‘Ndondelainga’
1 Bantu bavula bekala bwikalo bwa kukeba kwisekeshatu abo bene, pano bino javula kechi bekala balusekelo ne. Kupusanako, Yesu watongwelepo bwikalo bwa kubula kichima buleta lusekelo lwa kine kine. (Byubilo 20:35) Waambile’mba: “Umvwe muntu usaka kundondela, mulekai ekane mwine . . . andondele.” (Mako 8:34) Kino kilumbulula byavula, kechi kukanatu bya kisangajimbwe pa kimye pa kimye ne. Kechi kilumbulula kwikalatu bwikalo bwa kwitokesha atweba bene ne, bino bwa kutokesha Yehoba pa muchima.—Loma 14:8; 15:3.
2 Akilangulukai pa kya kumwenako kya mutumwa Paulo. Na mambo a ‘kuwama kwine kwa maana a kuyuka Kilishitu Yesu,’ Paulo wasankijilepo byonse bya kukebakeba bya ku mubiji ne kwipana mwine na mukoyo kutwala bintu bya Bufumu palutwe. (Fili. 3:7, 8) Waambile’mba: “Amiwa nkataya byami byonse ne kwitaya ami mwine” na mambo a kupulusha bantu. (2 Ko. 12:15) Atweba bonse twakonsha kuba bulongo kwiipuzha’mba: ‘Mbena kwingijisha byepi kimye kyami, bulume, busendwe ne bintu byonji nabyo? Abya natatu muchima mu kukeba bintu byami amiwa mwine nyi, inyi mbena kukeba kutokesha Yehoba pa muchima?’
3 Mingilo ya Kwingila: Pa mwaka pa mwaka, bantu ba Lesa bengila maawala avula bingi mu mwingilo wa kupulusha bantu wa kusapwila mambo a Bufumu. Mukachi ka kipwilo, bakyanyike ne bakikulumpe bengilako mingilo yapusana pusana ikwasha bantu. Kabiji kuji ne mingilo ikwabo yavula ingijiwa pa kupwila kukatampe ne pa kupwila kwa nkambi kabiji ne ya buntungi ne ya kuwamisha pafwafwafwa kwa bishimikwa bikwasha mpopwelo ya kine kuya palutwe. Kabiji akilangulukai pa bukwasho bwa kwitemenwa bumwesha balongo bengila mu Makometi a Bambañana na ba Mingilo mu Bipatela ne Mabumba a Bapempula Bakolwa mu Bipatela. Ino yonse mingilo ya kwipana yanema bingi mu bwana bwankazhi bwetu bwa bwina Kilishitu!—Sala. 110:3.
4 Mingilo ya kwingilako yakonsha kwishila mu mashinda apusana pusana nabiji umvwe kwamweka kya malwa nangwa bintu bya kupulumukilatu. Javula atweba bene twakonsha kwimwenatu kuba’mba mulongo wetu mwina Kilishitu ubena kukeba bukwasho nangwa lutundaiko. (Mana. 17:17) Umvwe twibikako kwingijila bakwetu ne kutwala peulu bintu bya Bufumu, tubena kulondela kya kumwenako kya kwa Yesu. (Fili. 2:5-8) Twayai twibikeko kuba byonkabyo kwa kubula kuleka.