FWENYAI KWIPI NE LESA
“Nanchi Wepi Mukambizho Mutanshi pa Yonse?”
Bi ka bikebwa pa kuba’mba tutokeshe Lesa pa muchima? Abya kuji mizhilo yavula yo twafwainwa kulondela nyi? Mukumbu ke wa kuba’mba, ine. Kwesakana na byaambile mwana Lesa, Yesu Kilishitu, Lesa byo akeba byakonsha kwambiwatu mu kyambo kimo.—Tangai Mako 12:28-31.
Akimonai biji mu byambo bya kwa Yesu. Wafunjishenga baana banji ba bwanga mu nzubo ya Lesa pa Nisanyi 11, saka kwashalatu moba acheche amba afwe. Balwanyi banji bakebelenga kumupa mambo kupichila mu kumwipuzha mepuzho akobankana. Kimye kyonse mikumbu yanji ibazhindamikangapo. Kepo bamwipwizhe buno bwipuzho amba: “Nanchi wepi mukambizho mutanshi pa yonse?”—Kyepelo 28.
Buno bwipuzho bwakatezhe. Bayudea bamo bakebanga kuyuka muzhilo mutanshi nangwa wakilamo kunema pa mizhilo kukila pa 600 yajinga mu Mizhilo ya Mosesa. Bakwabo nabo bamonanga kuba’mba mizhilo yonse yanema kabiji amba kechi kyawama kunemekapo imo kukila ikwabo ne. Pano wakumbwile byepi buno bwipuzho?
Pa kukumbula, Yesu kechi watongwele mukambizho umo ne, bino watongwele mikambizho ibiji. Kitanshitu, waambile’mba: “Wafwainwa kutemwa Yehoba Lesa wobe na muchima wobe yense, na mweo wobe yense, na maana obe onse, ne na bulume bobe bonse.” (Kyepelo 30; Mpitulukilo ya mu mizhilo 6:5) Byambo bya kuba’mba “muchima,” “maana,” “mweo,” ne “bulume” kechi byapusenshatu ne.a Bilumbulula kuba’mba: kutemwa Yehoba kwafwainwa kumvwangamo bumuntu bwetu bonse, ndangulukilo ne bintu byo tuji nabyo. Baibolo umo waamba’mba: “Lesa twafwainwa kumutemwa na muchima wetu yense.” Umvwe twatemwa Lesa, tukebikangako pa juba pa juba kuba bintu kwesakana na byo akeba.—1 Yoano 5:3.
Kya bubiji, Yesu waambile’mba: “Wafwainwa kutemwa mukwenu byonka byo witemwa obe mwine.” (Kyepelo 31; Bena Levi 19:18) Kutemwa Lesa ne kutemwa mukwetu kechi byapusana ne. Kutemwa mukwetu kwiya na mambo a kutemwa Lesa. (1 Yoano 4:20, 21) Inge twatemwa bakwetu byonka byo twitemwa atweba bene, tukebobilanga byonka byo tukeba’mba betubile. (Mateo 7:12) Mu kuba bino, tumwesha’mba twatemwa Lesa walengele atweba ne abo pamo mu kipasha kyanji.—Ntendekelo 1:26.
Mukambizho wa kutemwa Lesa ne bakwetu wanemena ka? Yesu waambile’mba: “Kafwako mukambizho mukwabo wakila ino ne.” (Kyepelo 31) Mu jishimikila jikwabo jipashako Yesu waambile kuba’mba pa ino mikambizho yonse ibiji, po paimena mikambizho.—Mateo 22:40.
Kutokesha Lesa ku muchima kechi kwakatazha ne. Byonse byo akeba’mba tube byakonsha kwambiwatu mu kyambo kimo amba: butemwe. Kino kyokyo akeba kabiji ukatwajijila kwikikeba, mambo po paimena mpopwelo ya kine. Bino butemwe kechi kwambatu pa kanwa ne, bumwekela mu byubilo. (1 Yoano 3:18) Mambo ka a kubujila kufunda kutemwa Yehoba, Lesa ye “butemwe”?—1 Yoano 4:8.
Kutanga Baibolo mu March
[Tubyambo twa mushi]
a Kyambo kya kuba’mba “mweo,” mu Baibolo kilumbulula muntu mwine. Onkao mambo “mweo” wakonsha kuvwangamo “muchima,” “maana” ne “bulume.”
[Mabulañano pa peja 13]
Byonse Yehoba byo akeba’mba bapopweshi banji bobe byakonsha kwambiwatu mu kyambo kimo amba: butemwe