Kulomba Ne Kwipelula Kwanema Bingi

Yesu wabuujile baana banji bwanga kishimpi kyamwesheshe buneme bwa kutoñamina mu lulombelo. (Luka 11:5-13) Pa kikye kimye wafwainwa wajinga mu Samaliya nangwa mu Ngalilea, kabiji waambilepo ne jikwabo pa buneme bwa kubula kuleka kulomba. Waubile bino kupichila mu kwibela kishimpi kikwabo amba:

“Mu muzhi umo mwajinga mutonyi wabulanga kwakamwa Lesa ne kubula kunemeka bantu. Mu yenka uno muzhi mwajinga mwanamukazhi wafwilwa wayanga kwi aye kimye kyonse na kumwambila’mba, ‘Mwane banchibile bulongo mambo na ye nji nanji na mambo.’ Aye wakainenga pa kimye kyabaya, bino pa kupitapo moba waambile mu muchima amba, ‘Nangwa kya kuba kechi ngakamwa Lesa nangwa kunemeka bantu ne, na mambo a kuba uno mwanamukazhi wafwilwa ubena kunkatazha, nafwainwa kumuchibila mambo anji pa kuba’mba ekileke kwiya na kunkatazha.’”—Luka 18:2-5.

Kepo Yesu alumbulwile mwatala jino jishimikila amba: “Umvwai byaambile mutonyi nangwa kya kuba wajinga wabula koloka! Nanchi kine Lesa kechi ukebachibila mambo bantu banji basalwa bamujijila mute ne bufuku, byo kiji kuba’mba wibatekenya nenyi?” (Luka 18:6, 7) Nanchi Yesu waambilenga’mba ka pe Shanji?

Yesu kechi walumbulwilenga’mba Yehoba Lesa uji nobe yewa mutonyi wabujile koloka ne. Walumbulwilenga’mba umvwe mutonyi wabujile koloka waumvwine byo bamusashijilenga, ko kuba’mba Lesa aye waoloka ne kuwama ukakumbula umvwe bantu banji babula kuleka kulomba. Twakonsha kumvwisha kino kishinka mu byambo byanungilepo Yesu amba: “Nemwambila namba kine [Lesa] ukapelawizha kwibachibila mambo.”—Luka 18:8.

Javula bantu bepelula ne bayanji kechi bebachibila bulongo mambo ne, bino ba luusa ne banonshi bo bo bata muchima. Bino Lesa kechi byobyo amona bantu ne. Kimye inge kyafika, ukakambula babi kabiji bakalume banji bakatambula bumi bwa myaka ne myaka.

Bañanyi baji na lwitabilo nobe lwa uno mwanamukazhi wafwijilwe? Banga baitabila’mba Lesa “ukapelawizha kwibachibila mambo”? Yesu wafumine na kwamba pa buneme bwa kutoñamina mu milombelo. Pano pa kikye kimye waambilenga pa kwitabila bulume buji mu milombelo. Waambile’mba: “Mwana muntu byo akafika, nanchi kine ukataana luno lwitabilo pano pa ntanda nyi?” (Luka 18:8) Buno bwipuzho bwalumbulwilenga’mba lwitabilo lwa uno mutundu kechi lukekala na bantu bavula kimye kikeya Kilishitu ne.

Bamo batelekelenga ku byaambilenga Yesu balangulukilenga’mba bajinga na lwitabilo. Beketekejile abo bene amba baoloka kabiji balengululanga bakwabo. Onkao mambo, waelele kino kishimpi ku bantu ba uno mutundu amba:

“Banabalume babiji bayile mu nzubo ya Lesa na kulomba, umo wajinga Mufaliseo, ne mukwabo wajinga musonkeshi. Mufaliseo waimene ne kutendeka kulomba bino bintu mu muchima wanji amba, ‘Anweba Lesa, nemusanchila bingi mambo amiwa kechi nji nobe bantu bakwabo—bantu baja bya lunkanankana, babula koloka, bankende—nangwa nobe uno musonkeshi ne. Kabiji nzhikilwa na nzala jibiji mu mulungu; mpana bya bujikumi bya bintu byonse byo mmona.’”—Luka 18:10-12.

Bafaliseo bayukanyikijilwe mu kumwesha bololoke bwabo patoka. Baubanga bino kuba’mba bantu bebatote. Moba o bebikijile kuzhikilwa na nzala ajinga pa Kimo ne pa Kina, moba bantu o baubilangamo bingi busulu, ko kuba’mba pa kuba’mba bebamonenga ku bantu bavula. Kabiji bapananga ne bya bujikumi bya tubintu twakepesha twa mu bujimi. (Luka 11:42) Mu bañondo ba kunyuma, balengulwilenga bantutu kupichila mu kwamba’mba: “Jino jibumba jabula kuyuka Mizhilo [kwesakana na byalangulukanga Bafaliseo] ke ja bantu bafingwa.”—Yoano 7:49.

Yesu watwajijile kwamba kishimpi kyanji amba: “Bino musonkeshi byo aimene palepa byobya, kechi wakebelenga ne kwinuna kilungi kutala mwiulu ne, bino wipuminenga mu kyaji ne kwamba’mba, ‘Anweba Lesa, ngubilai bibusa amiwa ndengamambo.’” Kya kine, awa musonkeshi wipelwile ne kuswa bilubo byanji. Yesu waambile’mba: “Nemwambila namba, uno musonkeshi wayile ku nzubo yanji saka aoloka kukila yewa Mufaliseo. Mambo yense witumbijika aye mwine bakamupelula, pakuba awa wipelula mwine bakamutumbijika.”—Luka 18:13, 14.

Onkao mambo, Yesu waambilepo jibiji pa buneme bwa kwipelula. Luno lujimuno lwakwashishe bingi baana banji bwanga mambo bakomejile mu mapunzha mwaikalanga Bafaliseo batemenwe kwamba pa bifulo ne munema. Kabiji ke lufunjisho lwawama bingi ku baana ba bwanga bonse ba kwa Yesu.