Yesu Wasolwele Kilengela Bantu Kwikala Na Lusekelo

Yesu popo afuminetu na kubwezhapo mikambizho pa bya kulomba, bino kulomba kechi ye mutwetu ye afunjishepo javula ne. Kimye kyo aubilenga bya kukumya mu Ngalilea, Yesu bamupelemo mambo a bubela’mba ubena kuba bya kukumya na bulume bwa mukulumpe wa bandemona. Mu Yudea namo bamupelemo mambo antutu amo.

Kimye Yesu kyo apangile ndemona walengejile muntu kwikala kamaama, jibumba jakuminye bingi. Pano bino, aba bamulengulwilenga kechi bateleko muchima ne. Byonka byaubile aba bajinga mu Ngalilea, nabo baishile na kumupamo mambo a bubela amba: “Upanga bandemona na bulume bwa kwa Belezebuba mukulumpe wa bandemona.” (Luka 11:15) Bakwabo nabo bakebelenga bishiino bya kumuyukilako, bamwambijile’mba amweshepo kiyukilo kufuma mwiulu.

Yesu byo ayukile kuba’mba babena kukeba kumweseka, wibakumbwile byonkatu byo akumbwile aba bamulengulwilenga mu Ngalilea. Yesu walumbulwile’mba bufumu bwakonsha konaika umvwe bene benabo bealukamo. Wibashikishe’mba: “Umvwe Satana wialukilamo mwine, bufumu bwanji bukakosa byepi?” Kepo Yesu aambile mwingilo ye aingijilenga amba: “Umvwe mpanga bandemona na munwe wa Lesa, ko kuba’mba Bufumu bwa Lesa bwaiya kwi anweba kwa kubula kuyuka.”—Luka 11:18-20.

Yesu byo aambile pa “munwe wa Lesa,” aba bamutelekelenga bafwainwe kuvuluka kyamwekele ku bena Isalela. Aba bajinga mu kije kya kwa Felo bamweneko bya kukumya byaubile Mosesa babijikile’mba: “Kino kyaubiwa na bulume bwa Lesa!” Kabiji “munwe wa Lesa” ye wanembele Mikambizho Jikumi pa mabwe apapakana. (Kulupuka 8:19; 31:18) Kabiji “munwe wa Lesa” ko kuba’mba mupashi wazhila nangwa’mba bulume bwingila, bo bwalengejile Yesu kupanga bandemona ne kubuka bakolwa. Onkao mambo, Bufumu bwa Lesa bwaishile kwa kubula kuyuka aba bamulengulwilenga, mambo Yesu byo aji Mfumu watongolwa wa Bufumu, wajinga nabo saka oba bya kukumya.

Bulume bwa kwa Yesu bwa kupanga bandemona kyajinga kishiino kyamwesheshenga’mba uji na bulume kukila Satana, byonkatu kitonzhi byo eya ne kushinda muntu uji na bilwilo ubena kulama kipango kyanji. Yesu wabwezhezhepo kishimpi kyo aambile pa mambo a ndemona wafumine mu muntu. Uno muntu byo abujile kuyuzha mu muchima wanji bintu byawama, ndemona wabwelele na bandemona bakwabo batanu na babiji, kabiji uno muntu watamine bingi kukila byo ajinga kala. (Mateo 12:22, 25-29, 43-45) Abino, byo byajinga ne kisaka kya bena Isalela.

Mwanamukazhi umo watelekelenga kwi Yesu wabijikile’mba: “Jatokwa jivumo mo waimichilwe ne mabele o waaminweko!” Mwanamukazhi yense Muyudea wakebeshanga bingi kwikala inanji ngauzhi, kikatakata Mesiasa. Kyamweka uno mwanamukazhi walangulukilenga’mba Maliya wajinga bingi na lusekelo na mambo a kwikala inanji uno mufunjishi. Nangwa byonkabyo, Yesu ponkapotu wakwashishe yewa mwanamukazhi kuyuka kine kintu kilengela kwikala na lusekelo. Waambile’mba: “Batokwa ke boba bomvwa mambo a Lesa ne kwialama!” (Luka 11:27, 28) Yesu pa kwamba bino, kechi walumbulwilenga’mba inanji aye Maliya bafwainwe kumupa munema wakila ne. Yesu waambilenga’mba mwanamulume nangwa mwanamukazhi yense pa kuba’mba ekale na lusekelo lwa kine wafwainwa kwikala kalume wa kishinka wa Lesa, kechi kwikala mulongo wa muntu umo nangwa na mambo a mingilo ya ku mubiji ne.

Byonka byo aubile mu Ngalilea, Yesu wakajipijile bantu bajinga mu Yudea bakebelenga kiyukilo kufuma mwiulu. Wibabuujile’mba kafwako kiyukilo kya kwibamwesha ne, “poso kiyukilo kya kwa Yona.” Yona waikele kiyukilo byo ajinga moba asatu mu jisabi ne byo asapwijilenga na kuchinchika, kino kyalengejile bena Ninevwa kulapila. Yesu waambile’mba: “Bino muntu wakila Yona uji ponka pano.” (Luka 11:29-32) Kabiji Yesu wakijile Solomone wajinga na maana alengejile mfumu wa mukazhi wa ku Sheba kwiya na kumvwa kwi aye.

Yesu wanungilepo amba: “Kafwako muntu uba inge waambula lampi wamubika kwafyamika nangwa munshi ya ntumbe ne, bino umubika pa kya kutulapo lampi.” (Luka 11:33) Kampe walumbulwilenga’mba kufunjisha ne kuba bya kukumya ku bano bantu kwajinga nobe kufya kyeya kya lampi. Na mambo a kuba’mba meso abo kechi azanzhile pa kintu kimo ne, bakankelwe kukwatakanya ene mambo o aubijilenga bya kukumya.

Yesu po po afuminetu na kupanga ndemona ne kulengela muntu wajinga kamaama kwamba. Kino kintu kyafwainwe kulengela bantu kwikala na meso azanzatu pa kutumbijika Lesa ne kubuulako bakwabo mingilo yaingijilenga Yehoba. Onkao mambo, Yesu wajimwineko boba bamulengulwilenga’mba: “Jimukai kuchina’mba kyeya kiji mwi anweba kyakekala ke mfishi. Onkao mambo, umvwe mubiji wenu yense waikala watoka kwa kubula mfishi, ukatokatu too byonkatu lampi byo emupa kyeya.”—Luka 11:35, 36.