‘Ikalai ba Kutengelela Jimo’
1 Mu bungauzhi bwanji bukatampe bwaambilenga pa kupwa kwa buno bwikalo, Yesu wajimwine bantu kubula kulabama na bintu byatutu bya mu bwikalo. (Mat. 24:36-39; Luka 21:34, 35) Byo kiji kuba’mba malwa akatampe akonsha kufika kimye kiji kyonse, kyanema bingi kumvwina lujimuno lwa kwa Yesu lwa kuba’mba: ‘Ikalai ba kutengelela jimo: mambo Mwana muntu ukeya mu kimye kyo mwabula kuketekela.’ (Mat. 24:44) Ki ka kyakonsha kwitukwasha kuba kino?
2 Kupwisha bya Kutabataba ne Bintu Bilabikañana: Kitewa kimo kya ku mupashi kyo twafwainwa kujimukako ke bya ‘kutabataba bya buno bumi.’ (Luka 21:34) Mu byalo bimo, buyanji, kubulwa nkito, ne kubaya kwa mutengo wa bintu kulengela bantu kubula kwikala na bintu bikebewa mu bwikalo. Mu byalo bikwabo, kyapela bingi kwikala na bintu bya ku mubiji. Umvwe twatendeka kukebesha kwikala na bintu bya ku mubiji, twakonsha kukankalwa kuta muchima ku bintu bya Bufumu. (Mat. 6:19-24, 31-33) Kupwila kwa bwina Kilishitu kwitukwasha kuta muchima ku bintu bya ku mupashi. Abya mwibikila kikonkwanyi kya kutanwanga ku kupwila konse nyi?—Hebe. 10:24, 25.
3 Ano moba ino ntanda yayula na bintu bilabikañana byakonsha kwitonawina kimye kyetu kyanema. Kompyuta yakonsha kwitonawina kimye umvwe kya kuba ketutaye kimye kyabaya monka twazhikawila Intaneti, kutanga mabuku ne kutumatuma makalata pa kompyuta, ne kukaya makayo apa kompyuta. Twakonsha kuba ketonawine kimye kyabaya na kutamba televizhonyi, mafilimu, makayo, kutanga mabuku a ino ntanda, ne bya kisangajimbwe, ketushaletu na kimye kicheche, nangwa bulume bucheche bwa kubilamo bya ku mupashi. Nangwa kya kuba makayo ne kukokoloka byakonsha kwitukokoloshako kimye kicheche, bino lufunjisho lwa pa bunke ne lufunjisho lwa Baibolo lwa kisemi muji mfweto ya bumi bwa myaka ne myaka. (1 Timo. 4:7, 8) Abya mwikalako na kimye kya kulanguluka pa Byambo bya Lesa pa juba pa juba nyi?—Efi. 5:15-17.
4 Tusanchila bingi jibumba ja Yehoba pa kwitunengezhezha lufunjisho lwa ku mupashi lwa kwitukwasha kuba’mba ‘tukakonshe kupuluka ku byobya byonse bikafika, ne kwimana ku meso a Mwana muntu’! (Luka 21:36) Twayai twingijishenga bino bintu bya ku mupashi ne ‘kwikala ba kutengelela jimo’ kuba’mba kampe lwitabilo lwetu “lukatanwe ke lwa kutotwa ne lwa buneme byo akamweka Yesu Kilishitu.”—1 Pe. 1:7.