Yesu, Petelo, Yakoba ne Yoano byo bafumine ku mutumba, bataaine jibumba jikatampe. Kwamwekele kintu kyatama. Banembeshi bazhokolokele baana banji ba bwanga saka bepachika nabo. Jibumba byo jamwene Yesu, jakuminye bingi kabiji jamunyemejile ne kumwimuna. Wibashikishe’mba: “Mubena kwipachika nabo pa ñanyi kintu?”—Mako 9:16.

Kyamweka banembeshi balengulwilenga baana ba bwanga na mambo a kukankalwa kubuka awa kalombwana. Yesu kechi wakumbwile yewa mwanamulume wapelejilwe ne, bino waambijile jibumba’mba: “Anweba kisemi kyabula lwitabilo kabiji kyabula koloka, bimye binga byo nkekala nenu? Bimye binga byo nkemulekelako mambo?” Kyamweka Yesu wakajipijilenga banembeshi bakatezhenga baana banji ba bwanga kimye kyo afuminepo. Kepo aambijile yewa shanji mwana amba: “Muletai kuno.”—Mateo 17:17.