Kijiilo kya Nkambo kya Mabanga Kilumbulula ka Kwianweba?
“Awa uja ku shinkwa uno, nangwa kutoma ku katomeno ka Nkambo kyabula kufwainwa, ukazhatwa nao a mubiji ne mashi a Nkambo.”—1 KOLINDA 11:27.
1. Ñanyi kijiilo kyakilamo kunema kyanengezhewa kubiwa mu 2003, kabiji kyatendekele byepi?
KIJIILO kimotu kyakilamo kunema kyanengezhewa mu 2003 kikobiwa panyuma yakuzhika juba pa April 16. Bakamonyi bakwa Yehoba bakakonkena pamo na kuvuluka Kivuluko kya lufu lwa Yesu Kilishitu. Byonka byo kyalumbululwa mu mutwe wafumako, Yesu watendekeshe kino kijiilo kitelwa ne kuba’mba Kijiilo kya Nkambo kya Mabanga, panyuma yakuba aye ne batumwa banji bakitanwa ku Kijiilo kya Lupitailo pa Nisani 14, 33 C.E. Bimpashañano bya Kivuluko bya shinkwa wabula mbizho ne binyu bichila bimenako mubiji wabula bundengamambo wakwa Kilishitu ne mashi anji aichikile—kyo kitapishotu bunke kyakonsha kukuula bantu ku bundengamambo ne lufu lobaswana.—Loma 5:12; 6:23.
2. Lujimuno ka lwanembwa mu 1 Kolinda 11:27?
2 Aba bajako bimpashañano bya Kivuluko bafwainwa kujako na mushingi. Mutumwa Paulo wikilumbulwile kino bulongo pakunembela bena Kilishitu bamu Kolinda wakala, mobabulanga kulondela bulongo pakuja Kijiilo kya Nkambo kya Mabanga. (1 Kolinda 11:20-22) Paulo wanembele’mba: “Awa uja ku shinkwa uno, nangwa kutoma ku katomeno ka Nkambo kyabula kufwainwa, ukazhatwa nao a mubiji ne a mashi a Nkambo.” (1 Kolinda 11:27) Bino byambo byalumbulula ka?
Bamo Bekijiilanga Mujishinda Jabula Kufwainwa
3. Bena Kilishitu bavula mu Kolinda baubanga byepi kimye kya Kijiilo kya Nkambo kya Mabanga?
3 Bena Kilishitu bavula mu Kolinda bajanga Kivuluko mujishinda jabula kufwainwa. Mwajinga mepatulo mukachi kabo, kabiji bimye bimo, bamo baletanga kajo kabo kamulajilo ne kwikaja kimye kya kupwila saka kikyangye kufika nangwa mukachi ka kupwila. Javula bakizhangamo kuja ne kutoma. Kechi bajimukile mu maana nangwa kumupashi ne. Kino kibalengejile ‘kuzhatwa nao a mubiji ne a mashi a Nkambo.’ Aba babulanga kujiila jimo kajo ka mulajilo bazeñaminengatu nanzala. Ee, bavula bajangatu kwakubula mushingi ne kubula kuyuka munema wakyokya kijiilo. Oene mambo obeletejile luzhachisho abo bene!—1 Kolinda 11:27-34.
4, 5. Mambo ka okyanemena kuboba bajako bimpashañano bya kivuluko kwipima?
4 Pamwaka pamwaka umvwe Kivuluko kekinangijile, kyanema bingi kuboba bajako bimpashañano kwipima bulongo abo bene. Pakuba’mba bajeko kukino kijiilo kyakushilañana mujishinda jafwainwa, bafwainwa kwikala batuntulu kumupashi. Yense ubula kumwesha mushingi, nangwa usula kitapisho kya Yesu wakonsha kwibika mukizumba kya ‘kuchibiwako ku bantu ba Lesa,’ byonkatu byokyajinga ku mwina Isalela umvwe wajako ku kijiilo kyakushilañana saaji wabiko.—Bena Levi 7:20; Bahebelu 10:28-31.
5 Paulo waesakenye Kivuluko ku kijiilo kyakushilañana kyaubiwanga kala mu Isalela. Watongwele boba bajako bashilañena pamo mwi Kilishitu ne kwamba’mba: “Kechi mwakonsha kutoma katomeno ka Nkambo ne katomeno ka bademona pamo ne: kabiji kechi mwakonsha kuja ku tebulu wa Nkambo ne ku tebulu wa bademona pamo ne.” (1 Kolinda 10:16-21) Umvwe muntu ujako kubimpashañano bya Kivuluko walenga mambo, wafwainwa kwiasolola kwi Yehoba ne kulomba bukwasho bwa kumupashi ku bakulumpe mu kipwilo. (Byambo bya Mana 28:13; Yakoba 5:13-16) Umvwe walapila kya kine ne kumwesha bipangwa bya lulapilo, ko kuba’mba kechi ubena kuja kyabula kufwainwa ne.—Luka 3:8.
Kutanwakotu na Kumwesha Mushingi
6. Bañanyi Lesa boasungila jishuko jakujako ku Kijiilo kya Nkambo kya Mabanga?
6 Nanchi aba bobila byawama ba 144,000 balongo bakwa Kilishitu bafwainwa nabo kujako ku Kijiilo kya Nkambo kya Mabanga nyi? (Mateo 25:31-40; Lumwekesho 14:1) Ine. Lesa wasungila jino jishuko bantu boashinga na mupashi wanji wazhila “ba kuswana pamo ne Kilishitu.” (Loma 8:14-18; 1 Yoano 2:20) Pano nga aba baji na luketekelo lwa kwikala myaka ne myaka mu paladisa panopantanda ponse mubukalama bwa Bufumu boba byepi? (Luka 23:43; Lumwekesho 21:3, 4) Byobabula kwikala banswanyi bakuswana pamo ne Yesu mwiulu, batanwakotu ku Kivuluko na kumwesha mushingi.—Loma 6:3-5.
7. Mambo ka bena Kilishitu ba mu myaka-kitota kitanshi obayukijilenga’mba bafwainwe kujako ku bimpashañano bya Kivuluko?
7 Bena Kilishitu bakine mu myaka-kitota kitanshi bashingilwe na mupashi wazhila. Bavula bamwiabo baingijishenga kya bupe kimo kya mupashi wazhila nangwa byavula mujishinda jakukumya, nabiji kwambila munjimi. Onkao mambo, kechi kyashupilenga kubano bantu kwiyuka’mba bashingwa na mupashi ne kuba’mba bafwainwa kujako ku bimpashañano bya Kivuluko ne. Pano bino mukino kimye kyetu kyalelo, umvwe muntu washingwa na mupashi wakonsha kuyukanyikilwa kubino byambo byanembeshiwa na mupashi kuba’mba: ‘Bonse mo bavujila bo batangijila ku Mupashi wa Lesa, bo baana ba Lesa. Mambo kechi mwatambwile mupashi wa buzha amba mube moyo ne; kabiji mwatambwile mupashi wa bwana bwa bene, mo mo tutachila’mba, Abba, Tata.’—Loma 8:14, 15.
8. Bañanyi babena kwimenwako na “kajo” ne “bincha” batongolwa mu Mateo kyapitala 13?
8 Kutatulatu kimye kya kipwilo kitanshi kya bena Kilishitu, bashingwa bakine bakomenenga nobe “kajo” kaji mubujimi muji “bincha,” nangwa’mba bena Kilishitu babubela. (Mateo 13:24-30, 36-43) Kutatulatu muma 1870, “kajo” kailenga pachepache na kumwekanyika, kabiji byo papichile myaka nobe 100 bena Kilishitu bakulumpe mu kipwilo bashingwa bebambijile’mba: “Bakulumpe mu kipwilo . . . bafwainwa kulumbulwila boba bakonkena pamo [ku Kivuluko] bino bintu; (1) kwikala na lwitabilo mumashi [a Kilishitu]; ne (2) Kwipana kwi Nkambo ne kumwingilo wanji, kufikatu ne ku lufu. Kepo bafwainwa kwambila boba baji na lwitabilo mumashi a Kilishitu kuvulukila pamo nabo lufu lwa Nkambo.”—Studies in the Scriptures, Series VI, The New Creation, peja 473.a
Kukeba ‘Mikooko Ikwabo’
9. “Jibumba jikatampe” jayukanyikilwe byepi mu 1935, kabiji kino kyalengejile bamo bajangako bimpashañano bya Kivuluko kuba ka?
9 Mukuya kwa kimye, jibumba ja Yehoba jatatwile kulangulukapo ne pa bantu bakwabo kununga pakulanguluka pa baana ba bwanga bashingwa bakwa Kilishitu. Bano bantu bakwabo bamwekele muma 1930. Patanshi bantu ba Lesa balangulukanga’mba “jibumba jikatampe” janembwa mu Lumwekesho 7:9 kejibumba jabubiji ja ku mupashi jikekala mwiulu pamo na ba 144,000 bashingwa bakasangulwa—jiji nobe bakabaala nangwa balunda bamusongwa wa Kilishitu. (Masalamo 45:14, 15; Lumwekesho 7:4; 21:2, 9) Bino pa May 31, 1935, mujashi jaambiwe pakupwila kwa nkambi kwa Bakamonyi bakwa Yehoba mu Washington, D.C., U.S.A., kyalumbulwilwe bingi bulongo kufuma mu Binembelo kuba’mba “jibumba jikatampe” (“luntu,” King James Version) yo ‘mikooko ikwabo’ iji mu moba apelako. (Yoano 10:16) Kuno kupwila kwa nkambi byo kwapwiletu, bamo bajilengako bimpashañano bya Kivuluko balekele kujako mambo baishile kuyuka’mba luketekelo lwabo kelwakwikala panopantanda, kechi mwiulu ne.
10. Mwakonsha kulumbulula byepi luketekelo ne mingilo ingila ‘mikooko ikwabo’ yalelo jino?
10 Kikatakata kutatula mu 1935 kwajinga pano kukeba boba baishile kwikala ‘mikooko ikwabo,’ baji na luketekelo mu bukuzhi, bepana abo bene kwi Lesa, kabiji bakwasha bashingwa ba “kajitanga kacheche” mu mwingilo wa kusapwila Bufumu. (Luka 12:32) Ino mikooko ikwabo yaketekela kwikala panopantanda myaka ne myaka, pano bino mubyubilo byonse bikwabo, bajitu pamo na banswanyi bashalapo baano moba bakaswana Bufumu. Byonka byajinga kala benyi baikalanga pamo nabena Isalela bapopwelanga Yehoba ne kukokela Mizhilo, ne lelo jino mikooko ikwabo baswa kwingila mingilo yabwina Kilishitu, nabiji kusapwila mambo awama pamo nabena Isalela ba ku mupashi. (Ngalatiya 6:16) Pano bino, byonkatu byokyajinga kuba’mba kafwako mwenyi wa mu bena Isalela wakonsheshe kwikala mfumu nangwa ñanga ne, ne muino mikooko ikwabo kafwako bakonsha kulama mu Bufumu bwa mwiulu nangwa kwikala bañanga ne.—Mpitulukilo ya mu mizhilo 17:15.
11. Mambo ka juba muntu joepainepo kyojanemena kuyukilako umvwe uji kulubaji lwa bashalapo bashingwa nangwa ne?
11 Pakufika muma 1930, kyailenga na kuyukanyikwa patoka pachepache ku bonse amba, jibumba ja bakaya mwiulu jasalwa kala. Myaka nobe 70 yabapitepo, kubaikale mwingilo wakukeba bamikooko ikwabo, baji na luketekelo lwakwikala panopantanda. Umvwe umo wamubashingwa wakankalwa kutwajijila kwikala wakishinka, muntu umo waingijila Lesa mubukishinka pamyaka yavula wamu mikooko ikwabo wakonsha kwitwa kwiya nakupingakena pakyokya kifulo kyashala muba 144,000.
Ene Mambo Alengela Bamo Kwitutujika
12. Ñanyi bintu byakonsha kulengela muntu kuleka kuja bimpashañano bya Kivuluko, kabiji mambo ka?
12 Bena Kilishitu bashingwa bayukishatu bulongo kuba’mba kine baitwa kuya mwiulu. Pano ibyepi umvwe bantu bamo babula kwitwa kuya mwiulu bajako bimpashañano bya Kivuluko? Byobafikena kuyuka’mba kechi baji na luketekelo lwa kuya mwiulu ne, jiwi jabo ja muchima jakonsha kwibalekesha kujako. Lesa kechi wakonsha kubila bibusa muntu uji yense ubena kwitutujika’mba waitwa kuya mwiulu na kukekala mfumu ne ñanga bino saayukishatu bulongo’mba kechi waitwa ne. (Loma 9:16; Lumwekesho 20:6) Yehoba waipaile Kola mwina Levi na mambo akwitota kwanji kwakukeba kwikala pakifulo kya buñanga kya bamukisemi bakwa Alona. (Kulupuka 28:1; Kubala 16:4-11, 31-35) Umvwe mwina Kilishitu uji yense pano wayuka’mba wajangako bimpashañano bya Kivuluko mu kilubo, wafwainwa kuleka kujako ne kwipelula kulomba kwi Yehoba kuba’mba amulekeleko mambo waja nyenye kechi ukabwezhapo ne.—Masalamo 19:13.
13, 14. Mambo ka bamo obetutujikila’mba baitwa kuya mwiulu?
13 Mambo ka bamo obetutujikila’mba baitwa kuya mwiulu? Lufu lwa mwina kwabo nangwatu malwa akwabo ebamwekela akonsha kwibalengela kushikwa bwikalo bwa panopantanda. Kimo kimye bakonsha kukumbwa kwikala na luketekelo lwa kuya mwiulu pakumona mulunda nabo mwina Kilishitu washingwa. Pano bino, Lesa kechi wapapo muntu uji yense mwingilo wakwenda kupitamo na kutundaika bakwabo kwikala na jino jishuko ne. Kabiji kechi usala banswanyi bamu Bufumu kupichila mukwibomvwisha mawi akwibabula’mba basalwa ne.
14 Lufunjisho lwa bupopweshi bwa bubela lwa kuba’mba bantu bonse bawama baya mwiulu lwakonsha kulengela bamo kulanguluka’mba baitwa kuya mwiulu. Onkao mambo, twafwainwa kujimuka kubula kubepwa na milanguluko yakala ibi nangwa na bintutu bikwabo. Kyakumwenako, bamo bafwainwa kwiipuzha abo bene’mba: ‘Nanchi ntoma muchi umvundankanya milanguluko nyi? Abya ndangulukisha kufika palepa kyakuba kaneumvwe nobe nashingwa nyi?’
15, 16. Mambo ka bamo obakonsha kulangulukila’mba bashingwa?
15 Bamo bafwainwa kwiipuzha abo bene’mba: ‘Nanchi nkeba kutumbalala nyi? Abya pakino kimye nkebesha kwikala na kifulo nangwa nkebesha kukekala nswanyi pamo ne Kilishitu mukimye kyakulutwe nyi?’ Kimye banswanyi ba Bufumu kyo baichilwe mukitota-myaka kitanshi, kechi bonse bajinga na bifulo mu kipwilo ne. Kabiji bantu baitwa kuya mwiulu kechi bakeba kutumbalala nangwa kwitukumika’mba mwane bashingwa ne. Bamwesha kwipelula kwafwainwa byo baji “na muchima wa Kilishitu.”—1 Kolinda 2:16.
16 Bamo bakonsha kulanguluka’mba baitwa kuya mwiulu mambo bafunda maana avula amu Baibolo. Bino kushingwa na mupashi kechi kokulengela kwikala na maana avula ne, mambo Paulo wafunjishe ne kujimunako bashingwa bamo. (1 Kolinda 3:1-3; Bahebelu 5:11-14) Lesa uji na lunengezho lwakupainamo kajo ka kumupashi ku bantu banji bonse. (Mateo 24:45-47) Onkao mambo, kafwako nangwa umo wafwainwa kulanguluka’mba byoaji mwina Kilishitu washingwa uji na maana akila oa ajipo na boba baji na luketekelo lwa kwikala panopantanda ne. Kushingwa na mupashi kechi kuyukanyikwa na busendwe bwakukumbula mepuzho amu Binembelo, kusapwila, nangwa kwamba majashi a Baibolo ne. Bena Kilishitu bamo baji na luketekelo lwa kwikala panopantanda nabo boba bingi bulongo mubino byonse.
17. Kushingwa na mupashi kwaimena paka kabiji pe ñanyi?
17 Umvwe mukwetu wa mulwitabilo waipuzha pamambo alwito lwa kuya mwiulu, mukulumpe mu kipwilo nangwa mwina Kilishitu wafwainwa kukumbula bulongo mokyayila, wafwainwa kwisamba nanji bulongo pakino kintu. Pano bino, muntu umo kechi wakonsha kufuukwilako mukwabo luno lwito ne. Muntu waitwa kya kine kechi wipuzha bakwabo kumubula’mba uji na luno luketekelo ne. Bashingwa ‘basemwa jibiji, kechi ku lukunwa ubola ne, poso ku ubula kubola, monka mu mambo a Lesa, aji na bumi ne kwikala aikala myaka.’ (1 Petelo 1:23) Kupichila mu mupashi ne Byambo byanji, Lesa ujimba “lukunwa” ulengela muntu kwikala “ke mulengwa mupya,” uji na luketekelo lwa kuya mwiulu. (2 Kolinda 5:17) Kabiji Yehoba yeusala. Kusalwa kechi kwaimena ‘pa yewa usaka ne, nangwa yewa wingila ne, kwaimena pa lusa lwanji aye Lesa.’ (Loma 9:16) Pano nanchi muntu wakonsha kuyuka byepi’mba waitwa kuya mwiulu?
Kibalengela Kushiinwa
18. Mupashi wa Lesa ushimuna byepi mu michima ya bashingwa?
18 Bukamonyi bwa mupashi wa Lesa bobushiina bena Kilishitu bashingwa kuba’mba baji na luketekelo lwa kuya mwiulu. Mutumwa Paulo wanembele’mba: ‘Mwatambwile mupashi wa bwana bwa bene, mo mo tutachila’mba, Abba, Tata. Aye Mupashi mwine ushimuna pamo ne mipashi yetu, amba twi baana ba Lesa: kabiji umvwe twi baana, twi banswanyi pamo; banswanyi ba Lesa, ba kuswana pamo ne Kilishitu, umvwe twamanama nanji pamo, amba tukatumbijikwe nanji pamo.’ (Loma 8:15-17) Na bukwasho bwa mupashi wazhila, michima yabashingwa ibatundaika kwingijisha abo bene byamba Binembelo pamambo abaana ba Yehoba ba kumupashi. (1 Yoano 3:2) Mupashi wa Lesa wibalengela kulanguluka’mba baana kwiaye ne kwibalengela kwikala na luketekelo lwapusanako. (Ngalatiya 4:6, 7) Ee, bumi bwa myaka ne myaka panopantanda bwakwikala bantu baoloka na bisemi ne balunda netu bukawama bingi, pano bino luno kechi loluketekelo lwibapa Lesa ne. Kupichila mu mupashi wanji, Lesa wabika mobaji luketekelo lwakosa lwa kuya mwiulu kya kuba bepana kusha bintu byonse ne luketekelo lwa panopantanda.—2 Kolinda 5:1-5, 8; 2 Petelo 1:13, 14.
19. Lulayañano lupya lwingila mwingilo ka mubwikalo bwa bena Kilishitu bashingwa?
19 Bena Kilishitu bashingwa bayukishatu bulongo kwakubula kuzhinauka luketekelo lwabo lwa kuya mwiulu, ne lwakwikala mululayañano lupya. Yesu wikyambilepo kino kimye kyoatendekeshe Kivuluko amba: “Kano katomeno lo lulayañano lupya mu mashi ami, emwichikila anweba.” (Luka 22:20) Muluno lulayañano lupya muji Lesa ne bashingwa. (Yelemiya 31:31-34; Bahebelu 12:22-24) Yesu ye ñambi. Pakuba lulayañano lupya byo lwaikalako na mambo amashi aichikile akwa Kilishitu, kechi mujitu Bayudea bonka ne, muji ne bantu bafuma mu mikoka ya bantu mambo a jizhina ja Yehoba ne kwikala ke ‘lukunwa’ wa Abalahama. (Ngalatiya 3:26-29; Byubilo 15:14) Luno “lulayañano lwa myaka” lolulengela bena Isalela bonse ba kumupashi kusangwilwa ku bumi bwabumbulwa kufwa mwiulu.—Bahebelu 13:20.
20. Bashingwa basendwa muñanyi lulayañano pamo ne Kilishitu?
20 Bashingwa bayukisha bingi luketekelo lwabo kwa kubula kuzhinauka. Basendwa ne mululayañano lukwabo, lulayañano lwa Bufumu. Pamambo akwikala pamo ne Kilishitu, Yesu waambile’mba: “Anweba mwi boba bakelwa ne amiwa mu lweseko lwami; kabiji nemutongwela bufumu, byonka byo bantongwejile Batata.” (Luka 22:28-30) Luno lulayañano pakachi ka Kilishitu ne bamfumu bakwabo lukatwajijila na kwingila myaka ne myaka.—Lumwekesho 22:5.
Kimye kya Kunangijila ku Kivuluko—Kekimye Kyalusekelo Bingi
21. Twakonsha kumwenamo byepi lusekelo lukatampe mukimye kya kunangijila ku Kivuluko?
21 Kwikala byubiwa byavula bingi bileta lusekelo mu Kimye kya kunangijila ku Kivuluko. Twakonsha kufunda byavula mu mutanchi watanchikwa wakutanga Baibolo mukino kimye. Kabiji kikala ke kimye kyafwainwa bingi kulombelamo lulombelo, kulanguluka-languluka pabwikalo bwakwa Yesu boaikele panopantanda kufikatu ne ku lufu lwanji, kabiji ne kwingilako mwingilo wa kusapwila Bufumu. (Masalamo 77:12; Filipai 4:6, 7) Kino kijiilo kituvululako butemwe boetumwesha Lesa ne Kilishitu mukitapisho kya bukuzhi bwakwa Yesu. (Mateo 20:28; Yoano 3:16) Luno lunengezho lwitupa luketekelo ne lutekenesho kabiji lwafwainwa kukosesha mfuukwilo yetu yakukeba kwikala na byubilo byajingapo ne Kilishitu. (Kulupuka 34:6; Bahebelu 12:3) Kabiji Kivuluko kyafwainwa ne kwitukosesha kufikizha kwipana kwetu atweba bakalume ba Lesa, ne kwikala baana babwanga bakishinka ba Mwananji yeatemwisha.
22. Kyabupe ka kikatampe Lesa kyoapa bantu, kabiji jishinda ka jimo jakumwesheshamo lusanchilo lwa kino kyabupe?
22 Yehoba byoetupapo byabupe byawama! (Yakoba 1:17) Byambo byanji bitutangijila, mupashi wanji witukwasha, kabiji tuji ne na luketekelo lwa bumi bwa myaka. Kyabupe kikatampe Lesa kyoetupa ke kitapisho kya Yesu kya kukuula bashingwa ne boba bonse baji na lwitabilo ku bundengamambo bwabo. (1 Yoano 2:1, 2) Pano lufu lwa Yesu lwanema byepi kwianweba? Nanchi mukekalapo paboba basanchila luno lufu bakapwila panyuma yakuzhika juba pa April 16, 2003, na kuvuluka Kijiilo kya Nkambo kya Mabanga nyi?
[Tubyambo twa mushi]
a Wanembwa na Bakamonyi bakwa Yehoba bino kino kimye kechi upulintwa ne.
Musakukumbula’mbaka?
• Bañanyi bafwainwa kujako bimpashañano bya Kivuluko?
• Mambo ka ‘mikooko ikwabo’ kyoitainwako ku Kijiilo kya Nkambo kya Mabanga na kumwesha mushingi?
• Bena Kilishitu bashingwa bayuka byepi kuba’mba bafwainwa kuja shinkwa ne kutoma binyu bya Kivuluko kya lufu lwa Kilishitu?
• Kimye kya kunangijila ku Kivuluko kyo kimye kyawama kubilamo ka?
[Galafu/Bipikichala pa peja 14]
(Umvwe mukeba bine byambo, monai mu buku)
Bajako Batanwa ku Kivuluko
MU MA MILYONYI
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Kipikichala pa peja 14]
Nanchi mukatanwako ku Kijiilo kya Nkambo kya Mabanga uno mwaka nyi?
[Bipikichala pa peja 17]
Kimye kya kunangijila ku Kivuluko kyo kimye kyawama kuyilako palutwe kutanga Baibolo ne kwingilako mwingilo wa kusapwila Bufumu