bwipuzho, Yesu wabujile baana banji ba bwanga kiyukilo kyapelele kumvwa kabiji kyo bayukile kyanembwa mu Mateo kitango 24, Mako kitango 13, ne mu Luka kitango 21. Kabiji wanungilepo’mba: “Labainga ne kukenkenta.”—Mat. 24:42.

Inge kya kuba kino kiyukilo kyapelele kuyuka, mambo ka o anungijilepo bino byambo? Twayai twisambe pa bishinka bibiji. Kishinka kitanshi, bintu bilabikañana byakonsheshe kulengela bamo kulengulula kino kiyukilo ne kwibalengela kubwela panyuma ku mupashi ne kubula kulaba ne kukenkenta. Kya bubiji, mwina Kilishitu wakonsha kuyuka mbaji imo ya kiyukilo, pano bino wakonsha kulengulula na mambo a kuba’mba kechi kya mukunzhishatu ne. Kabiji wakonsha ne kulanguluka’mba “malwa akatampe” aambiwapo mu bungauzhi bwa kwa Yesu akiji kwalepa kabiji kino kyakonsha kumulengela kubula ‘kulaba ne kukenketa.’—Mat. 24:21.

“Kechi Bateleko Muchima Ne”

Yesu wavulwileko baana banji ba bwanga pa bantu ba mu moba a Nowa. Bantu bayukishetu bulongo mwingilo wa kusapwila waingijilenga Nowa, byo ashimikilenga bwato bukatampe ne bumbanzhi bwaubiwenga. Pano bino bavula “kechi bateleko muchima ne.” (Mat. 24:37-39) Uno muchima wamilengulwila ye ujipo ne na bamo lelo jino. Kyakumwenako, bavula lelo jino balengulula bingi biyukilo bikanya kwendesha myotoka masekenyi. Ba mu kafulumende baeseka kukimbakanya milaala mu mikwakwa ya mu ngyangi pa kuba’mba bantu bendesha myotoka bakepeshengako kunyemesha myotoka. Popamotu, bena Kilishitu bakonsha kuyuka kiyukilo kya moba akupelako pano bino bakonsha kubula kutako muchima kuyuka mo kyatala. Kino kyo kyamwekejilepo wakyanyike, aye Arielle wa mu kyalo kyaikela ku muzhika wa Africa.

Arielle watemenwe bingi kutamba mpila ya banabakazhi pa malangalanga. Byo kwajinga lunengezho pa sukulu lwa kuya na kupama mpila, kutemwisha mpila kwamulengejile kwibika mu kizumba ku mupashi. Waswile kwikala wa kukwata mu kipanda. Ki ka kyafuminemo? Walondolola’mba: “Bakwetu bamo bajinga na bakambwe baingijishanga bizhima ne kupepa fwanka. Bansekanga mambo kechi najinga na mukambwe ne, pano bino kechi nalondejile byubilo byabo ne. Monka mu kuya kwa moba mpila yatendekele kumbwezha panyuma ku mupashi. Kechi nalaalanga pa mpila ne. Inge twaya na kupwila ku Nzubo ya Bufumu kechi natelekanga byaambiwanga ne, mambo maana onse aikalangatu ku mpila. Byubilo bya bwina Kilishitu byatendekele kukepa. Natendekele kwikala na muchima wa kukebatu kukyombesha bakwetu. Pa kuba’mba tukyombeshenga bakwetu natendekele kwingila na ngovu mu kino kisela. Naikalanga na bijikila byavula, kabiji nalekele ne kukaya na bakwetu na mambotu a mpila.

“Bintu byayishiletu kwaluka kimye bo twapaminenga nabo kyo bebaswishishe kupanta mpila kya kushishika pa kipanda. Byo nenengezhenga namba nkwate, kwakubula kulangulukapo nalombele kwi Yehoba namba ankwashe neibake. Kino kyandengejile kuyuka’mba bulunda bwami ne Lesa bwabwela bingi panyuma. Pano ne bukoseshe byepi?

“Natambile DVD wa kuba’mba Young People Ask—What Will I Do With My Life?a Nafuukwilepo kwiitamba jikwabo mu meso anteka. Panyuma ya kwiitamba, ne amiwa nataine kuba’mba najinga na lukatazho lwajingapo ne André, nsongwalume uji mu ino DVD. Kinembelo André kyo bamwambijile kutanga kya Filipai 3:8 ne amiwa kyankwashishe bingi. Byo nekitangile nafuukwilepo kuleka kupama mpila.

“Kuba bino kwankwashishe bingi. Nalekele kwikala na muchima wa lubekyo kabiji ne bijikila byapwile. Natendekele kwikala na lusekelo ne kutemwa balunda nami bena Kilishitu. Nanemekele jibiji bintu bya ku mupashi. Natele muchima ku kupwila jikwabo. Kabiji natendekele kwingila bulongo mwingilo wa kusapwila. Luno ñingilako bupainiya bwa kukwasha.”

Inge bya kutabataba bibena kwimulengela kubula kuta muchima ku kiyukilo kyaambile Yesu, mwafwainwa kuba byaubile Arielle. Mwakonsha kulondela ano mashinda. Monai Watch Tower Publications Index, ye batela ne kuba’mba, mapu itangijila ku bya buneme. Mu ino nteeta mwakonsha kutanamo lujimuno ne mashimikila a bamo bakitalañanapo kala na meseko. Mwenaingamo mu kupwila kwa bwina Kilishitu kupichila mu kunengezha bulongo ne kunemba bishinka. Bakwabo nabo kibakwasha ke kutala ñambi ne kwikela ku bipona bya kulutwe. Umvwe kuji jashi ja mepuzho, monai amba mwakumbulapo bukiji. Kabiji ikalai balaba ku mupashi kupichila mukulanguluka pa bibena kumweka byo bibena kufikizha mbaji ya kiyukilo ne bintutu bikwabo bimwesha’mba tuji mu ‘moba apelako.’—2 Timo. 3:1-5; 2 Pe. 3:3, 4; Lum. 6:1-8.

“Inengezhezhai Jimo”

Kiyukilo kya moba apelako kibena kumweka ku ba “pano pa ntanda ponse.” (Mat. 24:7, 14) Bantu bavula babena kwikala mu mapunzha muji myalo, bipowe bya nzala, mumweka bitentanshi ne bintutu bikwabo byaambijilwe jimo. Pa kuba mu mapunzha amo baikalako mutende. Inge mukyangye kupitapo mu bya malwa bifikizha mbaji ya kino kiyukilo, nanchi mwafwainwa kumonanga’mba malwa akatampe akiji kwalepa nyi? Buno bwakonsha kwikala bumbulwa maana.

Akilangulukai pa byaambile Yesu kuba’mba kukekala ‘myalo ne bipowe bya nzala.’ (Luka 21:11) Kitanshi, kechi waambile’mba bikamwekanga pa kimye kimo ntanda yonse ne. Waambile’mba bikobiwanga “kuku ne kuku.” Onkao mambo kechi twafwainwa kuketekela bino bintu kubiwa pa kimye kimo mu mapunzha onse ne. Kya bubiji, panyuma ya kwamba pa bipowe bya nzala, waambile kuba’mba baana banji ba bwanga bamo bafwainwe ‘kujimuka kuchina amba bakatesha michima yabo ku bya kujajaja.’ (Luka 21:34) Onkao mambo, bena Kilishitu kechi bonse bakamona mbaji yonse ya kino kiyukilo ne. Yesu kyokyo aambijile’mba: “Umvwe mwamona bino bintu na kumweka, yukai amba Bufumu bwa Lesa buji pepi.” (Luka 21:31) Mashinda a kumvwañenamo abena kwitulengela kumona mbaji ya kino kiyukilo, nangwa kya kuba kechi twikala mu mapunzha mwamweka bino bintu ne.

Kabiji vulukai ne kuba’mba Yehoba wanengezhezha jimo “juba ne kimye” kikafika malwa akatampe. (Mat. 24:36) Bintu bibena kumweka mwaya ntanda kechi bikapimpula pa kafikila jino juba ne.

Yesu wajimwineko bena Kilishitu bonse mwaya ntanda amba: “Inengezhezhai jimo.” (Mat. 24:44) Twafwainwa kwinengezha kimye kyonse. Pano, kechi kibena kulumbulula’mba twafwainwa kuzhikishangatu juba jonse mu mingilo ya Lesa ne. Kabiji kafwako wayuka byo akobanga kimye kikafika malwa akatampe ne. Bamo kampe bakengilanga mu majimi abo, bakwabo kampe bakengilanga mingilo ya pa nzubo. (Mat. 24:40, 41) Byo kiji bino, pano nanchi muntu wakonsha kwinengezhezha byepi jimo?

Ba Emmanuel ne bakazhi babo ba Victorine baji na baana babakazhi batanu na umo bekala mu kyalo kya mu Africa kechi bakimonapo kala lubaji lwa kino kiyukilo ne. Bafuukulapo kwisamba pa bintu bya ku mupashi bya kwibakwasha kwikala benengezha pa juba pa juba. Ba Emmanuel baambile’mba: “Kumona kimye kya kwisamba kwakatazhanga bingi. Twafuukwilepo kwisambanga lukelokelo. Panyuma ya kwisamba kinembelo kya juba, tunengezhako mafuka acheche a mu lufunjisho lwa kipwilo lwa mu yewo mulungu.” Nanchi kuba bino kwibakwasha kwikala balaba nyi? Kwibakwasha bingi! Ba Emmanuel bakulumpe bakwatankanya jibumba ja bakulumpe mu kipwilo. Ba Victorine bengilako bupainiya bwa kukwasha kabiji bakwasha bavula kufunda bukine. Baana babo babakazhi nabo babena kununguluka bingi ku mupashi.

Yesu witujimwineko’mba: “Jimukai, mukenkentenga.” (Mako 13:33) Kange muleke bya kutabataba bimulengele kubula kulaba ku mupashi ne. Umvwinainga lujimuno lwawama luji mu mabuku etu ne lo tutambwila pa kupwila byonka byaubile Arielle. Byonka byuba kisemi kya ba Emmanuel, ubaingapo bintu bimo pa juba pa juba bya kwimulengela kwikala benengezha kabiji ne ‘kulaba ne kukenkenta.’

[Tubyambo twa mushi]

[Cifwanikiso pa peja 4]

Kwisamba bintu bya ku mupashi pa juba pa juba kwakwashishe ba Emmanuel ne kisemi kyabo “kwinengezhezha jimo”