11. Yesu waingijishe byepi kishimpi kya shanji ne mwana kutazha ku lulombelo?

¹¹ Kishimpi kya kwa Yesu kya yewa muntu wasakile na mukoyo kyalumbulula muchima uji na muntu wa lwitabilo ulomba. Kishimpi kikwabo kyalondelapo kyalumbulula muchima uji na yewa umvwa milombelo, aye Yehoba Lesa. Yesu washikishe’mba: “Ñanyi mukwenu uji na mwana, uba, kana mwananji wamulomba shinkwa, wamupa jibwe? nangwa walomba jisabi, wamupa mulolo? Nangwa walomba jike, wamupa kaminye?” Yesu walumbulwile mo kyatala’mba: ‘Kabiji umvwe anweba, byo muji babi, mwayuka kupana byawama ku baana benu, nanchi aye Shenu wa mwiulu kechi emukile kupana mupashi wazhila ku bamulomba nenyi?’—Luka 11:11-13.

12. Kishimpi kya shanji umvwa ku mwananji kilumbulula byepi Yehova byo epana mu kumvwa milombelo yetu yo tulomba?

¹² Mu kino kya kumwenako kya shanji wayuka kupana byawama ku mwananji, Yesu waamba patoka Yehoba byo omvwa pa mambo a milombelo ya bonse bamulomba. (Luka 10:22) Patanshi monai bino bishimpi bibiji byo byapusana. Yehoba kechi uji pamo nobe yewa muntu wa mu kishimpi kitanshi wakankazhamine kukwasha mukwabo ne, aye uji pamo nobe nsemi ubula kukankazhama kumvwa ku mwananji. (Masalamo 50:15) Yesu watwajijila kulumbulula Yehoba byo amwesha muchima wa kwipana kwi atweba byo amwesakanya ku nsemi wa pano panshi. Waamba’mba umvwe nsemi wa pano panshi byo ‘aji mubi’ mambo a kuswana bundengamambo, wayuka kupana byawama ku mwananji, aye Shetu wa mwiulu witukila kupana mupashi wazhila ku bantu banji bamupopwela!—Yakoba 1:17.

14. (a) Ñanyi milanguluko yatama iji na bantu bamo bafikilwa na meseko? (b) Umvwe tubena kupita mu meseko, mambo ka o twakonshesha kulombela kwi Yehoba na luketekelo?

¹⁴ Kishimpi kya kwa Yesu kyaamba pa shanji utapo muchima kilumbulula kuba’mba buwame bwa Yehoba bwakila bobwa bumwesha nsemi wa pano panshi. Onkao mambo, umvwe twafikilwa na lukatazho kechi twafwainwa kulanguluka amba twamufichisha Lesa ku muchima, o ene mambo o tubena kupichila mu malwa ne. Ke mulwanyi wetu mukatampe, aye Satana ye ukeba’mba tulangulukenga mu jino jishinda. (Yoba 4:1, 7, 8; Yoano 8:44) Kafwapo po kyanembwa mu Binembelo kuba’mba twafwainwa kwikala na muchima wa kwilengulula ne. Yehoba kechi witweseka “na bubi ne.” (Yakoba 1:13) Kechi witupa bintu byakonsha kwitonauna nobe mulolo nangwa kaminye ne. Shetu wa mwiulu upana ‘byawama kwi abo bamulomba.’ (Mateo 7:11; Luka 11:13) Ee kine, umvwe twayuka buwame ne muchima wa Yehoba wa kukeba kwitukwasha, tukatwajijila na kulomba na luketekelo. Inge saka tuba byobyo, netuwa tukamba byonka byaambile nyimbi wa masalamo wanembele’mba: “Kine Lesa wañumvwa; wateleko muchima ku jiwi ja lulombelo lwami.”—Masalamo 10:17; 66:19.